Rusiyanın bir sıra alim və elm sahəsində çalışan araşdırmaçı jurnalistləri Putinin Ukrayna torpaqlarında başlatdığı düşmənçiliyə, işğala etiraz edərək ona açıq məktub yazıb. “Exo”nun yaydığı məlumata görə, məktubu minlərlə elm adamı imzalayıb.
Rusiyalı alimlər Putinə göndərdikləri etiraz məktubunda müharibəni dayandırmasını tələb ediblər. “Bu müharibə gülünc bir xəyanətdir”- deyən görkəmli rusiyalıların “Exo”da yayımlanan məktubunda qeyd edilir: “Biz rusiyalı alimlər və elmi araşdırmaçılar ölkəmizin silahlı qüvvələrinin Ukrayna torpaqlarında başlatdığı düşmənçiliyiə qarşı protest elan edirik. Bu ölümcül addım çoxsaylı insan itkisinə yol açmaqda və beynəlxalq təhlükəsizlik sistemini sarsıtmaqdadır. Avropada yeni bir müharibənin başladılması məsuliyyəti tamamilə Rusiyaya aiddir.
Bu müharibənin məntiqli bir səbəbi yoxdur. Donbasdakı vəziyyəti hərbi əməliyyat başlatmaq bəhanəsi olaraq istifadə etməyə çalışmaq hər hansı bir etibar vəd etmir. Onlara qarşı savaş haqsız və mənasızdır. Ukrayna bizə yaxın bir ölkə olub və olmağa da davam etməkdədir. Çoxumuzun Ukraynada yaşayan qohumları, dostları və həmkarları var. Babalarımız, atalarımız və böyük babalarımız nasizimə qarşı birlikdə savaşdılar. Rusiya Federasiyası liderliyinin geopolitik ambisiyaları uğruna şübhəli tarixi fantaziyalarından yönləndirilən bir müharibəyə girişmək onlara qarşı gülünc bir xəyanətdir. Həqiqətən işləyən demokratik qurumlara sahib Ukrayna dövlətinə hörmətlə yanaşırıq. Qonşularımızın avropalı olma seçimini anlayışla qarşılayırıq. Ölkələrimiz arasındakı münasibətlərdəki bütün problemlərin sülhlə həll oluna biləcəyinə inanırıq. Müharibəyə başlayan Rusiya özünü beynəlxalq izolyasiyaya, partiya ölkəsi mövqeyinə məhkum etdi. Bu o deməkdir ki, biz alimlər artıq öz işimizi normal şəkildə görə bilməyəcəyik. Nəticədə, digər ölkələrdən olan həmkarlarımızla tam əməkdaşlıq edə bilməyəcəyimiz təqdirdə heç bir elmi araşdırma həyata keçirə bilməyəcəyik. Rusiyanın dünyadan təcrid olunmasının müsbət gözləntilərinin tamamilə olmadığı bir şəraitdə bu, ölkəmizin mədəni və texnoloji deqradasiyası deməkdir. Ukrayna ilə müharibə bizi heç bir yerə aparmayacaq addımdır. Nasizm üzərində qələbəyə həlledici töhfə vermiş ölkəmizin indi Avropa qitəsində yeni müharibənin təhrikçisinə çevrildiyini anlamaq bizim üçün ağrılıdır. Biz Ukraynaya qarşı bütün hərbi əməliyyatların dərhal dayandırılmasını tələb edirik. Biz Ukrayna dövlətinin suverenliyinə və ərazi bütövlüyünə hörmət tələb edirik. Biz ölkələrimiz üçün sülh tələb edirik. Müharibə ilə yox, elmlə məşğul olaq!”
Siyasi şərhçi Azər Həsrət hesab edir ki, Rusiya ziyalılarının, elm xadimlərinin müharibəyə etirazı tamamilə gözlənilən idi. “Əlbəttə, Rusiya prezidentinin müharibə fikrini dilə gətirməyə başladığı gündən bizim həm də Rusiyadan gözləntimiz idi ki, bu ölkənin ictimaiyyəti ayağa qalxıb müharibəyə etirazını bildirəcək. Özəlliklə də öndə gedən ziyalılardan, elm adamlarından, ictimai-siyasi xadimlərdən bu hərəkəti gözləyirdik. Sevindirici haldır ki, sadə insanlar çox geniş meydanlarda bir araya toplaşaraq bu müharibəyə etiraz edir. O cümlədən də Rusiyanın görkəmli elm, mətbuat adamları, ictimai xadimləri Putinə yazılı müraciət edərək müharibəyə qarşı fikirlərini bildiriblər. Bu bizə əlavə optimizm verir. Yəni başımızda Rusiya kimi nəhəng, güclü bir dövlət var və əlbəttə ki, o dövlətin rəhbərliyindəki şəxslər hansısa müharibə çağırışları edərsə, yaxud buna doğru addımlar atarsa, o ölkənin ictimaiyyətinin də hərəkətə keçib müharibəni dayandıra bilməsi bizi sevindirməyə bilməz. Biz çox şadıq ki, Rusiya ictimaiyyəti, xüsusilə də elm adamları bu cür addımlar atır. Yəni Rusiyanın qurtuluşu, bundan sonrakı inkşafı, eləcə də bölgəmizdə dinc yanaşı yaşaması onun qonşularına münasibətindən asılı olacaq. Yəni Rusiya dövləti müharibə ritorikasından imtina etməlidir, yaxın qonşulara münasibətdə daha səliqəli davranmalıdır. Təəssüflər olsun ki, biz son illər ərzində bunu müşahidə edə bilmirik”.
A.Həsrət vurğulayır ki, Azərbaycan tərəfindən Qarabağın Ermənistanın işğalından azad edilməsi dövründə Rusiya nisbətən səliqəli davransa da, lakin günü bu gün də o torpaqlarda Rusiyanın sülhməramlıları var və Azərbaycan ictimai rəyində o sülhməramlılarla bağlı çox ciddi narazılıqlar mövcuddur: “Bu baxımdan deyirəm ki, Rusiya dövləti atdığı belə sərt addımlara, xüsusilə də müharibə, silah gücünə, ordu gücünə hansısa məsələləri həll etməyə çalışması məsələsində ictimaiyyətindən dəstək görməməlidir. O cür məsələlərə qarşı Rusiya ictimaiyyəti səsini ucaltmalıdır. Bu baxımdan, Rusiyanın elm adamlarının, ziyalılarının Putinin başlatdığı müharibəyə etiraz etməsi, onu xəyanət adlandırması rus xalqının üzünü ağ edəcək, tarixə düşəcək bir addımdır. Yəni gələcək nəsillər görəcək ki, Putin Ukraynaya hücum əmri verərkən heç də Rusiya əhalisinin hamısı onun bu təcavüzkarlığının tərəfdarı olmayıb. Əksinə, Rusiyanın ən görkəmli, öndə gələn aydın beyinləri Putinin təcavüzkar siyasətinə qarşı olduqlarını rəsmi sənədlə təsdiqləyirlər” - deyə A.Həsrət qeyd etdi.
İradə SARIYEVA
