Azərbaycanla Rusiya arasında imzalanan müttəfiqlik Bəyannaməsində bir sıra müddəalar əks olunub. Belə ki, Bəyannamədə iki ölkənin qarşılıqlı maraqlarını əks etdirən məqamlar öz əksini tapıb.
Bəyannamənin 11-ci bəndində deyilir ki, Rusiya Federasiyası və Azərbaycan Respublikası öz ərazilərində təşkilatların və şəxslərin digər Tərəfin dövlət suverenliyinə, müstəqilliyinə və ərazi bütövlüyünə qarşı yönəlmiş fəaliyyətinin qarşısını qətiyyətli surətdə alırlar. Ancaq qəribədir ki, Bəyannamənin mürəkkəbi qurumamış Rusiyada erməni lobbisinin maraqlarından çıxış edən siyasilər pozucu açıqlamalarla çıxış edirlər. Rusiya Dövlət Dumasının MDB məsələləri üzrə komitəsi sədrinin birinci müavini Konstantin Zatulin bəyan edib ki, “Artsax”ın öz müqəddəratını təyinetmə məsələsi gündəmdə qalır. Zatulinin fikrincə, “Artsax” xalqını zorla saxlamaq müharibə və repressiya deməkdir: “Öz müqəddəratını təyin etməyə çalışan xalq bu hüquqa malik olmalıdır. 2020-ci ildə Ermənistan və Qarabağ uğrunda uğursuz müharibədən sonra belə, Dağlıq Qarabağın öz müqəddəratını təyinetmə məsələsi gündəmdən çıxarılmayıb. Qarabağın statusu məsələsi hələ də qalır. Bu qurum müstəqillik haqqını almalıdır”.
Düzdür, Zatulinin Azərbaycana qarşı qərəzli mövqeyi yeni bir şey deyil. Ancaq nəzərə alsaq ki, iki ölkə arasında müttəfiqlik haqda Bəyannamə imzalanıb, o zaman gərək Zatulin fikirlərinə diqqət edəydi. Çünki o, sıradan bir Rusiya vətəndaşı statusunda olan şəxs deyil. Ancaq məlum olur ki, o, tam əksinə, Azərbaycanın suverenliyinə yönəlik fikirlərini daha kəskin formada bəyan edir.
“Zatulinin Qarabağla bağlı sərsəmləməsi də müəyyən mənada bundan qaynaqlanır”
Sözügedən məsələ ilə bağlı fikirlərini “Bakı-Xəbər”lə bölüşən Demokratik Dəyişim Partiyasının Təşkilat Komitəsinin sədri Əli Mustafayevin sözlərinə görə, bütün bunlar onu göstərir ki, ermənilərin maraqlarından çıxış edən siyasilər Bəyannaməyə məqsədyönlü şəkildə etinasız yanaşır: “Düzdür, Bəyannamə tam hüquqi qüvvəyə minməyib. Bəyannamə parlamentin təsdiqindən, ratifikasiyasından keçməlidir. O baxımdan bu, tam hüquqi qüvvə daşımır. Ancaq siyasi müstəvidən baxsaq görərik ki, Rusiya Azərbaycanın ərazi bütövlüyünü tanıyıb. O baxımdan Rusiya siyasiləri Qarabağ məsələsinə münasibət bildirərkən bu çərçivədən çıxış etməlidilər. Ancaq biz görürük ki, erməni lobbisinin maraqlarından çıxış edən Konstantin Zatulin və onun kimi şəxslər üçün hüququn aliliyi önəmli deyil. Onlar üçün əsas məsələ erməni separatizmini gücləndirməkdir. Ancaq məlum Bəyannamənin timsalında belə çağırışlar təxribat xarakterlidir və yolverilməzdir. Nəzərə almaq lazımdır ki, istənilən halda Bəyannamə hüquqi öhdəliklər yaradır. Lakin reallıq odur ki, Rusiya kimi dövlət üçün bir sıra hallarda belə öhdəliklər hansısa əhəmiyyət kəsb etmir. Çünki görürsən ki, imzaladığı sənədləri yerinə yetirmir. Zatulinin Qarabağla bağlı sərsəmləməsi də müəyyən mənada bundan qaynaqlanır. Ancaq kimin nə deməsindən asılı olmayaraq, dövlətimiz Azərbaycanın ərazi bütövlüyünü qorumalıdır. Heç kimin, o cümlədən Zatulinin ixtiyarı yoxdur ki, bizim daxili işimizə qarışsın və suverenliyimizə yönəlik açıqlamalarla çıxış etsin”.
Ə.Mustafayev onu da qeyd etdi ki, separatizmi dəstəkləmək siyasəti bir gün onların başına bəla olacaq.
Vidadi ORDAHALLI
