Məhz Ermənistan post münaqişə mərhələsində Azərbaycana qarşı açıq ərazi iddialarını davam etdirir və bunu, o cümlədən XİN səviyyəsində Azərbaycanın Qarabağ bölgəsi ilə bağlı verdiyi hər bir açıqlamasında gündəmə gətirir.
Bu fikirlər Xarici İşlər Nazirliyinin Mətbuat xidməti idarəsinin Ermənistan XİN-in Azərbaycanın Qarabağ bölgəsindəki vəziyyətlə bağlı 28 mart 2022-ci il tarixli əsassız bəyanatına dair şərhində bildirilib. Qeyd edilib ki, Ermənistan bəyanatın 6-cı maddəsini pozaraq, Laçın dəhlizi vasitəsilə hərbçilərin bölgəyə göndərilməsini davam etdirir. Bu fakt beynəlxalq media tərəfindən də öz təsdiqini tapıb: “Xüsusilə vurğulamaq istərdik ki, Azərbaycanın tərəfinin tələbi ölkənin Qarabağ bölgəsində yaşayan erməni əsilli vətəndaşlarına yox, məhz üçtərəfli bəyanatla nəzərdə tutulduğu kimi, qanunsuz erməni hərbi birləşmələrinin qalıqlarının bölgədən çıxarılmasına aiddir. Ermənistan XİN-in bu məsələni məqsədli şəkildə təhrif edərək “etnik təmizləmə” adı altında təqdim etməyə çalışması Ermənistanın əsl niyyətini ifşa edir”.
Göründüyü kimi, Azərbaycan tərəfi rəsmən bəyan edir ki, Ermənistan nəinki öz silahlılarını Qarabağdan çıxarır, əksinə, ora əlavə qoşun göndərməkdə davam edir. Bütün bunlar Rusiya sülhməramlılarının nəzarətində olan Laçın dəhlizi vasitəsilə həyata keçirilir.
Hərbi ekspert Ramil Məmmədli “Bakı-Xəbər”ə bildirdi ki, bölgədə gərginlik Ermənistanın və sülhməramlıların üzərlərinə götürdükləri öhdəlikləri yerinə yetirməməsi səbəbindən qalır: “Azərbaycanı narahat edən məsələlər hələ də açıq qalır. Onlardan biri erməni separatçıların və silahlı dəstə komandirlərinin Xocalı, Xocavənd, Əsgəran, Ağdərə ərazilərində yerləşməsidir. Onlar davamlı olaraq Azərbaycan əleyhinə fikirlər səsləndirirlər. Digər tərəfdən, ermənilərin silahlı tör-töküntüləri və sülhməramlılar 10 noyabrdan bəri gözləntiləri tam yerinə yetirməyiblər”.
Hərbi ekspertin fikrincə, hazırda ermənilərin hərbi əməliyyatlara başlaması, yenidən ərazilərimizi işğal etmək cəhdi real görünmür, Ermənistanın hərbi gücü buna imkan vermir: “Amma onlar gələcəkdə hərbi imkanlarını möhkəmləndirərsə, onda Azərbaycana qarşı təhdidlər başlanması istisna deyil. Çünki ermənilər o ərazilərin, xüsusən Şuşa, Hadrut və Ağdərə istiqamətində ərazilərin itirilməsi ilə barışa bilmirlər. Yalnız Zəngəzur dəhlizi təhvil verildikdən sonra müharibənin başlanmayacağını əminliklə söyləmək olar. Əks təqdirdə Ermənistanın hazırda sülhə tam kökləndiyini demək çətindir”.
Ekspertin sözlərinə görə, gərginliyin əsas səbəbkarı münaqişənin həllində vasitəçilik missiyasını yerinə yetirməli olan Rusiyadır: “Bu ölkə “ sülhməramlı” kontingentinin orada qalma müddətinin uzadılması məqsədilə ümumi gərginliyə rəvac verən addımlar atır. Rusiya münaqişənin ədalətli həllinə dəstək verməyə çalışmalı, ərazidə olan sülhməramlı missiyanın üzərinə düşən öhdəliklər yerinə yetirilməli, ən əsası isə, 2020-ci il noyabrın 10-da imzanlanan üçtərəfli Bəyanatın dördüncü bəndinə əsasən erməni silahlı birləşmələri tərkisilah edilməli idi. Ümumiyyətlə, həmin ərazidə hər hansı silahlı birləşmə olmasının qarşısı alınmalı idi. Bunun əksi həyata keçirildi. Hətta Laçın dəhlizi vasitəsilə Ermənistandan Qarabağa silah və yeni hərbi qüvvələrin göndərilməsinə şərait yaradırlar”.
Məhəmmədəli QƏRİBLİ
