Rusiya Müdafiə Nazirliyinin Qarabağ iqtisadi rayonunun rus sülhməramlılarının müvəqqəti məsuliyyət zonası haqda məlum açıqlaması və orda işlədilən bəzi ifadələr beynəlxalq hüququn kobud şəkildə pozulması ilə yanaşı, həm də Azərbaycan və Rusiya arasında müttəfiqlik haqda 22 fevral 2022-ci il Moskva Bəyannaməsinə qəti şəkildə ziddir.
Rusiya Federasiyası Müdafiə Nazirliyinin sözügedən bülleteninin ilk cümləsindən Azərbaycan, Ermənistan və Rusiya arasında 2020-ci il noyabrın 10-da imzalanmış bəyanatın, eləcə də Azərbaycan Respublikası ilə Rusiya Federasiyası arasında 2022-ci il fevralın 22-də imzalanmış müttəfiqlik qarşılıqlı fəaliyyəti haqqında Bəyannamənin preambula hissəsi və müvafiq bəndləri kobud şəkildə pozulub. Sözügedən Bəyannamənin 1-ci bəndində qeyd olunur: “Rusiya Federasiyası və Azərbaycan Respublikası öz münasibətlərini müttəfiqlik qarşılıqlı fəaliyyəti, iki ölkənin müstəqilliyinə, dövlət suverenliyinə, ərazi bütövlüyünə və dövlət sərhədlərinin toxunulmazlığına qarşılıqlı hörmət, eləcə də bir-birinin daxili işlərinə qarışmamaq, hüquq bərabərliyi və qarşılıqlı fayda, mübahisələrin dinc yolla həlli və güc tətbiq etməmək və ya güclə hədələməmək prinsiplərinə sadiqlik əsasında qururlar”.
Bəyannamənin 11-ci bəndində isə bildirilir: “Rusiya Federasiyası və Azərbaycan Respublikası öz ərazilərində təşkilatların və şəxslərin digər Tərəfin dövlət suverenliyinə, müstəqilliyinə və ərazi bütövlüyünə qarşı yönəlmiş fəaliyyətinin qarşısını qətiyyətli surətdə alırlar”.
Eyni sənədin 18-ci bəndində deyilir: “Rusiya Federasiyası və Azərbaycan Respublikası beynəlxalq terrorçuluq, ekstremizm və separatçılıq təhdidlərinə, transmilli mütəşəkkil cinayətkarlığa, silahların, narkotik vasitələrin və onların prekursorlarının qanunsuz dövriyyəsinə, insan alveri və informasiya-kommunikasiya texnologiyaları sahəsində cinayətlərə, eləcə də digər yeni təhlükəsizlik çağırışlarına qarşı mübarizədə və onların neytrallaşdırılmasında səylərini birləşdirirlər. Bu kontekstdə Tərəflər məlumat mübadilə edir və qeyd edilən hüquqazidd fəaliyyətlərin maliyyələşdirilməsi mənbələrinin müəyyən edilməsi və qarşısının alınmasında sıx qarşılıqlı fəaliyyət göstərirlər”.
Azərbaycan ərazisində müvəqqəti müşahidə missiyası həyata keçirən Rusiya sülhməramlıları erməni hərbi birləşmələrinin ölkəmizin ərazisindən çıxarılması ilə bağlı öhdəliklərinə əməl etmək əvəzinə, qanunsuz hərbi birləşmələri "Dağlıq Qarabağ silahlı birləşmələri” kimi təqdim edirlər ki, bu da Azərbaycanla Rusiya arasında və Azərbaycanla Ermənistan arasında Rusiyanın iştirakı ilə imzalanmış bəyannamə və bəyanatların müvafiq müddəalarının kobud şəkildə pozulması, separatizmin stimullaşdırılması və təşviq edilməsi anlamına gəlir.
Cümhüriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, Azərbaycan ordusunun qanunsuz erməni silahlı birləşmələrinə qarşı keçirdiyi əməliyyatlar çoxlarını narahat etməyə başlayıb: “Azərbaycanın ərazi bütövlüyünün bərpası ilə bağlı atdığı ciddi addımlara verilən xarici reaksiyalar qərəzlidir və bağlanan müqavilələrin ruhuna tam ziddir. Xüsusilə də Rusiya həm üçtərəfli Bəyanatdan, həm də müttəfiqlik haqda sazişdən irəli hələn öhdəlikləri yerinə yetirmədiyi üçün Azərbaycan analoji addımları atmağa məcburdur. Sülhməramlıların borcudur ki, Azərbaycan ərazisində qalan erməni silahlı birləşmələrinin qalıqlarını oradan çıxarsın. Ancaq biz fərqli mövqenin şahidi oluruq. Azərbaycanın bu işi öz öhdəsinə götürməsi onları narahat edir. Buna görə də, erməniləri müdafiə edən bəyanatla çıxış edirlər. Rusiya müttəfiqlik münasibətlərinə uyğun şəkildə davranışlar ortaya qoymalıdır. Biz görürük ki, Rusiya açıq şəkildə xristian təəssübkeşliyindən qaynaqlanan mövqe ortaya qoyur. Heç bir dövlətin Azərbaycanın daxili işlərinə qarışmasına imkan verməməliyik. 30 il gözlədik ki, bu məsələni beynəlxalq birlik həll etsin, əvəzində heç bir nəticənin şahidi olmadıq. Bu periodda hamılıqla dövlətimizin yanında olmalıyıq. Rusiya tərəfi üzərinə götürdüyü öhdəliyi pozursa, Azərbaycan da öz üzərinə düşəni etməlidir. Onlar bundan sonra da öhdəliklərinə əməl etməyəcək”.
Məhəmmədəli QƏRİBLİ
