Rusiyalı politoloq Oleq Kuznetsov Azərbaycan mediasını hədələyib. Kuznetsov bu barədə Facebook səhifəsində yazıb. Qarabağ müharibəsi zamanı mövqeyinə görə, azərbaycanlıların sevimlisinə çevrilən rusiyalı politoloq indi Azərbaycan mediasını hədələyir, xəbərləri rus mediasından deyil, Ukrayna mənbələrindən aldıqlarına görə ittiham edir.
O, Rusiyanın media redaktorlarını məhkəməyə verəcəyini, müttəfiq kimi Azərbaycanın da onları həbs etməli olacağını deyir. Bunu Rusiyada qəbul edilən son sərt media qanunu ilə əlaqələndirib və deyib ki, hətta bu cür fəaliyyətə görə azərbaycanlı jurnalistlər beynəlxalq axtarışa da verilə bilər. Rusiyanın belə addımlar atmağa hüququ çatırmı?
Media eksperti Azər Həsrət “Bakı-Xəbər”ə bildirdi ki, çox təəccüblü, qəribə və eyni zamanda həyasız bir açıqlamadır: “Azərbaycan jurnalistlərinin Rusiya qarşısında hər hansı bir öhdəliyi yoxdur. İkincisi, biz Rusiya ilə müttəfiqlik haqqında bəyannamə imzalamışıqsa, bu, o demək deyil ki, onların milli qanunvericiliyi Azərbaycan xalqına da şamil edilə bilər. Bu, tam absurddur. Belə açıqlamadan rus şovinizminin xəstə təxəyyülü iyi gəlir. Həmin şəxs anlamalıdır ki, ölkəsi ədalətsiz müharibə aparmaqla Ukrayna xalqına divan tutur. Azərbaycan jurnalistləri də bütün bunların fonunda obyektiv gerçəklikləri qələmə alır. Biz heç kimə şər atmırıq, yalan xəbər yaymırıq. Hətta hansısa azərbaycanlı jurnalist yalan xəbər yayırsa belə, buyursun Rusiyanın Azərbaycandakı səfirliyi tutarlı faktlarla təkzib versin. Məsələn, fakt təqdim etsin ki, Xarkovdakı binaları rus raketləri vurmayıb. Biz də həmin məlumatı verək. Belə imperiya təfəkküründən əl çəkilməlidir. Bax buna görədir ki, Azərbaycan xalqı Rusiya ilə barışa bilmir. Onlar başa düşməlidir ki, Azərbaycan xalqının seçiminə hörmətlə yanaşılmalıdır. Biz gerçəklikləri yazmaqda davam etməliyik. Onların bizi beynəlxalq axtarışa vermək hədlərində deyil. Elə bir mexanizm də yoxdur. Rusiya başa düşsün ki, qonşu bir ölkənin jurnalistlərini belə tərbiyəsizcəsinə təhdid etmək olmaz”.
Məhəmmədəli QƏRİBLİ
