Xəbər verildiyi kimi, Rusiyanın Rabitə, İnformasiya Texnologiyaları və Kütləvi İnformasiya Vasitələrinə Nəzarət Federal Xidməti (“Roskomnadzor”) oxu.az saytını ölkə ərazisində bloklayıb.
Saytın bununla bağlı açıqlamasında mətbuat orqanının redaksiyasına heç bir məlumat, xəbərdarlıq edilmədən belə bir qərar verdiyi bildirilir. Qeyd olunur ki, bu birbaşa söz azadlığına, demokratiyaya, plüralizmə ziddir və “Roskomnadzor”un bu addımı qərəzli və qanunsuzdur.
Qeyd edək ki, bundan əvvəl haqqin.az və minval.az saytları da Rusiya ərazisində bloklanıb.
Onu da bildirək ki, Azərbaycan ölkəmiz əleyhinə yalan və qərəz dolu məlumatlar yayan bir çox Rusiya media orqanlarının yayımını ərazisində bloklamağa tam haqqı olsa da bunu etmir. Azərbaycan söz, fikir azadlığına əməl edərək buna getmir. Azərbaycan söz azadlığının qorunduğu, mətbuat azadlığı prinsipinə hörmətlə yanaşılan ölkələrdən hesab edilir. Ölkədə azad medianın, insan hüquq və azadlıqlarının müdafiəsi demokratik mexanizmlərin mövcudluğunun əsas şərtlərindən biri kimi qəbul edilir.
Qeyd etdiyimiz kimi, Azərbaycan əleyhinə təbliğat aparan Rusiya saytlarının sayı az deyil. Belə olan halda, Azərbaycanda onların fəaliyyəti dayandırıla bilərmi?
Azər Həsrət: “Sputnik”-in Azərbaycan təmsilçiliyinin bağlanmasının vaxtı çatıb”
Media eksperti Azər Həsrət qeyd etdi ki, Rusiyanın müharibə apardığı dövrdə müəyyən məhduddiyyətlər tətbiq etməsi anlaşılandır. Rusiya dövləti tək xarici mediaya deyil, eyni zamanda, daxili mediaya qarşı da müharibə dövründə məqbul sayılacaq həddən daha artıq senzura tətbiq edir: “Rusiya, faktiki olaraq, fərqli düşünən insanların “ağzını” rəsmən yumur. Rusiyada uzun illər fəaliyyət göstərən, kifayət qədər məşhur olan media qurumları ümumiyyətlə ləğv edilib. Buna səbəb isə onların alternativ fikrə yer vermələri olub”.
Həmsöhbətimizin sözlərinə görə, Azərbaycan mediası Azərbaycan dövləti kimi bu məsələdə tərəf tutmur. Danılmaz faktdır ki, Azərbaycan mediası obyektiv gerçəkliyi işıqlandırır. Bu isə Rusiyanın xoşuna gəlmir: “Bu məsələ ilə bağlı ölkəmizin mövqeyi belə ola bilər. Azərbaycanın kabel televiziya kanalları öz paketlərindəki Rusiya kanallarını ləğv etməlidir. Xüsusi olaraq bildirim ki, kabel televeziyası kanalları xidməti təklif edilən zaman Rusiya kanalları üstünlük təşkil edilir. Anti-Azərbaycan mövqeyində olan rus kanalları Azərbaycan tamaşaçısına təqdim edilir.
Digər məsələ isə odur ki, “Sputnik”-in Azərbaycan təmsilçiliyinin bağlanmasının vaxtı çatıb. 44 günlük Vətən müharibəsi zamanı “Sputnik Armenia” hansı yanaşmanı səriləyirdisə, “Sputnik Azərbaycan” da eyni mövqedə olurdu. “Sputnik Armenia” Azərbaycan ərazilərinin adlarını ermənicə yazır, Azərbaycanın Qarabağ torpaqlarını işğal etdiyini qeyd edir. Təəssüf ki, “Sputnik Azərbaycan”da bunun qarşılığını görmürük. Bir sözlə , “Sputnik Azərbaycan” Azərbaycan dövlətinin təbliğatı ilə məşğul olmur. Bu səbəbdən də hesab edirəm ki, “Sputnik Azərbaycan”ın fəaliyyəti dayandırılmalıdır. Azərbaycan dövləti həmin kollektivi işsiz qoymayacaq. Məlumat üçün bildirim ki, bir sıra Avropa ölkələrində, o cümlədən, ABŞ-da “Sputnik”-ə giriş əngəllənib”.
Bahəddin Həzi: “44 günlük Vətən müharibəsi zamanı Rusiyanın mediası Azərbaycanı, Türkiyəni öz aləmlərində “ağ yuyub, qara sərirdilər”, ancaq…”
“Bizim Yol” media qurumunun baş redaktoru Bahəddin Həziyev bildirdi ki, oxu.az saytının bloklanması Rusiyanın eybəcər günahını güzgüdə görməsidir: “Bundan əvvəl “haqqin.az”, “minval.az” saytları da bloklandı. Bu, Rusiya hökumətinin hər şeydən əvvəl öz xalqına qarşı informasiya müharibəsidir. Alternativ fikir, alternativ mövqe diktatorların qorxulu yuxusudur. Azərbaycan 44 günlük Vətən müharibəsi zamanı Rusiyanın mediasını öz ərazisində bloklamamışdı. Halbuki, haqqımızda nələr yazmırdılar, nələr demirdilər?! Peqovu heç demirəm. Elə həmin Marqarita Simonyanın “Russian Today”i, “Sputnik” və saymaqla bitməyən başqa resursları. Rusiya mediası haqqımızda hər cür hədyanlar yayırdı. Azərbaycanı, Türkiyəni, başqa bizə dost ölkələri öz aləmlərində “ağ yuyub, qara sərirdilər”. Ancaq heç kim onlara “gözün üstündə qaşın var” demədi bu ölkədə. Rusiya isə... Düşünürəm, Azərbaycan dövləti bu haqsız və yersiz qərara adekvat cavab verməlidir. Medianı susdurmaqla heç kim Ukraynada batdığı bataqlığın palçığını təmizləyə bilməz. Kim harda hansı bataqlığa girər, öz işidir - bu ayrı məsələ. Ancaq kiminsə öz yanlışının hesabını bizə ödətdirmək istəməsi, yumşaq desək, məntiqsizlikdir, haqsızlıqdır”.
Günel CƏLİLOVA
