Məlum olduğu kimi, Bakıda fəaliyyət göstərən "Azadlıq Radiosu" bağlanıb. Ən maraqlısı odur ki, müəyyən xarici dairələr bundan şou düzəltməyə çalışır. Bunu elə qələmə verməyə çalışırlar ki, guya bu, demokratiyanın, insan hüquqlarının məhdudlaşdırılmasıdır. Ancaq əslində bu belə deyil.
Burada sözügedən məsələlərdən söhbət gedə bilməz. Sadəcə olaraq Azərbaycan hüquq-mühafizə orqanlarının əməkdaşları müvafiq qanuna uyğun olaraq redaksiyada axtarış aparıblar. Həmçinin, qanunun tələblərindən irəli gəldiyi üçün redaksiyanın bəzi avadanlığı müsadirə edilib və qapıları möhürlənib. Yəni bütün bunların hər biri heç bir kobudluq olmadan, qanun çərçivəsində baş verib və hücumdan söhbət gedə bilməz. Azərbaycan müstəqil dövlətdir, hansısa radio qanunun tələblərinə cavab vermirsə, təbii ki, ona qarşı müvafiq tədbirlər görülə bilər. Dünyanın istənilən ölkəsində bu belədir.
Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Mirzəzadənin sözlərinə görə, bəzi dairələr ucuz populizm dalınca qaçır: "Əvvəla "Azadlıq Radiosu"nun fəaliyyəti birdəfəlik dayandırılmayıb. İşin tədqiqi ilə bağlı müəyyən müddətə ofisin fəaliyyəti dayandırılıb. Hələ işin gedişatı, nəticəsi məlum olmadan işə qiymət verməyə çalışmaq, hesab edirəm ki, məsələni siyasiləşdirmək məqsədi daşıyır. Eyni zamanda, məsələ ilə bağlı mövqeyini zorla qəbul etdirməkdən başqa bir şey deyil. Nəzərə almaq lazımdır ki, Azərbaycan hüquqi dövlətdir və qanunlar hamı üçün eynidir. O cümlədən, "Azadlıq Radiosu" məsələsində də bu belədir".
