“Ermənistanın taktikası danışıqlar prosesində iştirakla bağlı imitasiya yaratmaq, həlledici addım atmaq lazım gəldikdə isə Fransa danışıqlarında olduğu kimi, geri çəkilmək idi. 2009-cu ildə Ermənistan tərəfi, əslində, Dağlıq Qarabağın ətrafındakı ərazilərin azad edilməsini nəzərdə tutan həll variantını rədd etdi”.
Bu fikri Azərbaycan Prezidenti İlham Əliyev ADA Universitetində keçirilən “Cənubi Qafqaza yeni baxış: münaqişədən sonra inkişaf və əməkdaşlıq” adlı konfransdakı çıxışında söyləyib.
“Azərbaycan XXI əsrin müharibəsini aparmaqla yanaşı, mənəviyyat müharibəsi aparırdı” fikrini bildirən ölkə başçısı daha sonra qeyd edib: “Müharibə başlayarkən mənim hərbi qulluqçulara dərhal verdiyim əmrlərdən biri ləyaqətlə, mötədil davranmaq, mülki vətəndaşlara zərər yetirməmək barədə oldu. Ermənistan tərəfində mülki əhali arasında 40 nəfərdən az tələfatın olması bunu aydın göstərdi: “Biz əraziləri azad edirdik. Bu ərazilərdən bəziləri qanunsuz məskunlaşmışdı. Ona görə də bizim hücumlarımız, texniki imkanlarımız yalnız hərbi obyektlərə yönəlmişdi. Ermənistan tərəfdən 40-dan az olan qurbanların böyük hissəsi hərbi əməliyyatlarda iştirak edib”.
Ölkə başçısının ifadə etdiyi XXI əsrin mənəviyyat müharibəsi nə deməkdir? Prezident bununla cəmiyyətimizə, eləcə də dünyaya nələri çatdırmaq istəyib, hansı mesajları verib?
“...çoxüzlü və mənəviyyatdan uzaq siyasət aparanlara qarşı apardığımız mübarizəni qeyd edib”
Tanınmış sosioloq, professor Əhməd Qəşəmoğlu “Bakı-Xəbər”ə şərhində bildirdi ki, ölkə başçısının səsləndirdiyi XXI əsrin mənəviyyat müharibəsi fikrinin özü dünya üçün tamamilə yeni bir ifadədir. “Azərbaycan Prezidentinin dəfələrlə bildirdiyi bir fikir var ki, ölkəmizə qarşı müxtəlif beynəlxalq təşkilatlar, güc mərkəzləri, dövlətlər çoxüzlü siyasət aparırlar. Biz bunu həm müharibədən əvvəl, həm müharibə zamanı, həm də postmüharibə dövründə yaxından müşahidə etmişik, indi də edirik. Çoxüzlü siyasətin özü elə mənəviyyat müharibəsinə aid bir məsələdir. Ona görə də cənab Prezident XXI əsrin mənəviyyat müharibəsi ifadəsini işlətməklə çoxüzlü və mənəviyyatdan uzaq siyasət aparanlara qarşı apardığımız mübarizəni qeyd edib. Çünki çoxüzlü siyasət yürüdən dövlətlər, beynəlxalq təşkilatlar üzdə bir söz deyirlər, amma arxada tamam mənəviyyata zidd davranış sərgiləyirlər, dediklərinin əksini edirlər. Fikir verin, Azərbaycan Prezidenti çalışır ki, heç vaxt öz dediyi fikrin ziddinə bir iş görməsin, addım atmasın. Yəni cənab Prezident dünyada öz sözünün üstündə duran adam kimi tanınmaqdadır. Beynəlxalq aləmdə də artıq belə bir imic qazanıb ki, o, öz dediyi sözün üstündə dayana bilir. Amma başqaları üzdə bir söz deyir, bir şey tələb edir, amma pərdə arxasında tamamilə başqa işlər çevirirlər. Ona görə də Prezidentimiz XXI əsrin mənəviyyat müharibəsi məsələsini xüsusi vurğulayıb. Prezident onu çatdırmaq istəyib ki, bizə qarşı ziyanlı, qeyri-sağlam münasibətlər göstəriləndə biz də özümüzü müdafiə etməyə, başqa addımlar atmağa məcbur oluruq. “XXI əsrin mənəviyyat müharibəsi” ifadəsinin özü də çox maraqlı və təzə ifadədir, indiyə qədər bu ifadə yox idi, cənab Prezidentə qədər onu işlədən olmamışdı. “XXI əsrin mənəviyyat müharibəsi” ifadəsinə haqq qazandırmaq olar. Doğrudan da bizə qarşı ziyanlı siyasət yürüdənlərlə aramızda mənəvi müharibə gedir. Onlar üzdə bir söz deyir, demokratiyadan, insan haqlarından danışır, amma əmələ gələndə tamamilə şərin yanında dayanırlar. Beynəlxalq siyasətçilərin hamısı danışanda haqdan, ədalətdən, mənəviyyatdan danışırlar, amma tribunadan düşəndən sonra Azərbaycana qarşı mənəviyyatsız hərəkətlər edirlər”.
Ə.Qəşəmoğlunun sözlərinə görə, bütün dünya, beynəlxalq təşkilatlar, dövlətlər bilirlər ki, Qarabağda minillərdir Azərbaycan xalqı yaşayıb, bu torpaqlar bizim ərazimizdir, Ermənistan Azərbaycan torpaqlarını işğal etmişdi, 44 günlük müharibədə Azərbaycan öz ərazisində müharibə aparıb, amma məlum qüvvələr mənəviyyatsızlıq edərək Ermənistanın tərəfini tuturlar. Bunun özünün ən böyük mənəviyyatsızlıq olduğunu deyən Ə.Qəşəmoğlunun bildirdiyinə görə, Azərbaycan bu mənəviyyatsızlığa qarşı mübarizə aparır.
Ə.Qəşəmoğlunun sözlərinə görə, mənəviyyatsızın yanında durub bizə mənəviyyatdan dərs keçmək istəyənlərlə apardığımız mübarizə elə mənəviyyat müharibəsidir.
İradə SARIYEVA
