Məlum olduğu kimi, Azərbaycanın bir neçə saytı Rusiya tərəfindən bloklanıb. Gizlin deyil ki, bütün bunlar Rusiyanın Azərbaycan mediasına qərəzli münasibətinin göstəricidir. Neçə gündür ölkəmizdə əsas müzakirə edilən məsələlərdən birinə çevrilən bu hadisə ciddi narahatlıqlar yaradır və Azərbaycana qarşı daim qərəzli mövqe tutan məlum Rusiya saytlarının ölkəmizdə bloklanması məsələsini aktuallaşdırır.
Rusiya Azərbaycana məxsus bir neçə xəbər saytına girişi məhdudlaşdırıbsa, Azərbaycan da adekvat addımlar atmalıdır. Bu fikirdə olanların sırası günü-gündən genişlənir. Məlumatlara görə, Azərbaycanın əleyhinə məlumat yayan Rusiya saytları bloklana bilər. Azərbaycanın mənafeyinə, ərazi bütövlüyünə zidd məlumatlar yayımlayan veb-saytların fəaliyyəti ilə bağlı müvafiq tədbirlər həyata keçirilə bilər. Bu barədə yerli mətbuatın Azərbaycanın bəzi saytlarına Rusiyada tətbiq edilən məhdudiyyətlər fonunda qarşı tərəfə münasibətdə adekvat addımların atılmasının mümkünlüyü barədə sorğuya cavab olaraq Rəqəmsal İnkişaf və Nəqliyyat Nazirliyinin Elektron Təhlükəsizlik Xidmətindən (ETX) bildirilib. Qeyd olunub ki, ölkə daxilində və xaricində hər hansı saytın fəaliyyətinin məhdudlaşdırılması məsələsi Azərbaycan qanunvericiliyi ilə tənzimlənir: “Belə ki, həmin resurslarda ölkənin mənafeyinə, ərazi bütövlüyünə zidd, qanunvericiliyinə uyğun olmayan məlumatlar yayımlanarsa, həmin saytların fəaliyyəti ilə bağlı müvafiq tədbirlər həyata keçirilə bilər”.
Görndüyü kimi, qanunvericilik də Azərbaycan barədə daim təxribatçı, qərəzli informasiyalar yayan Rusiya saytlarının bloklanmasına imkan verir.
“Qanunvericiliklə Azərbaycan əleyhinə təbliğat aparan saytların bloklanması mümkündürsə, Azərbaycan hökməti o saytları bloklaya bilər”
“Paralel” qəzetinin baş redaktor müavini Akif Nəsirli bizimlə söhbətində bildirdi ki, Vətən müharibəsi dövründə Rusiyanın bir neçə telekanalı başda olmaqla bu ölkənin media orqanları Azərbaycana qarşı qərəzli informasiya yaymaqla məşğul olub, ermənipərəst mövqe sərgiləyib. Həmin dövrdə Azərbaycanın Rusiya medaisına qarşı bloklama addımını atmadığını deyən A.Nəsirlinin sözlərinə görə, bu gün Rusiya Azərbaycan mediasında yayılan xəbərlərə dözümsüz yanaşır. A.Nəsirli hesab edir ki, Azərbaycan əleyhinə kampaniyalar aparan, ərazi bütövlüyümüzə xələl gətirən məlumatlar yayan Rusiya saytlarının Azərbaycanda bloklanması doğru olardı, buna qanunvericilik də əsas verir: “Birincisi, harada Azərbaycan əleyhinə, Azərbaycanın mənafelərinə toxunan, zidd olan məqamlar varsa Azərbaycan hökuməti buna adekvat cavab verməlidir, bu məsələyə aydınlıq gətirməlidir. Həmin saytlara öz mövqeyini yerləşdirməlidir və onların rəhbərliyinə xəbərdarlıq etməlidir ki, bu məsələlər doğru deyil, siz məqsədyönlü şəkildə Azərbaycan əleyhinə təbliğat aparırsınız. Azərbaycan hökuməti Rusiyanın həmin saytlarına ciddi xəbərdarlıq etməlidir ki, sizin apardığınız təbliğat həm Azərbaycan qanunvericiliyinə, həm də jurnalist etkasına uyğun deyil. Yəni yalan üzərində qurulmuş təbliğatın aparılması düzgün deyil. Digər tərəfdən, bu məsələ Azərbaycan qanunvericiliyinə uyğun olaraq həll edilməlidir. Qanunvericiliklə Azərbaycan əleyhinə təbliğat aparan saytların bloklanması mümkündürsə, Azərbaycan hökuməti o saytları bloklaya bilər”. Bir jurnalist olaraq bütün hallarda bloklamaya qarşı olduğunu deyən A.Nəsirli yalan məlumatları inkar edən yazıların yayılmasının tərəfdarı olduğunu deyir. O hesab edir ki, bu variant da faydalı olar. “Rusiya saytlarında Azərbaycan əleyhinə gedən bütün yalan, təxribatçı məlumatları faş edən kampaniyaların aparılması, həmin mətbu orqanlarda bu məsələlərə aydınlıq gətirilməsi istiqamətində çıxışların edilməsinin daha çox tərəfdarıyam. Ancaq bir məsələ də var ki, artıq Rusiya Azərbaycanın bir neçə saytını bloklayıb. Rusiya hökuməti haqqın.az, minval.az, oxu.az saytlarını bloklayıb. Azərbaycan saytlarının bloklanması artıq mətbu orqanların məsələsi deyil, bu, dövlət olaraq Rusiyanın addımlarıdır. Saytlar da dövlətin resursları olaraq fəaliyyət göstərir. Yəni burada azad mətbuatdan söhbət gedə bilməz. Digər tərəfdən də, Rusiyanın bu davranışına cavab olaraq Azərbaycan tərəfindən Rusiya saytlarının bloklanması ən ədalətli yollardan biri olardı”- deyə A.Nəsirli qeyd etdi.
İradə SARIYEVA
