Rusiyanın ayrı-ayrı qurumları Azərbaycanın ərazi bütövlüyünə yönəlik təxribatlar həyata keçirməkdən usanıb bezmirlər. Bu günlərdə Rusiyanın “Birinci kanal”ında yayımlanan proqramda Azərbaycana qarşı təxribata yol verilib.
Yerli mətbuatın yazdığına görə, proqramda uçuşların qadağan olunmasından sonra xaricdə qalan Rusiya vətəndaşlarının ölkəyə qayıtması üçün istifadə edə biləcəkləri ölkələrlə bağlı material təqdim olunub. Lakin ekranda təqdim olunan xəritədə Azərbaycanın ərazi bütövlüyünə qarşı təxribata yol verilib. Belə ki, Qarabağ ərazisi ayrıca “dövlət” kimi təqdim olunub. Sosial şəbəkələrdə Rusiya mətbuatında yer alan kobud “səhv” qəzəblə qarşılanıb.
Rusiya telekanalının təqdim etdiyi xəritədə Azərbaycanın ərazi bütövlüyünə qəsd edilməsini, Qarabağın “müstəqil dövlət” kimi qələmə verilməsini necə adlandırmaq olar?
Ekspertlər hesab edir ki, bu ilk növbədə Rusiya və Azərbaycan prezidentlərinin son imzaladıqları müttəfiqlik müqaviləsinə tamamilə ziddir və Rusiyanın məlum televiziyası yol verdiyi təxribata görə Azərbaycandan üzr istəməli, bizim xəritəmizi tam təqdim etməlidir.
AMEA-nın Fəsələfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli baki-xeber.com-a şərhində bildirdi ki, Rusiya Federasiyasının telekanalında Azərbaycanın ərazi bütövlüyünə bu cür yanaşma qəbul edilməzdir. “Xüsusilə də Azərbaycanla Rusiya Federasiyası arasında bağlanan ikitərəfli müttəfiqlik sazişindən sonra yenə dövlət suverenliyimizin əleyhinə olan bu kimi addımlar başa düşülən deyil. Azərbaycanın nəzarəti altında olmayan və Rusiya sülhməramlılarının müvəqqəti nəzarət etdiyi ərazimizin Rusiya telekanalında ayrıca bir “dövlət” kimi göstərilməsi təkcə telekanalın mövqeyi ola bilməz, bu həm də dolayısı ilə Rusiya Federasiyasının mövqeyi sayıla bilər. Çünki həmin telekanallar birbaşa rəsmi Kremlin nəzarəti altındadır. Bu kanalda Azərbaycanın ərazi bütövlüyünə qarşı bu cür təxribata yol verilirsə bunu həm də rəsmi Moskvanın ikili standartı kimi qəbul etmək olar. Faktiki olaraq Rusiya Federasiyası birbaşa olmasa da, dolayısı ilə hazırda Qarabağın ermənilər yaşayan hissəsini bir “dövlət” kimi dünya ictimaiyyətinə sırımağa cəhdlər göstərir. Bu halda Azərbaycanla Rusiyanın hər hansı bir müttəfiqlik yolu uzun çəkə bilməz. Yəni faktiki olaraq Azərbaycanın ərazi bütövlüyü Rusiya telekanalı tərəfindən təhrif edilib, buna rəsmi Bakının mövqeyi sərt olmalıdır. Belə halda isə Azərbaycana aid olan və hazırda Rusiya sülhməramlılarının müvəqqəti olaraq nəzarət etdiyi Qarabağın bir hissəsinin “dövlət” kimi qələmə verilməsi Azərbaycan və Rusiya münasibətlərinə müsbət heç nə vəd etmir. Mənə elə gəlir ki, rəsmi Bakının Rusiya telekanalının bu təxribatına mövqeyi sərt və kəskin olmalıdır. Çünki birinci dəfə deyil ki, biz belə hallarla rastlaşırıq”.
F.Ələkbərli deyir ki, bu təxribatların növləri o qədər çoxdur, bir-bir saymaq böyük vaxt tələb edir. Onun sözlərinə görə, həm Rusiyanın bəzi dövlət qurumlarının, həm KİV-lərinin, həm də Qarabağda müvəqqəti yerləşdirilən sülhməramlıların Azərbaycanın ərazi bütövlüyünə yönəlik addımları çoxdur. Qarabağın sülhməramlıların nəzarət etdiyi hissəsinin telekanal tərəfindən xəritədə tamamilə “müstəqil” bir “dövlət” kimi göstərilməsi bizim üçün ciddi təhdiddir. “Rusiya telekanalının təxribatçı təqdimatından açıq görsənir ki, Rusiya Qarabağın ermənilər yaşayan hissəsini Azərbaycan ərazisi kimi tanımır, tanısa da belə bunu formal olaraq tanıyır. Əsl mahiyyətdə isə Rusiya Federasiyası Qarabağın həmin hissəsini ya özünün bir tərkib hissəsi, ya da “müstəqil” bir “dövlət” kimi qələmə verir. Bununla isə telekanal gələcəkdə Qarabağı da Abxaziya, Luqansk, Osetiya, Dombas kimi Rusiyanın “müstəqil dövlət” kimi tanıya biləcəyinə işarə vurur. Bütün bunların hamısı ciddi təhddir. Ola bilsin ki, Azərbaycanın Rusiya-Ukrayna münaqişəsində balanslı siyasət yürütməsi məhz belə bir addımın atılması ilə nəticələnib. Yəni Azərbaycan Ukraynanın suverenliyini tanıyır və həm dolayı, həm də açıq şəkildə Rusiyanın Ukraynaya qarşı işğalçılıq siyasətini qəbul etmədiyini ortaya qoyur. Belə olduğu təqdirdə də Rusiya açıq şəkildə olmasa da, dolayısı yolla bu addımları atır. Mənə elə gəlir ki, Azərbaycan bu təhdidləri ciddi şəkildə dəyərləndirməli və beynəlxalq hüquq prinsiplərinə uyğun olaraq bu məsələdə öz mövqeyini ortaya qoymalıdır. Rusiya tərəfinə nota göndərilməlidir, izahat tələb edilməlidir. Azərbaycan ortaya sərt mövqe qoymadığı təqdirdə bu kimi təxribatların sayı çoxalacaq”-deyə F.Ələkbərli qeyd etdi.
İradə SARIYEVA
