Ukrayna müdafiə nazirinin müavini Anna Malyar Rusiya hərbçilərinin Ukraynada son üç gündə itkilərinin ümumi təxmini sayını açıqlayıb. Bu barədə o, Facebook səhifəsində yazıb.
Ukrayna Müdafiə Nazirliyinin məlumatına görə, Ukraynadakı hərbi əməliyyatlar zamanı Rusiya ordusu 27 təyyarə, 26 helikopter, 146 tank, 706 ədəd zirehli texnika, 49 top, 1 ədəd “Buk” hava hücumundan müdafiə sistemi, 4 “Qrad”, 30 ədəd avtomobil texnikası, 60 sistern, 2 pilotsuz təyyarə, 2 gəmi və çoxlu sayda hava hücumundan müdafiə sistemini itirib.
Malyar öldürülən hərbçilərin təxmini sayını da açıqlayıb. Ukrayna Müdafiə Nazirliyinin məlumatına görə, Rusiya döyüşlər zamanı 4300-ə yaxın hərbçi itirib.
Görünən budur ki, artıq Ukraynaya ciddi dəstək var və onlar çox güclü müqavimət göstərməyə başlayıblar. Belə olan təqdirdə müharibənin uzana biləcəyini söyləyirlər. Müharibənin müddətinin uzanması Rusiya üçün nə vəd edir?
Hərbi-siyasi ekspert İbrahim Rüstəmli “Bakı-Xəbər”ə açıqlamasında bildirdi ki, tarixdə heç də bütün müharibələr tərəflərin qalibiyyəti ilə nəticələnmir: “Həm Rusiyanın, həm də Ukraynanın dinc əhalisi müharibənin əleyhinədir. Ortada olan hərbidən çox, siyasi xarakter daşıyan müharibənin şahidiyik. Bu cür müharibələrdə qalibiyyət olmur, ancaq fəlakətlər, xüsusilə də maliyyə və insan itkiləri ilə yadda qalacaq. Ukraynaya ciddi dəstək var. Bir çoxlarının görmədiyi bir dəstəyin şahidiyik. Ukrayna ən böyük dəstəyi isə xalqının özündən alır. Biz Rusiyanın Azərbaycana olan münasibətini də nəzərə almalıyıq. Bu istiqamətdə ciddi redaktələrin şahidi olduq. Putin bütün dünyaya açlq şəkildə bəyan etdi ki, Qarabağ Azərbaycanın öz torpağıdır. Ukrayna məsələsinə münasibət açıqlayanda bunun özünü də nəzərə almalıyıq. Ukrayna müharibəsi Rusiyanın qəsdən sürükləndiyi bir prosesdir. Hiss edilir ki, Rusiya bataqlığa girib. Putinin son çıxışlarında onun nə qədər əsəbi və gərgin olduğundan bu aydın hiss edilir. Ən pis sülh danışıqları ən yaxşı müharibədən vacibdir. Biz pasifist xalqıq. Heç vaxt müharibə tərəfdarı olmamışıq. Hazırda hər iki tərəf insan itkiləri verir. Hər bir itki bir valideyinin ürəyinə xəncər sancmağa bərabərdir. Mən tezliklə müharibənin bitməyini arzulayıram. Azərbaycan Prezidentinin göstərdiyi vasitəçilik cəhdlərini yüksək qiymətləndirməliyik. Bütün bunlarla bərabər, bu müharibədə Ukraynadan çox, Rusiya ziyan görəcək”.
Məhəmmədəli QƏRİBLİ
