Rusiyanın Azərbaycan mediasına qərəzli münasibəti davam edir. Nəticədə Rusiyada Azərbaycana məxsus bir neçə xəbər saytına giriş məhdudlaşdırılıb. Xatırlaqtmaq yerinə düşər ki, Rusiyada da kifayət qədər Azərbaycanın mənafeyinə zidd məlumatlar yayan informasiya resursları var.
Buna baxmayaraq, biz söz azadlığı və prülarizmi rəhbər tutaraq həmin saytları bloklamamışıq. Ancaq görünən budur ki, Rusiyanın son addımı həm Azərbaycanın rəsmi dairələrində, həm də media cameəsində narahatlıqla qarşılanıb. Rəqəmsal İnkişaf və Nəqliyyat Nazirliyinin Elektron Təhlükəsizlik Xidmətindən (ETX) bildirilib ki, Azərbaycanın mənafeyinə, ərazi bütövlüyünə zidd məlumatlar yayımlayan veb-saytların fəaliyyəti ilə bağlı müvafiq tədbirlər həyata keçirilə bilər.
Bu barədə Azərbaycanın bəzi saytlarına Rusiyada tətbiq edilən məhdudiyyətlər fonunda qarşı tərəfə münasibətdə adekvat addımların atılmasının mümkünlüyü barədə sorğuya cavab olaraq bildirilib.
Qeyd olunub ki, ölkə daxilində və xaricində hər hansı saytın fəaliyyətinin məhdudlaşdırılması məsələsi Azərbaycan qanunvericiliyi ilə tənzimlənir: “Belə ki, həmin resurslarda ölkənin mənafeyinə, ərazi bütövlüyünə zidd, qanunvericiliyinə uyğun olmayan məlumatlar yayımlanarsa, həmin saytların fəaliyyəti ilə bağlı müvafiq tədbirlər həyata keçirilə bilər".
Bununla bağlı həm mediada, həm də ümumilikdə cəmiyyətimizdə narahatlıq var
Azərbaycan Mətbuat Şurası da Azərbaycanın bir sıra internet medialarının Rusiyada yayımının məhdudlaşdırılması ilə bağlı bəyanat yayıb.
Bildirilir ki, Rusiya tərəfindən söz və ifadə azadlığına, plüralizmə aşkar sayğısızlıq törədilir: “Bu, beynəlxalq miqyasda qəbul edilmiş prinsip və normalara, bəşəri dəyərlərə etinasız yanaşmadır. Bu, eyni zamanda, Rusiya cəmiyyətinin obyektiv məlumat almaq, alternativ fikirlə tanış olaraq düzgün nəticəyə gəlmək hüququnun məhdudlaşdırılmasıdır…”
Mətbuat Şurası hesab edir ki, Rusiyanın Azərbaycan KİV-lərinə belə yanaşması iki ölkə arasındakı münasibətlərə, Rusiya və Azərbaycan xalqlarının tarixən formalaşmış dostluq və əməkdaşlıq ənənələrinə, informasiya mübadiləsi prosesinə hörmətsizlikdir.
Azərbaycan Demokratik Jurnalistlər Liqasının sədri Yadigar Məmmədli isə deyib ki, artıq üçüncü dəfədir ki, Azərbaycan saytları Rusiyada bloklanır. Təbii ki, bu, yolverilməz bir haldır. Bununla bağlı həm mediada, həm də ümumilikdə cəmiyyətimizdə narahatlıq var. Onun sözlərinə görə, Mətbuat Şurası da bəyanat yayıb ki, belə hallar olmamalıdır: "Azərbaycan dövləti və mediası Rusiya-Ukrayna müharibəsində ədalətli mövqeni üstün tutur. Çünki, Azərbaycanın da bəzi əraziləri 30 il ərzində işğal altında olub. Ona görə də cəmiyyətin əksər çoxluğu Rusiyanın bu siyasətinə qarşıdır. Eyni zamanda, müharibənin həm cəmiyyətə, həm də dövlətə gətirdiyi fəsadlarını bilirik. Azərbaycan saytları Ukraynada baş verən hadisələrə obyektiv mövqedən yanaşır. Təəssüf ki, Rusiya dövləti obyektiv məlumatın yayılmasında maraqlı olmadığı üçün ölkədə Azərbaycan saytlarının fəaliyyətinin qarşısını alır. Ən azından söz və mətbuat azadlığı, cəmiyyətin düzgün informasiya əldə etmək hüququ var ki, Rusiya buna qarşı çıxır. Azərbaycan dövləti bunu qətiyyətlə pisləyir. Rusiya Azərbaycan saytlarına məhdudiyyət qoymaqla heç nə əldə etməyəcək".
Rusiya kanallarının bəziləri elə birbaşa ermənilərə aiddir...
Əməkdar jurnalist Azər Həsrət Rusiyanın Azərbaycana aid bəzi media qurumlarını bloklamasına münasibətində deyib ki, Rusiya Azərbaycanın ən adi internet mediasına da dözmək istəmir: “Bir neçə rusdilli internet saytımız Rusiyada bloklanıb. Özü də dövlət səviyyəsində. Rusiya dövləti deyir ki, bu saytlar anti-Rusiya informasiyaları yayır, ona görə olmaz.
Onda biz niyə anti-Azərbaycan fəaliyyəti ilə illərdir məşğul olan Rusiya mediasına gen-bol meydan veririk?
Azərbaycan kabel yayımçıları ucdantutma Rusiya kanallarını paketə əlavə edir. Özü də o kanalların hamısı anti-Azərbaycan təbliğatıyla məşğul olur. Açıq şəkildə. Bizim vətəndaşımız da cibinin pulunu verərək illərdir o TV kanallarına baxır ki, Azərbaycanda hansısa kabel yayımçısı buna görə pul qazanacaq? Hələ onu da əlavə edim ki, o paketlərdəki Rusiya kanallarının bəziləri elə birbaşa ermənilərə aiddir...”
Görünən budur ki, Rusiyanın informasiya resursları zaman-zaman Azərbaycanın əleyhinə fəaliyyət göstərib, anti-Azərbaycan siyasəti yeridib. Ərazi bütövlüyümüzü sual altına almağa çalışıb, daxildə müxtəlif münaqişə ocaqları yaratmaq həvəsində, istəyində olublar. 44 günlük Vətən savaşında Rusiyanın bir sıra kütləvi informasiya vasitəsinin ədalətsiz, peşə prinsiplərindən kənar fəaliyyəti göz önündədir. Rusiyanın bu davranışı insanların alternativ informasiya mənbələrindən məhrum olunması deməkdir. Bu barədə Azərbaycan jurnalist təşkilatları insan hüquq və azadlığı qurumlarını, beynəlxalq media mərkəzlərini məlumatlandırmalı və etirazlarını bildirməlidirlər. Biz söz azadlığına göstərdiyimiz sayğıya görə bir qədər dözümlü olmuşuq. Rusiya buna məhəl qoymursa, adekvat addımlar atmalıyıq.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
