Son günlər Azərbaycanın Qarabağdakı separatçılara qarşı atdığı sərt addımların fonunda olduqca qəribə beynəlxalq reaksiya müşahidə olunmaqadır. Ən qəribəsi isə budur ki, hazırda Ukraynadakı müharibəyə görə bir-birilə barışmaz mövqedə olan, hətta demək olar düşmənçilik edən ölkələr Qarabağda baş verənlərlə bağlı Ermənistanın mövqeyini dəstəkləyən vahid mövqe ortaya qoyurlar.
Məsələn, ABŞ Dövlət Departamentinin mətbuat xidməti rəhbərinin müavini Calina Porter KİV nümayəndələri ilə görüşü zamanı Azərbaycanın Qarabağ bölgəsi ilə bağlı ermənilərin mövqeyini müdafiə edən fikirlər səsləndirib. Azərbaycan tərəfi səslənən hər bir fikrə rəsmi etiraz mövqeyini açıqlayıb. ABŞ-ın bu mövqeyinə Fransa və Rusiya da həmfikirlik edir.
Hazırda düşmən mövqeyində olan ölkələrin Qarabağla bağlı nümayiş etdirdikləri bu həmrəyliyin mahiyyətini necə anlamaq olar?
Politoloq Rəşad Bayramov “Bakı-Xəbər”ə açıqlamasında bildirdi ki, bu məsələdə məqsəd aydındır: “Hər üç ölkə ATƏT-in Minsk Qrupunun həmsədridir. Onların hər biri çalışır ki, Qarabağdakı ermənilərə “status” verilsin. Azərbaycan tərəfi bununla bağlı fikrini konkret ifadə edib ki, statusdan söhbət belə gedə bilməz. Müharibədən sonra baş verənlərdən görünür ki, Minsk Qrupunu yenidən diriltmək Ermənistanın tam marağındadır. Azərbaycan bugünkü vəziyyətdə ATƏT-in Minsk Qrupundan tam imtina etməlidir. Minsk Qrupunun bölgəyə qayıdışı Azərbaycanın ziyanınadır. Artıq belə bir münaqişə yoxdur, biz ərazilərimizi işğaldan azad etmişik, ATƏT-in Minsk Qrupunun vasitəçiliyinə nə ehtiyacımız var? Həmin ölkələr yenidən bölgədə münaqişəni qızışdırmağa, münaqişə ocağını alovlandırmağa, yenidən ermənilərin xeyrinə status məsələsini, cürbəcür məsələləri ortaya atmağa çalışırlar. Azərbaycan 44 günlük müharibə zamanı Ermənistan tərəfindən işğal olunmuş torpaqlarını azad etdiyinə görə artıq vasitəçiyə ehtiyac qalmayıb. Onlar 30 il mənasız danışıqlar aparıblar, heç bir nəticə olmayıb. Dağlıq Qarabağ termini də artıq yoxdur, Qarabağ, Şərqi Zəngəzur termini var. İndi Rusiya vasitəçilik edir və onun vasitəçiliyi ilə müəyyən məsələlər həll oluna bilər, üçtərəfli komissiya da var. Ancaq bu məsələyə yenə Fransa və ABŞ-ı qatmağın heç bir mənası yoxdur. Azərbaycanın bu mövqeyi qətidir. Bu ölkələr ayrı-ayrılıqda ermənilərin xeyrinə olan mövqe ifadə etsələr də, biz mövqeyimizdən geri çəkilməyəcəyik. Azərbaycan öz ərazi bütövlüyünü tam təmin etmək üçün bütün maneələri aradan qaldırmaq əzmini ortaya qoyub. Bu yöndə hamılıqla dövlətimizin yanında olmalıyıq”.
Məhəmmədəli QƏRİBLİ
