Fransa prezidenti Emmanuel Makron Parisdə Ermənistan baş naziri səlahiyyətlərini icra edən Nikol Paşinyanla görüşündə bildirib ki, ölkəsi Ermənistan və Azərbaycan arasında sülhün bərpasına, dialoqun inkişafına yardım edəcək: “ATƏT-in Minsk Qrupunun həmsədri qismində Fransa Rusiya və ABŞ-la birlikdə gərginliyin aradan qaldırılmasına və dialoqun, o cümlədən, tərəflər arasında birbaşa dialoqun bərpasına nail olmaq üçün əlindən gələni etmək niyyətindədir”.
Makron qeyd edib ki, Ermənistan və Azərbaycan sərhədində bu yaxınlarda baş verən hadisələrlə əlaqədar sərhədin delimitasiyası yalnız danışıqlar yolu ilə və güc tətbiq etmədən həyata keçirilməlidir: “Azərbaycan qoşunları Ermənistan ərazisini tərk etməlidir. Tərəflər mayın 11-nə qədər tutduqları mövqelərə qayıtmalıdırlar. Atəşkəs rejiminə bütünlükdə Dağlıq Qarabağda riayət olunur, amma hələ çox iş görülməlidir. Fransa əhaliyə dəstəyini davam etdirməyə hazırdır. Mən, həmçinin, bütün əsirlərin azad edilməsi, humanitar təşkilatların regiona çıxışına qoyulan məhdudiyyətlərin götürülməsi zərurəti və mürəkkəb minalanmış zonalar məsələsi haqqında düşünürəm”.
Görünən odur ki, Fransa prezidenti ənənəvi ermənipərəstliyini bir daha açıq formada ortaya qoyub. Rəsmi Paris tərəfsiz mövqedən çıxış etmək istəmir. Bu baxımdan, Makronun “mürəkkəb minalanmış zonalar məsələsi” nə deməkdir? Reallıq odur ki, əraziləri Ermənistan minalayıb və xəritələri də vermir. Fransa isə, bir növ, ermənilərin bu hərəkətinin üstünü örtür.
“Minalı ərazilərlə bağlı elə bir sərsəm açıqlama verir ki, sanki biz özümüz öz ərazilərimizi minalamışıq”
Məsələyə münasibət bildirən AMİP sədrinin müavini Afsəddin Nəbiyevin sözlərinə görə, Makron ermənidən çox ermənilik etməklə insanlarımızda qıcıq yaradır: “Fransa prezidenti E.Makron illərdir Azərbaycana qarşı təzyiq siyasətinin başında dayanaraq açıq şəkildə ermənipərəst mövqeyindən əl çəkmir. Açığı, Azərbaycan cəmiyyətində Fransa prezidentinin adı çəkildikdə insanlarımızın təsəvvürlərində Makron erməni anlamı ilə assosiasiya olunur. Daha dəqiq ifadə etsəm, Makron ermənidən çox ermənilik etməklə insanlarımızda qıcıq yaradır. Bir çox ekspert söyləyir ki, Makron Fransa demək deyil. Ancaq mən belə düşünmürəm. Fransa dövləti sıradan bir dövlət deyil. Zəngin tarixi, dünya siyasətində özünəməxsus yeri olan bir dövlətdir. Necə ola bilər ki, bir erməni lobbisi belə bir dövləti öz maraqları naminə yönləndirə bilsin? Mən bu fikirlərə qatılıram ki, Fransanın Azərbaycana təzyiqi Türkiyə ilə qardaşlıq münasibətlərimizdən qaynaqlanır. Türkiyənin bölgədə və dünyada artan nüfuzunu həzm edə bilmədikləri üçün Azərbaycana qarşı hər zaman ədalətsiz mövqe sərgiləyir”.
A.Nəbiyevin fikrincə, Paşinyanla görüşündə bir az da qabağa gedərək, müharibədən sonra Azərbaycanda terror törətməyə cəhd edən bir hərbi bölüyü hərbi əsir kimi göstərməsi Fransanın adına, sözün həqiqi mənasında, utanc gətirən bir addımdır: “Məntiqlə belə çıxır ki, Fransanın Marsel şəhərinə hücum etmiş terrorçuları azad edib deməlidir ki, bunlar terrorçu deyil, hərbi əsirlərdir. Və yaxud minalı ərazilərlə bağlı elə bir sərsəm açıqlama verir ki, sanki biz özümüz öz ərazilərimizi minalamışıq. Bu sözləri o ölkənin rəhbəri deyir ki, guya 30 il ərzində Ermənistanla Azərbaycanı müharibəsiz sülhə gətirməli idi. Ermənistan Azərbaycan xalqına və dövlətinə etdiyi zülmün, işğalın bədəlini ödəməkdədir. Bunu ermənilərin öz siyasətçiləri etiraf edirlər. Makron isə dağıntılar altında qalmış erməni xalqının bu durumunda öz çirkin siyasi oyunlarını həyata keçirir”.
Sədr müavini onu da qeyd etdi ki, əslində, bu mövqe ilə bölgədə sülhə yox, təxribatlara yol açan açıqlamalar verməklə bölgəmizdə qarışıqlıq yaratmaq istəyirlər, amma buna nail ola bilməyəcəklər.
Vidadi ORDAHALLI
