“Financial Times” qəzetinin yaydığı məlumata görə, ABŞ Rusiyaya qarşı sanksiyalardan yayınmağa kömək edən ölkələrə də sanksiya tətbiq edə bilər. Nəşr bildirib ki, ilk növbədə Hindistan, Çin, Səudiyyə Ərəbistanı, Birləşmiş Ərəb Əmirlikləri və Ermənistan sanksiyalara məruz qala bilər.
Mətbuatda qeyd edilənə görə, bundan əvvəl ABŞ Prezidentinin milli təhlükəsizlik məsələləri üzrə müşaviri Ceyk Sallivan Rusiyaya sanksiyalardan yayınmağa yardım edəcək ölkələrə sanksiya tətbiq olunacağı barədə xəbərdarlıq etmişdi.
“ABŞ ədalətli davranarsa, Ermənistan da Rusiyaya hərtərəfli dəstək göstərən ölkələrdən biri kimi sanksiyalara məruz qalacaq...”
“Müasir İnkişaf” Birliyinin sədri, siyasi şərhçi Mübariz Göyüşlü bizimlə söhbətində bildirdi ki, Ermənistana bütün hallarda ciddi sanksiyalar tətbiq edilməlidir. M.Göyüşlü hesab edir ki, Ermənistanın ABŞ tərəfindən sanksiyalara məruz qoyulacağı o qədər də inandırıcı görsənmir: “ABŞ-ın Rusiyaya kömək etdiyi üçün Ermənistana qarşı sanksiya tətbiq edəcəyi o qədər də inandırıcı görünmür. Çünki biz illərdir ABŞ-ı Ermənistanın himayəçilərindən biri kimi görürük, ABŞ ATƏT-in Minsk qrupunun həmsədri kimi hər zaman Ermənistanın mövqeyini müdafiə edib, Azərbaycana qarşı ikili standartlar, qadağalar sərgiləyib. Bu ölkə Azərbaycana qadağalar, məhdudiyyətlər tətbiq edib, amma cinayətkar Ermənistanı himayə edib. Biz bunun həmişə şahidi olmuşuq. Yəni ABŞ-dakı erməni lobbisinin təpkisi, yaxud xahiş-minnəti sayəsində ABŞ heç vaxt Ermənistana “gözün üstə qaşın var” deməyib. Erməni lobbisi ABŞ-ın Ermənistanla bağlı dövlət siyasətinə hər zaman təsir göstərir, əsasən də buna nail olurlar. Bunu 907-ci Düzəlişdən tutmuş digər məqamlara qədər görmək olar. ABŞ illərlə Azərbaycan ərazilərini işğalda saxlayan Ermənisana, Qarabağdakı separatçılara yardım göstərib. Yəni hər zaman Ermənistanı dəstəkləyən, onun arxasında duran ABŞ-ın ona qarşı sanksiyalar tətbiq edəcəyi şübhəli görsənir. Amma bütün hallarda Ermənistanın Rusiyaya hərtərəfli dəstəyi göz önündədir. Ermənistan Rusiya tərəfindən Ukraynaya qarşı döyüşmək üçün “könüllülər” göndərib, dünən isə öz qırıcı təyyarələrini Rusiyanın ixtiyarına verib. Ermənistan qırıcı təyyarələrini Rusiyaya kömək üçün göndərib, bu da Ermənistanın Rusiyanın hərbi aqressiyasına, təcavüzünə açıq dəstək göstərdiyinin ifadəsidir”.
Ermənistanın Rusiyaya başqa cür də yardımlar etdiyini qeyd edən M.Göyüşlü hesab edir ki, ABŞ ədalətli olduğunu göstərmək istəyirsə bu ölkəyə qarşı açıq sanksiyalar tətbiq etsin və Ermənistan cəzasını alsın. M.Göyüşlü deyir ki, Ermənistan ac-yalavac ölkədir, amma buna baxmayaraq, öz tərəfini artıq bəlli edib: “Ermənistan, özünün ehtiyac içində olmasına baxmayaraq, Rusiyaya göstərdiyi açıq dəstəklə, eyni zamanda onu beynəlxalq sanksiyalardan yayındırmaq üçün atdığı addımlarla səfini bəlli edib, Rusiyanı seçdiyini göstərib. Ermənistan özünü Rusiya tərəfdarı kimi göstərir. Uzun müddət ikibaşlı oyun oynayan, çoxüzlü siyasət aparan Ermənistan özünü Qərbpərəst kimi göstərsə də, əslində gözdən pərdə asırmış. Bir məqamı da qeyd edim ki, Ermənistan ABŞ-ın, Avropadakı himayədarlarının sözünü heçə saymaqla özü özünü çıxılmaz dalana salıb. Amma gerçəkdən ABŞ Ermənistana sanksiyalar tətbiq edəcəkmi, yoxsa sakitcə qulağını burub, “ağıllı ol” deməklə kifayətlənəcək? Məsələ budur. Hesab edirəm ki, ABŞ ədalətli olduğunu sübut etmək üçün Ermənistana böyük dərs verməlidir. O zaman deyərik ki, ABŞ obyektivdir. Əgər ABŞ ədalətli davranarsa, Ermənistan da Rusiyaya hərtərəfli dəstək göstərən ölkələrdən biri kimi sanksiyalara məruz qalacaq, yox, yenə də ikili standartlar, erməni lobbisinin canfəşanlığı işə düşəcəksə, onda Ermənistan yayınacaq. Mənə elə gəlir ki, ABŞ Ermənistana qarşı siyasətinə yenidən baxmalıdır, indiyə qədər Azərbaycana qarşı sərgilədiyi ədalətsiz mövqe barədə düşünməlidir”.
M.Göyüşlü qeyd etdi ki, Ermənistanın bu vəziyyətə düşməsinin səbəbi onun hələ də müstəqil siyasət yürüdə bilməməsidir. Qurum sədrinin sözlərinə görə, amma Azərbaycan müstəqil siyasət yürüdür, Ukraynaya humanitar dəstək göstərir, müharibənin tezliklə başa çatması, tez bir zamanda sülhün əldə olunması üçün çalışır, təşəbbüslər irəli sürür, Ermənistan isə müharibənin alovlanması üçün nə lazımdırsa edir. “Bütün bunlardan sonra ABŞ-ın Ermənistana sanksiya tətbiq etməməsi onun ermənipərəst bir ölkə olduğunun və qeyri-obyektivliyinin göstəricisi olacaq. ABŞ Ermənistanı cəzasız qoymamalıdır”- deyə M.Göyüşlü qeyd etdi.
İradə SARIYEVA
