2018-ci ildə Azərbaycandan İrəvana 211 milyon dolların köçürülməsi barədə yayılan məlumatlar Ermənistanda növbəti siyasi qalmaqala səbəb olub. “İşıqlı Ermənistan” parlament fraksiyasından olan deputat Armen Yegiazaryan bəyan edib ki, Milli Təhlükəsizlik Xidmətindən (MTX) onların 2018-ci ildə 211 milyon dolların Azərbaycandan Ermənistana köçürülməsi ilə heç bir əlaqəsinin olmadığı barədə cavab alıb:
“Bir neçə gün bundan əvvəl mən Dünya Bankının hesabatı ilə əlaqədar MTX-ya müraciət etmişdim və bildirmişdim ki, 2018-ci ildə Azərbaycandan Ermənistana 211 milyon dollar köçürülüb. Bu gün mən MTX-dan cavab aldım, həmin cavabda faktiki olaraq onların bu məsələdə görəcəkləri heç bir işin olmadıgı bildirilir… Ən azından, düşmən ölkədən Ermənistana əhəmiyyətli miqdarda pulun köçürülməsi faktına belə laqeyd münasibət qəribədir”.
Azərbaycandan Ermənistana güya külli miqdarda pul köçürüldüyü ilə bağlı fikirlər niyə həmin ölkənin ictimai rəyinə yeridilməyə çalışılır?
Politoloq Rəşad Bayramov “Bakı-Xəbər”ə açıqlamasında bildirdi ki, belə qeyri-ciddi fikirlərdən Ermənistandakı siyasilər bir-birinə qarşı kompromat kimi istifadə edir: “Yadınızdadırsa, bir müddət əvvəl Ermənistanda məlumat yayıldı ki, güya prezident Armen Sarkisyan müharibədən sonra gizli şəkildə Bakıya səfər edib. Ermənistan prezidentinin Bakıya gizli səfər etməsini zəruri edən heç bir hadisə baş verməyib. Hətta onun “Bakıya səfəri” baş tutmuş olsa idi belə, bu, gizli qala bilməzdi. Diqqət çəkən məqam budur ki, erməni cəmiyyəti bu halı böyük aqressiya ilə qarşılayır. Bu, həmin cəmiyyətin revanşist hisslərindən xəbər verir”.
Politoloqun sözlərinə görə, Ermənistanda belə faktlardan siyasi qruplar bir-birinə qarşı kompromat kimi istifadə edir, hazırkı vəziyyətdə mövqelərini möhkəmləndirməyə və ya rəqib mövqelərini zəiflətməyə çalışır: “Azərbaycandan Ermənistana pul tranşının olması ilə bağlı məlumat da bu qəbildəndir. Bu məsələdə isə hədəf kimi Paşinyan seçilib. Seçkiqabağı onu nüfuzdan salmağa çalışırlar. Söhbət Paşinyanın hakimiyyətə gəldiyi dönəmdən gedirsə, deməli, belə qənaət hasil olur ki, indiki baş nazir Azərbaycanın dəstəyilə hakimiyyətə gəlib. Təbiidir ki, bu ittihama inananlar da az olmayacaq. Deməli, məlumatı dövriyyəyə buraxanlar öz məqsədinə çatmış olur. Tamamilə absurd bir iddiadır. Çünki Azərbaycanın özünün də belə bir addımı atmağa ehtiyacı olmayıb. Mən inanmıram ki, ölkələrimizin bank sistemləri arasında da belə bir əməliyyatın həyata keçirilməsi mümkün olsun”.
Məhəmmədəli QƏRİBLİ
