Ermənistanda 44 günlük Qarabağ müharibəsi zamanı ölən erməni əsgərlərinin kisələrə doldurulmuş qalıqlarının Abovyan şəhərindəki vərəm xəstəxanasının morqunun zirzəmisində necə gəldi atılmasını əks etdirən fotoların yayılması seçki ərəfəsində böyük qalmaqala səbəb olub. Səhiyyə Nazirliyi bu rüsvayçı fakta izah tapa bilməyib və araşdırma başladıldığını açıqlayıb.
Fotolara əsasən, əsgər meyitlərinin qalıqlarının doldurulduğu çoxsaylı polietilen kisələr morqun zirzəmisində necə gəldi döşəməyə atılıb, üst-üstə qalaqlanıb. Həmin fotoların nə zaman çəkildiyi məlum deyil, amma seçki kampaniyasının qızğın vaxtında yayılması sosial şəbəkələrdə Paşinyan hökumətinə qarşı qəzəb və hiddət doğurub.
Bu fotoların yayılmasından əvvəl itkin düşmüş bir qrup erməni hərbçisinin yaxınları İrəvanda yolu bağlayaraq etiraz aksiyası keçirmişdi. Onlar bildirirdilər ki, hakimiyyət, itkilərlə bağlı səs-küy yaranmasın deyə, ölən hərbçilərin meyitlərini uzun müddət soyuducularda saxlayıb. Etirazçılardan biri deyib ki, 200-dən çox cəsəd uzun müddət müxtəlif yerlərdə soyuducularda, o cümlədən meyvə saxlamaq üçün nəzərdə tutulan soyuducularda saxlanılıb. Toplaşanlar deyiblər ki, hakimiyyət itkilərin real sayını hələ də açıqlamır.
Ermənistandakı bu biabırçı mənzərə ilə bağlı hərbi ekspertlər nə düşünür?
Ehtiyatda olan polkovnik-leytenant, hərbi ekspert Daşdəmir Əliyev “Bakı-Xəbər”ə açıqlamasında bildirdi ki, Ermənistan müdafiə nazirliyinin rəsmiləri müharibənin gedişi və ondan sonrakı dönəmdə Azərbaycan Ordusundakı itkilərin sayı ilə bağlı dezinformasiyalar yayırdı: “Azərbaycan tərəfi itkilərinin sayını şəffaf şəkildə təqdim etdi. Hətta bununla bağlı sayt da yaradıb. İstənilən şəhid barədə həmin saytda məlumat yerləşdirilib. Konkret olaraq neçə nəfərin tanınmaz halda olduğu və itkin düşdüyü də qeyd olunur. Bu, Azərbaycan Ordusunun uğurları qarşısında erməni əhalisi arasında hökm sürən təşviş və ordularında yaranmış xaosu bir qədər azaltmaq məqsədi güdürdü. Müharibədən sonra Ermənistanda tez-tez etiraz aksiyaları keçirilir. Əksəriyyətində valideynlər həlak olmuş övladlarının meyitini tələb edir. Bir müddət əvvəl sosial şəbəkələrin erməni seqmentində Ermənistanda əsgər meyitlərinin hansısa şirkətə məxsus soyuducu yuk maşınlarında saxlanılması faktı üzə çıxdı. Hələ də 1500-ə yaxın erməni hərbçisi itkin hesab olunur. Ermənistan tərəfi isə beynəlxalq humanitar təşkilatlar vasitəsilə hay-küy qaldıraraq Azərbaycanı əsirlərin sayını gizlətməkdə, guya hələ də yüzlərlə əsir saxlamaqda günahlandırırdı. İndi isə məlum olur ki, əslində ölən əsgərlərin bir qisminin meyitini elə Ermənistanın özündə gizlədirlər. Öz əsgərlərinə qarşı bu cür davranış Ermənistan hakimiyyətinin əsl xislətindən xəbər verir. Bu məlumatların ictimailəşməsi seçkiqabağı prosesə ciddi təsir edəcək və Paşinyanın reytinqinə mənfi mənada ciddi təsir göstərəcək”.
Məhəmmədəli QƏRİBLİ
