Ermənistandan havaya qalxan Su-30 tipli 4 döyüş təyyarəsi Ukraynada istifadə olunmaq üçün Rusiyaya gedib. Üstəlik, xüsusi təlim keçmiş erməni pilotlar Rusiya istehsalı olan qırıcılardan istifadə edirlər. Ermənistan bu addımı ilə Ukraynadakı işğala ortaq olub və müharibənin tərəfinə çevrilib.
Bütün bunlar onu deməyə əsas verir ki, Ermənistan Ukraynaya qarşı aparılan hərbi əməliyyatlara qoşuldu. Bütün dünya Belarusun müharibəyə qoşulacağın güman etsə də, Ermənistan onu qabaqladı və qarşıdurmanın iştirakçısına çevrildi. Bu isə Ermənistanın ABŞ maraqlarına qarşı getməsi deməkdir. Güman etmək olar ki, bu gün Ukraynanın şəhərlərinin, infrastrukturunun dağıdılmasında Ermənistanın da "töhfələri" var. Çünki günlərdir Ukrayna aramsız bonbalanır. Azırbaycandan aldığı zərbə Paşinyan hakimiyyətinə yetmədi, Ermənistan rəhbəri indi öz ölkəsini ciddi zərbə altına qoydu. Bu əslində Ermənistanın Birləşmiş Ştatların maraqlarına qarşı getməsi deməkdir. Bundan əvvəl də Ermənistanın Ukraynada vuruşmaq üçün Suriyadan gətirilən yaraqlıların döyüş zonasına göndərilməsində rol aldığı bildirildi. Suriyadan gələn yaraqlılar Ermənistana gətirildi, ondan sonra Rusiyaya yönəldildi.
Maraqlıdır, Rusiyaya hərbi, iqtisadi və digər yardım göstərən istənilən ölkəyə qarşı ciddi tədbirlər görüləcəyini bəyan edən ABŞ, Qərb ölkələri Ermənistanın bu addımına reaksiya verəcəklərmi? Bu ölkəyə də sanksiyalar tətbiq olunacaqmı?
“İnanmaq çətindir ki, ABŞ buna görə erməniləri sərt cəzalandırsın”
Məsələyə münasibət bidirən AMİP funksioneri Əli Orucovun fikrincə, bu, Birləşmiş Ştatların nə dərəcədə səmimi olacağından asılı olacaq: “Prinsipcə, ABŞ bununla bağlı Ermənistana sərt təpki göstərməlidir. Ancaq Vaşinqton çox vaxt Ermənistanın etdiklərini görməzdən gəlir. ABŞ Konqresi erməni lobbisinin maraqlarına uyğun Ermənistana, Qarabağdakı separatçılara yardım ayırır. Ermənistanın terrora dəstək siyasətini görməzdən gəlir. Ermənistandakı siyasi qüvvələr Rusiyanın Ukraynada apardığı işğalçılıq müharibəsinə dəstək verirlər. Ancaq Birləşmiş Ştatlar bunları görməzdən gəlir. Bütün bunları görən Ermənistan açıq şəkildə Rusiyaya hərbi dəstək verir və ABŞ-dan çəkinmir. O üzdən inanmaq çətindir ki, ABŞ Ermənistanı buna görə sərt cəzalandırsın”.
Bir sözlə, partiya funksioneri ikili standartlar səbəbindən buna şübhə etdi.
Vidadi ORDAHALLI
