Azərbaycan Dövlət Neft Şirkətinin (SOCAR) “Azəriqaz” İstehsalat Birliyi yaydığı məlumatda bildirib ki, ermənilərin yaşadığı Xankəndiyə təbii qazın verilişini təmin edəcək: “Martın 28-də Xankəndi və digər ətraf yaşayış məntəqələrinə təbii qazın verilməsi bərpa olunacaq və ilk növbədə test işləri həyata keçiriləcək. Bununla əlaqədar olaraq istehlakçılara təbii qazdan istifadə edən zaman diqqətli olmaq, texniki təhlükəsizlik qaydalarına ciddi riayət etmək tövsiyə edilir”.
“Azəriqaz”dan bildirilib ki, martın 29-da test yoxlamaları başa çatdırıldıqdan sonra Qarabağ iqtisadi rayonuna aid ərazidə təbii qazın verilməsi tam bərpa olunacaq: “Son günlər Qarabağ iqtisadi rayonuna aid ərazidə uzun illər texniki xidmət göstərilmədən istismar olunan qaz paylayıcı xətlərdəki nasazlıq qaz təchizatında problemlərin yaranmasına səbəb olub. Normadan artıq qarın yağmasına baxmayaraq, “Azəriqaz” İB-nin əraziyə ezam olunmuş əməkdaşları çətin relyefli ərazidə qəzanın nəticələrinin aradan qaldırılması istiqamətində zəruri tədbirlər görürlər”.
Göründüyü kimi, həm SOCAR, həm “Azəriqaz”, bütün olanlara rəğmən, Qarabağın ermənilər yaşayan ərazilərinə qazın nəqlini bərpa edəcəyini elan edib. Bəllidir ki, Xankəndidə yaşayan ermənilər Azərbaycan vətəndaşlığını qəbul etmək istəmir. Bir sözlə, hələ ki, Xankəndidə Azərbaycanın yurisdiksiyası bərpa edilməyib.
Deməli, istehlakın əvəzində Azərbaycana hər hansı ödəniş edilməyəcək ki, bu da dünyada qəbul olunan qayda deyil. Belə olan təqdirdə, “Azəriqaz”ın Xankəndidəki erməniləri qazla təmin etməsi doğrudurmu?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, “Azəriqaz”ın bununla bağlı verdiyi bəyanat ermənilər tətəfindən də ciddi şübhə ilə qarşılanıb: “Çünki indiyə qədər Xankəndi və ətraf məntəqələrin qaz təminatını Ermənistan edib. Çox təəssüf ki, “Azəriqaz”ın bu addımı ilə bağlı ətraflı rəsmi açıqlama verilməyib. Mən hesab edirəm ki, həmin ərazilər bizə aid olduğu üçün onların qaza olan tələbini təmin etməliyik. Ancaq bunun nə cür həyata keçiriləcəyi ilə bağlı əlavə izahata ehtiyac var. Belə bir bəyanat verilibsə, çox güman ki, Xankəndiyə indiyə kimi qaz verən “Qazprom”la razılaşdırılıb. Bunu etmədən, “Azəriqaz”ın addımını mümkünsüz sayıram. “Qazprom Ermənistan”ın özü Rusiyadan alınan qaza möhtacdır. Yəqin ki, məsələnin ödənişlə bağlı tərəfi də müzakirə edilib. Azərbaycanın müstəqilliyinin bərpası belə addım-addım təmin edilməlidir. Ümid edirəm ki, bununla bağlı “Azəriqaz” daha detallı məlumat verəcək”.
Maraqlıdır ki, separatçılar Azərbaycan qazının Xankəndiyə verilməsinə etiraz edir.
“Azərbaycan Dövlət Neft Şirkəti SOCAR və ya onun törəmə şirkəti “Azəriqaz”ın “artsax respublikası”na qaz tədarükü prosesi ilə heç bir əlaqəsi ola bilməz”. Bu barədə “artsaxqaz” şirkətindən bildirilib.
Məhəmmədəli QƏRİBLİ
