Azərbaycan Müdafiə Nazirliyi öz qoşunlarının Fərrux kəndindən çıxarılması haqqında xəbərləri təkzib edib. Qeyd edək ki, daha əvvəl Rusiya Müdafiə Nazirliyi Azərbaycan qoşunlarının geri çəkildiyini bildirmişdi. Azərbaycan Müdafiə Nazirliyi Rusiya Müdafiə Nazirliyinin martın 27-də yaydığı bu məlumatın həqiqətə uyğun olmadığını bildirib.
Rusiya Müdafiə Nazirliyi iddia edirdi ki, Azərbaycan tərəfi kəndi tərk edib və əvvəlki mövqelərinə qayıdıb. Nazirlik Azərbaycan tərəfindən atəşkəs rejiminin pozulması və hər tərəfdən iki nəfər olmaqla 4 nəfərin yaralandığını da bildirmişdi. Azərbaycan Müdafiə Nazirliyi isə bəyan edib ki, Azərbaycan Ordusunun ölkəmizin suveren ərazilərinin tərkib hissəsi olan Fərrux kəndi və ətraf yüksəkliklərdəki mövqelərində heç bir dəyişiklik baş verməyib. Azərbaycan Ordusunun bölmələrinin həmin mövqelərdən geri çəkilməsi haqqında məlumat həqiqəti əks etdirmir.
Azərbaycan deyir ordumuz Fərrux kəndindən çıxmayıb, Rusiya isə iddia edib ki, Azərbaycan hərbçiləri Fərrux kəndindən çıxıblar.
Rusiya Müdafiə Nazirliyi belə yanlış məlumatı, dezinformasiyanı nə məqsədlə yaya bilər? Rusiya Müdafiə Nazirliyinin məqsədi nədir ki, bu cür həqiqətə uyğun olmayan məlumatlar yayır?
“Rusiya Müdafiə Nazirliyi Ermənistan cəmiyyətini, rəhbərliyini bir qədər arxayınlaşdırmaq, sakitləşdirmək üçün bu cür dezinformasiya yaya bilər”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, Azərbaycan hələ də Ermənistanla müharibə vəziyyətində qalır, ortada sülh müqaviləsi yoxdur. Qarabağın bir hissəsinin müvəqqəti olaraq Rusiya sülhməramlılarının nəzarəti altında olduğunu deyən A.Nağı təəssüflə qeyd etdi ki, həmin ərazilərdə qanunsuz erməni silahlı birləşmələri fəaliyyət göstərir, onlar hələ də qalır. “Azərbaycan, Rusiya və Ermənistan rəhbərlikləri arasında 2020-ci il noyabrın 10-da əldə olunmuş razılaşmaya görə, həmin silahlı birləşmələr birmənalı şəkildə ərazini tərk etməli idilər. Onların da oradan çıxarılması vəzifəsi Rusiya sülhməramlılarının üzərinə düşürdü. İndiyə qədər Rusiya sülhməramlıları bu vəzifəni yerinə yetirməyib. Ona görə də Azərbaycan məcburdur ki, həmin üçtərəfli razılaşmanı özü birtərəfli qaydada yerinə yetirsin. Burada heç bir qanunsuz məsələ yoxdur. Azərbaycan geniş hərbi əməliyyata başlamadan, qan tökmədən “yumşaq təzyiqlə” tədricən dayanmalı olduğu mövqelərə çıxır. O cümlədən də Fərrux yüksəkliyinə çıxıb. İndi orada iki kəndin adı hallanır. Pirlər və Fərrux kəndləri. Həmin kəndləri Azərbaycan hərbiçiləri nəzərətə götürüb və bizim nəzarətimizdədir. Burada da qeyri-qanuni bir şey yoxdur. Azərbaycan həm beynəlxalq hüquqa, həm də üçtərəfli razılaşmaya uyğun olaraq o əraziləri nəzarətə götürüb. 1992-93-cü illərdə Fərrux yüksəkliyi uğrunda gərgin döyüşlər gedirdi. Fərrux yüksəkliyi dəniz səviyyəsindən təxminən 1200 metr hündürlükdədir, çox vacib bir yüksəklikdir. Həmin yüksəklik kimdədirsə ətraf ərazilərə, o cümlədən Ağdama, Xocalıya, Xankəndiyə, Əsgərana gedən yollara o nəzarət edir. Vacib bir ərazidir və razılaşmaya görə, başqa ərazilərlə yanaşı həmin ərazlərdə də bizim hərbiçilərimiz dayanmalı idi. Azərbaycan burada həm taktiki məsələləri həll edir, həm də öz hüququnu reallaşdırır. Digər tərəfdən, bu hadisə baş verməlidir və hər kəs də bunu qəbul etməlidir. Çünki proses ləngiyir, Azərbaycan da gözləməli deyil. Başqa tərəfdən, müharibə həm də informasiya müharibəsdir, Azərbaycan öz, Rusiya rəhbərliyi də öz mövqeyini bildirir. Eyni zamanda deyək ki, Ermənistan da müəyyən faktları saxtalaşdırmaqla hansısa bir təsəvvür yaratmağa çalışır. Amma biz Rusiyanın verdiyi məluamtları diqqətlə izləyirik. Rusiya XİN və Müdafiə Nazirliyi məlumatlar verir. Rusiya Müdafiə Nazirliyinin məlumatlarında çox kobud yanaşma müşahidə edilir. Sanki onlar Rusiya prezidentinin, Rusiya Silahlı Qüvvələrinin Ali Baş Komandanının mövqeyindən kənara çıxırlar. Bu yanaşma Rusiya rəhbərliyi ilə razılılaşdırıldığı üçünmü Rusiya Müdafiə Nazirliyi bu cür mövqe ortaya qoyur, yoxsa orada özbaşınalıqdır, kim nə cür istəyir o şəkildə də hərəkət edir? Rusiya Müdafiə Nazirliyində hansısa başqa qollar var, onlar təxribatla məşğul olur? Bunu aydınlaşdırmaq bir az çətindir. Amma Rusiyanın Xarici İşlər Nazirliyi ilə Rusiya Müdafiə Nazirliyinin məlumatlarını müqayisə edəndə Xarici İşlər Nazirliyi daha təmkinli, daha diplomatik və etiket normalarını gözləməklə ehtiyatla açıqlamalar verir. Amma Rusiya Müdafiə Nazirliyinin açıqlamaları tam kobud şəkildədir. “Dağlıq Qarabağ” ifadəsi işlədirlər. Azərbaycan da haqlı olaraq bunlara etiraz edir”.
O qeyd etdi ki, Rusiya Müdafiə Nazirliyinin davranışları, dezinformasiyaları nə üçtərəfli bəyanatın müddəalarına, nə də Rusiya ilə bağlanmış müttəfiqlik sazişinə uyğundur. A.Nağı deyir ki, sanki Rusiya Müdafiə Nazirliyi özbaşına fəaliyyət göstərən bir quruma çevrilib. A.Nağı deyir ki, Azərbaycan Müdafiə Nazirliyi Rusiya Müdafiə Nazirliyinin yaydığı dezinformasiyaya mövqe bilirib, məlumatın yalan olduğunu bəyan edib və heç bir dəyişikliyin baş vermədiyini, Fərrux yüksəkliyində də, Pirlər kəndində də Azərbaycanın öz yerində olduğunu açıqlayıb. “Azərbaycan Müdafiə Nazirliyi birmənalı olaraq bəyan edib ki, Azərbaycan Fərrux yüksıkliyindən geri çəkilməyib. Azərbaycan aydın şəkildə öz mövqeyini ortaya qoyur. Biz bu informasiya müharibəsində Azərbaycan Müdafiə Naizrliyinin verdiyi informasiyaları əsas götürməliyik. Bəzən görürük ki, sosial şəbəkələrdə müəyyən siyasilər, partiya rəhbərləri, “blogerlər” Rusiya və Ermənistanın yaydığı dezinformasiyanı, yalan məlumatları əsas götürüb qərəzli açıqlamalar verirlər, nəticələr çıxarmağa çalışırlar, ittihamlar səsləndirirlər. Amma əslində müharibə dövründə hər bir vətənpərvər insan öz ölkəsinin, öz dövlət qurumlarının verdiyi informasiyaları əsas tutmalıdır. Biz də bunu əsas tuturuq və hesab edirik ki, Azərbaycan rəsmi qurumlarının verdiyi məlumatlar həqiqətə uyğundur, ona uyğun da mövqe tutmalıyıq”.
A.Nağının sözlərinə görə, Ermənistan mediasını da izləyir və bu ölkənin mediası da məcburiyyət qarşısında qalaraq həqiqəti etiraf edir ki, Azərbaycan ordusu mövqelərindən geri çəkilməyib, bu da reallığı əks etdirir. “Baxmayaraq ki, Rusiya Müdafiə Nazirliyi əsassız, real olmayan, saxta məlumatlar yayır, amma Ermənistan mətbuatı reallığı demək məcburiyyətində qaldığından Azərbaycanın Fərrux yüksəkliyində öz mövqelərində qaldığını etiraf edir.
Rusiya Müdafiə Nazirliyinin yalan informasiya yaymasının müxtəlif səbəbləri var, burada onların öz xüsusi məqsədlərinin olması istisna deyil. Hesab edirəm ki, Rusiya rəhbərliyi Azərbaycanın haqlı mövqeyini qəbul edir, reallığı bilir, sadəcə olaraq Ermənistanın yanında tamamilə nüfuzdan düşməmək, “sifətini” qoruyub saxlamaq üçün dezinformasiyalar, yanlış məlumatlar verir. Eyni zamanda Rusiya ağır vəziyyətdədir, Ukraynada uğursuzluğa düçar olub, istədiyi nəticələrə nail ola bilmir, dünyanın qəzəbi də onun üstündədir. Belə bir şəraitdə Rusiya Qarabağda da uğursuzluğunu etiraf edərsə bunu həzm edə bilməzlər. Bu da ola bilər. Digər tərəfdən, Rusiya Müdafiə Nazirliyi Ermənistan cəmiyyətini, rəhbərliyini bir qədər arxayınlaşdırmaq, sakitləşdirmək üçün bu cür dezinformasiya yaya bilər. Üçüncü versiya da odur ki, onlar reallığı başa düşürlər və Azərbaycanın haqlı olduğunu bilirlər, sadəcə olaraq bu ifadələri işlətməklə “Azərbaycanın mövqeyini qəbul edirik, Azərbaycan haqlıdır, amma bunu deyə bilmirik” demək istəyirlər. Siyasətdə belə məsələlər də olur, “mane olmuruq, amma mane olmadığımızı açıq şəkildə deyə bilmirik”. Hesab edirəm ki, istənilən halda Azərbaycan vəziyyətdən nəticə ilə çıxır. Ağır şəraitdir, mürəkkəb vəziyyət ortadadır. Belə bir şəraitdə həm diplomatik, həm də hərbi cəbhədə, sahədə çox incəliklə hədəfə doğru getmək lazımdır. Azərbaycan da hədəfə doğru gedir, bunu Rusiya da görür, razılaşır, sadəcə olaraq hələlik onu etiraf edə bilmir” - deyə A.Nağı əlavə etdi.
İradə SARIYEVA
