Vətən müharibəsinin başa çatmasından bir il dörd ay keçməsinə baxmayaraq, hələ də qanunsuz erməni silahlı dəstələri Qarabağda qalmaqdadır.
Baxmayaraq ki, qanunsuz silahlı dəstələrin hələ də ərazilərimizdən çıxarılmaması Rusiya prezidentinin, Azərbaycan prezidentinin və Ermənistanın baş nazirinin imzaladığı üçtərəfli bəyanata ziddir. Həm 2020-ci ilin 10 noyabr, həm də 2021-ci ilin 11 yanvar bəyanatlarında bu məsələ aydın şəkildə öz əksini tapsa da, bu gün də qanunsuz erməni silahlı dəstələri ərazilərimizdə mövcuddur və onlar tez-tez Azərbaycan ordusunun mövqelərini, azad edilmiş kəndlərimizi atəşə tuturlar. Bir sözlə, hər addımbaşı təxribat törədirlər. Təbii ki, bu halda da Azərbaycan ordusu öz üzərinə düşən vəzifəni yerinə yetirir. Azərbaycan Ordusunun son günlər qanunsuz erməni silahlı dəstələrinin ərazilərimizdən çıxarılması ilə bağlı həyata keçirdiyi tədbirləri erməni mediası ciddi şəkildə təhrif edir. Onlar belə yazılar tirajlayır ki, guya Azərbaycan ordusu o kəndlərdə yaşayan mülki erməniləri qovur. Əslində isə 10 noyabr bəyanatına əsaslanaraq tam qanun çərçivəsində ərazilərimizdən qanunsuz erməni silahlı birləşmələrini çıxarır. Yəni Azərbaycan Ordusu xəbərdarlıq edir ki, ərazidə olan silahlı ermənilər çıxarılsın, yalnız mülki ermənilərin qalması şərtilə kəndlər boşaldılsın. Ermənilər isə hər cür yalanlara, təxribatlara əl atırlar, yalandan məlumat yayırlar ki, guya hədəf mülki ermənilərdir.
“Erməni mediası tərəfindən qanunsuz erməni silahlı birləşmələrinin “mülki əhali” kimi qələmə verilməsi yolverilməzdir”
Siyasi ekspert Rövşən Rəsulov “Bakı-Xəbər”ə şərhində bildirdi ki, 10 noyabr 2020-ci ildə Azərbaycan, Rusiya və Ermənistan rəhbərləri arasında birgə üçtərəfli bəyanat imzalanıb, həmin bəyanatda qəbul olunan bəndlər tərəflərin qarşısına öhdəliklər və bu öhdəliklərin icrasını qoyub. “Lakin gördüyümüz kimi, üçtərəfli bəyanatın imzalanmasından bir ildən çox vaxt keçməsinə baxmayaraq, Ermənistan üzərinə düşən öhdəlikləri yerinə yetirmək istəmir. Xüsusən də 4-cü bəndlə bağlı öhdəliyi yerinə yetirməkdən yayınır. Bəyanatın 4-cü bəndində açıq göstərilir ki, qanunsuz erməni silahlı birləşmələri Azərbaycan ərazisi olan Qarabağdan çıxarılmalıdır. Rusiya sülhməramlılarının bu müddət ərzində öz işlərinə məsuliyyətsiz yanaşmalarının nəticəsidir ki, ermənilər bu əməllərindən əl çəkmirlər. Azərbaycan silahlı qüvvələrinin qanunsuz silahlı dəstələrə etdiyi çoxsaylı çağırışlara baxmayaraq, onlar öz təxribatlarını, qeyri-qanuni əməllərini davam etdirirlər. Rusiya sülhməramlılarının o qanunsuz silahlı dəstələrin əməllərinə göz yummasının nəticəsində Azərbaycan Ordusu qanunsuz erməni silahlı dəstələrinin, separatçıların ərazilərimizdən çıxarılması üçün əməli fəaliyyətə keçdi. Xatırladım ki, bir müddət əvvəl Bakıda Azərbaycan Müdafiə Nazirliyinin yüksək rütbəli zabitləri ilə Rusiya Müdafiə Nazirliyinin nümayəndələri, eləcə də Rusiya sülhməramlı kontingentinin təmsilçiləri arasında görüş keçirildi. Həmin görüşdə bilavasitə 4-cü bəndlə bağlı məsələ qaldırıldı və Azərbaycan tərəfi qarşı tərəfə bildirdi ki, öz suveren ərazilərində dislokasiyalar aparacaqlar. Bundan sonra isə Azərbaycanın müdafiə naziri Zakir Həsənovla Rusiyanın müdafiə naziri Şoyqu arasında telefon danışığı oldu və bu bir daha vurğulandı. Lakin təəssüf ki, Rusiya sülhməramlıları bu dəfə də bu məsələ ilə bağlı etinasızlıq sərgilədilər və nəticədə Azərbaycan Silahlı Qüvvələri öz əməli tədbirlərini həyata keçirməyə başladı”.
R.Rəsulovun sözlərinə görə, Fərrux yaşayış məntəqəsi (Fərrux yaşayış məntəqəsində təxminən 10-15 ev var, bundan artıq ev yoxdur-R.R), Fərrux dağının strateji əhəmiyyətə malik olan əraziləri, Daşbaşı yüksəkliyi erməni silahlılarından təmizləndi. “Azərbaycan Ordusu mülki erməniləri hədəfə almayıb, onları qovmur. Ordumuzun həyata keçirdiyi tədbirlərin birmənalı olaraq hədəfi qanunsuz erməni silahlı dəstələrini, separatçları Qarabağdan çıxarmaqdır. Mülki erməni əhalisinə qarşı heç bir addım atılmayıb, ordumuz qanunsuz silahlı dəstələrə qarşı addımlar atır. Ermənistanın rəsmi dairlərinin və mətbuatının yanlış məlumatları Qarabağdakı qanunsuz silahlı dəstələrin təxribatlarını pərdələməyə yönəlib. Erməni mediası tərəfindən qanunsuz erməni silahlı birləşmələrinin “mülki əhali” kimi qələmə verilməsi yolverilməzdir”.
R.Rəsulov burada Rusiyanın da təxribatlarına diqqət çəkdi: “Biz burada Rusiya sülhməramlılarının cəhdlərini də qeyd edə bilərik. Bu cəhdləri ki, o, xüsusən də Azərbaycanın müttəfiqi olan bir ölkənin qəbulolunmaz cəhdləri idi. Bildiyimiz kimi, Rusiya Müdafiə Nazirliyi Qarabağla bağlı bülletenində iki dəfə “Dağlıq Qarabağ” ifadəsi işlədib və bu sözü ortaya atıb. Halbuki, Azərbaycan Müdafiə Nazirliyi Rusiya Müdafiə Nazirliyinə dəfələrlə xəbərdarlıq edib ki, Azərbaycanda “Dağlıq Qarabağ” adlı ərazi vahidi mövcud deyil, Azərbaycanda Qarabağ regionu mövcuddur. Digər tərəfdən də Fərrux kəndinin adını erməniləşdirməsi, eyni zamanda Azərbaycanın atdığı addımlara qarşı maneələr törətmək cəhdləri və sair Rusiya sülhməramlılarının Qarabağdakı fəaliyyətilə bağlı suallar doğurur. Xüsusilə Ukrayna cəbhəsində uğradığı ağır və sarsıdıcı məğlubiyyətlərə rəğmən Rusiyanın hələ də Qarabağ regionunda öz mövqeyini qorumaq cəhdləri kənardan gülünc görünür. Artıq o da bəllidir ki, Qarabağdakı sülhməramlıların müəyyən birləşmələri Laçın dəhlizi vasitəsilə çıxarılmağa başlanıb. Düzdür, bu elə də böyükmiqyaslı tərketmə deyil. Lakin fakt budur ki, Rusiya ciddi şəkildə canlı qüvvə və texnikaya ehtiyac duyur. Bu baxımdan, Qarabağdakı sülhməramlı kontingentdən də Ukrayna cəbhəsində istifadə edilməyə başlayıb.
Əslində, Azərbaycan Ordusunun həyata keçirdiyi məlum əməliyyatlar yaxın gələcəkdə də baş verə bilər. Çünki bizim hələ qarşıda üçtərəfli bəyanata əsasən erməni separatçılarının, qanunsuz silahlı dəstələrinin çıxarılmalı olduğu ərazilərimiz var. Onların ərazilərimizdən çıxarılması üçün vaxt da, demək olar ki, daralıb. Son illərin əməliyyatları bu faktı da ortaya qoydu ki, Bakı nə Moskvanın, nə də İrəvanın qarşısında seyrçi mövqeyində dayanacaq və lazım gəldikcə qanunsuz silahlı dəstələrə qarşı hərbi əməliyyatlar keçirəcək. Rusiya bunu bilməlidir, eyni zamanda Rusiyanın Azərbaycanın müttəfiqi olduğunu unutmaması gərəkdir. Əgər unudarsa Azərbaycanın digər müttəfuqi Türkiyəni qarşısında görə bilər. Çünki Türkiyənin Azərbaycanla imzaladığı Şuşa Bəyannaməsi qüvvədədir, hər an bu Bəyannamə işə salına, qardaş Türkiyə ordusunun Azərbaycana dəstəyi istənilən vaxt baş verə bilər. Ola bilsin ki, kimlərsə bu sözün söz xatirinə deyildiyini düşünsün...”
R.Rəsulov hesab edir ki, proseslər məsələnin sakit yolla həllini diqtə etmir, çünki nə Ermənistan Azərbaycana qarşı ərazi iddialarından əl çəkmək fikrindədir, nə də Rusiya öz imzasına hörmət göstərir. Belə olduğu halda isə Azərbaycanın lazımı addımlar atacağını deyən siyasi ekspert qeyd etdi ki, Azərbaycan 30 ildən sonra bu addımı atıb və BMT-nin kağız üzərində qalan qətnamələrini icra edərək zəfər qazanıb: “Eləcə də bu məsələdə Azərbaycan addımlar atacaq. Yəni nə qədər ki, üçtərəfli bəyanatın mövcud bəndləri yerinə yetirilməyəcək, Azərbaycan həmin bəndlərin icrasını qısa müddətdə əməli şəkildə həyata keçirəcək”
İradə SARIYEVA
