Rusiya Jurnalistlər İttifaqı Azərbaycan Mətbuat Şurasının Azərbaycanın kütləvi informasiya vasitələrinin Rusiya ərazisində yayımının bloklanması ilə əlaqədar bəyanatına reaksiya verib.
Bununla bağlı MŞ sədri Əflatun Amaşova ittifaqın sədri Vladimir Solovyovun imzası ilə məktub göndərilib.
Məktubda bildirilib ki, Rusiya Jurnalistlər İttifaqı Azərbaycan Mətbuat Şurasının məlum bəyanatı ilə tanış olub. Sənəddə müxtəlif fikir, düşüncə və baxışların konstruktiv dialoqa və qarşılıqlı hörmət prinsipinə xələl gətirməməsinin vacibliyinin ittifaqa üzv təşkilatlar, Rusiyanın müxtəlif bölgələrindən olan jurnalistlər tərəfindən dəstəkləndiyi vurğulanıb və İttifaqın Şura ilə mövcud istiqamətdə dialoqa hazır olduğu önə çəkilib.
RJU, eyni zamanda, hadisə və proseslərin obyektiv işıqlandırılmasının ölkələrdə, regionlarda əhalinin vəziyyətinin düzgün qiymətləndirilməsi baxımından mühüm əhəmiyyət daşıdığını da diqqətə çatdırıb. Qurum bu prinsipə söykənərək Azərbaycan əhalisinin Ukraynada baş verən proseslərdən obyektiv şəkildə məlumatlandırılmasının vacibliyindən söz açıb. Buna görə sənəddə Azərbaycan Mətbuat Şurasının Azərbaycan media məkanının Rusiya tərəfindən irəli sürülən baxışlarla tanışlığına kömək göstərməsinin, beləliklə Azərbaycan auditoriyası üçün tam mənzərənin formalaşmasına dəstəyin zəruriliyi üzərində dayanılıb.
Rusiya Jurnalistlər İttifaqının məktubunda, həmçinin, qurum tərəfindən ən qısa zamanda Bakıya səfər təşkil etməyə, Rusiya Jurnalistlər İttifaqının üzvləri və rusiyalı ekspertlər tərəfindən vəziyyəti dəyərləndirmək üçün müzakirələr aparmağa hazırlıq ifadə olunub: “Əminik ki, biz birlikdə yaranmış müvəqqəti çətinlikləri aradan qaldıra, ənənəvi dostluq və əməkdaşlıq əlaqələrini davam etdirə biləcəyik”.
Ümumilikdə, Rusiya Jurnalistlər İttifaqının Mətbuat Şurasına məlum cavabını məqbul saymaq olarmı?
“Biz sadəcə olaraq ədalətli informasiya siyasətinin tərəfdarıyıq, amma bu, Rusiyanın xoşuna gəlmir”
Məsələyə münasibət bildirən media eksperti Azər Həsrət, prinsipcə, sözügedən cavabı məqbul saymadı. O bunu bir sıra arqumentlərlə əsaslandırdı: “Rusiya Jurnalistlər İttifaqının MŞ-ya verdiyi cavab nəzakətli idi, lakin gerçəkləri əks etdirmirdi. Yəni həqiqətlərdən yan keçməyə hesablanmış bir cavab idi. Cavabda ümumi ifadələr yer alıb. Qeyd edilib ki, iki ölkə jurnalistləri arasında münasibətlərin qurulmasında, qarşılıqlı səfərlərdə maraqlıdılar və s. Ümumilikdə, bu kimi fikirlər yaxşıdır və biz də bunun tərəfdarıyıq. Ancaq o cavabda nəyə görə Rusiyanın obyektiv və balanslı siyasət aparan Azərbaycan mediasını əngəllədiyinə aydınlıq gətirilməyib. Halbuki, mediamız tərəf tutmur. Hər zaman bəyan etmişik ki, biz Rusiyanın Ukraynaya təcavüzü məsələsində tərəf deyilik. Biz sadəcə olaraq ədalətli informasiya siyasətinin tərəfdarıyıq, amma bu, Rusiyanın xoşuna gəlmir. Onlar istəyir ki, Azərbaycan jurnalistləri Rusiya dövlətinin rəsmi təbliğatını işıqlandırsın. Biz isə onların təbliğatının aləti ola bilmərik. Rusiya anlamalıdır ki, 44 günlük Vətən savaşında Rusiyada anti-Azərbaycan təbliğatı aparan heç bir rus mediasını əngəlləmədik. Rusiyanın telekanalları bütün günü bizim əleyhimizə işləyirdi. Hətta ənənəvi olaraq Avropada bizim əleyhimizə danışanlar susmuşdu, amma Moskva susmamışdı. Belə olan halda Rusiyanın Azərbaycana məxsus 3-5 saytı əngəlləməsi dözümsüzlük və ədalətsizlikdir. O üzdən, Rusiya Jurnalistlər İttifaqının cavabını yetərli saymırıq. Hesab edirik ki, onlar bizə daha ayrıntılı cavab göndərə bilərdilər”.
A.Həsrətin fikrincə, Ukrayna məsələsində Rusiya Azərbaycan mediasının tam balanslı xəbərçiliklə məşğul olmasını istəyirsə, o zaman zəhmət çəkib öz ölkələrində normal media fəaliyyətinə şərait yaratsınlar: “Halbuki, Rusiyada alternativ fikir yayan bütün media vasitələrinin fəaliyyəti dayandırılıb. Hətta xəbərdarlıq edilib ki, müharibə haqqında yazmayın. Rusiyada məşhur “Novaya Qazeta” kimi mətbuat orqanı müharibə bitənə qədər fəaliyyətini dayandırdı. Niyə? Ona görə ki, adamlar jurnalistikaya xəyanət etmək istəmir. Normal jurnalistika ilə məşğul olmaq istəyirlər, amma hakimiyyət buna imkan vermir. Azərbaycan mediası Rusiyadan alternativ məlumat ala bilmir. Yalnız dövlət təbliğatına söykənən informasiya siyasəti aparılır. Bu da doğru deyil”.
O baxımdan media eksperti hesab edir ki, Rusiya sözügedən yanaşmanı dəyişməlidir.
Vidadi ORDAHALLI
