Gəncə kimi şəhər elə bu korrupsioner qardaşların ümidinə qalıb?

İlqar Hüseynli: “Əhmədovlar kimi korrupsiyalaşmış ailələr çoxdur, onlar da bir-birinə dəstək olurlar”

img

Korrupsiya, rüşvətxorluq halları cəmiyyətə, dövlətə zərər verən bir problem olsa da, təəssüf ki, bunu həyat tərzinə çevirən məmurlar, dövlət qulluqçuları da az deyil. Belə şəxslərin çirkin əməlləri, qanunsuz hərəkətləri aidiyyəti qurumlar tərəfindən üzə çıxarılıb ifşa edilsə də, onların taleyindən dərs götürənlər az, əməllərini isə təkrar edənlər çox olur.

Gəncə Şəhər Səhiyyə İdarəsinin rəisi Nazim Əhmədovun qardaşı, 2016-2018-ci illərdə Dövlət Sosial Müdafiə Fondunun (DSMF) Gəncə Şəhər Kəpəz Rayon Şöbəsinin müdiri vəzifəsində işləmiş Nizami Əhmədovun qanunsuz əməlləri üzə çıxıb. Belə ki, Baş prokuror yanında Korrupsiyaya qarşı Mübarizə Baş İdarəsi tərəfindən aparılan araşdırma nəticəsində DSMF-nin Gəncə Şəhər Kəpəz Rayon Şöbəsinin vəzifəli şəxslərinin külli miqdarda dövlət əmlakını mənimsədiyi müəyyən edilib.

Maraqlıdır ki, Gəncə Şəhər Səhiyyə İdarəsinin rəisi Nazim Əhmədovun ailə üzvlərindən ikinci şəxsdir ki, korrupsiyada adı çəkilir. Belə ki, həmin şəxsin digər qardaşı Natiq Əhmədov barəsində də Gəncə Şəhər Su İdarəsinin rəisi işlədiyi vaxtlarda qanunsuz əməlləri ilə bağlı Korrupsiya Qarşı Mübarizə Baş İdarəsində çinayət işi açılıb.

Vəzifəyə təyin etməyə başqa adamlar yoxdur ki, Gəncə rüşvətxor qardaşların ümidinə qalıb?

  • “İslahatların daha da dərinləşməsinə ehtiyac var və idarəçilik sistemi birdəfəlik korrupsiyalaşmış ailələrdən xilas edilməlidir”

Sosial-iqtisadi sahə üzrə ekspert İlqar Hüseynli baki-xeber.com-a bildirdi ki, korrupsiya sistemli şəkildə yayılmış bir cinayətdir. “Bu, cinayət əməli olmaqla yanaşı, həm də bir cinayət təcrübəsidir. Təəssüf ki, bu, ölkənin idarəetmə sistemində çox dəhşətli dərəcədə oturuşmuş bir hal alıb. Burada söhbət təkcə Gəncə Şəhər Səhiyyə İdarəsinin rəisindən, onun qardaşı olan DSMF-nin Gəncə Şəhər Kəpəz Rayon Şöbəsinin müdirindən getmir, bütövlükdə, bir sistem halını almış korrupsiyalaşmış ailə şəbəkəsi artıq dövlətin idarəetmə sisteminə oturuşub. Əhmədov qardaşları da onlardan biridir. Çox təəssüf ki, bir çox sahədə idarəçilik sistemi ailə-klan, qohumçuluq metodları ilə idarə olunur. Yəni bu gün məhkəmə sistemindən tutmuş, Dövlət Sosial Müdafiə Fondunun, Vergi Xidmətinin əməkdaşlarına qədər hamı bir-birilə qohumdur. Bu, birisinin qızını alıb, o birisi başqa birisinin qardaşıdır, digəri əmisi oğludur, bunlar bir şəbəkədir, bir-birinə bağlıdırlar. Bu tip misalların sayı minlərlədir. Burada biz məsələni belə qoysaq ki, yalnız bir ailə korrupsiyalaşmış ailədir, yox, doğru olmayacaq. Bütövlükdə, bir sıra sahələrdə idarəetmə sisteminin özündə bir “korrupsiya maşını” oturub və cəmiyyət bundan azad olmalıdır, yeni siyasi düşüncə, yeni mexanizmlər ortaya gəlməlidir. Biz sistemdə, bütövlükdə, bu yeniləşməni aparmasaq, əmioğluçuluq, dayıoğluçuluq, qardaşçılıq, yeznəçilik prinsipləri ilə bütün idarəçilik sistemini davamlı şəkildə həyata keçirsək, təbii ki, bir qardaşı korrupsiya cinayətinə görə işdən çıxardıqda onun yerinə korrupsiyalaşmış başqa qardaşı gələcək. Bu mənada islahatların daha da dərinləşməsinə ehtiyac var və idarəçilik sistemi birdəfəlik korrupsiyalaşmış ailələrdən xilas edilməlidir. Bir məmuru korrupsiya cinayətinə görə məsuliyyətə cəlb edirlər, onun yerinə ya qardaşı, ya da başqa bir qohumu vəzifəni tutur”.

İ.Hüseynli qeyd etdi ki, artıq torpaqlarımız işğaldan azad olunub və vətəndaşlarda dövlətin müxtəlif institutlarına inam daha da artıb, imkan vermək olmaz ki, bu korrupsionerlərin fəaliyyəti bu inama kölgə salsın. Onun sözlərinə görə, bu korrupsionerləri Qarabağın bərpa prosesinə qətiyyən buraxmaq olmaz. Onlar 1 manatlıq işi 100 manata sənədləşdirirlər: “Gəncə şəhərində Dövlət Sosial Müdafiə Fondunun bütün sistemi yenilənməlidir, orada başdan-ayağa böyük bir korrupsiya ocağı, mənbəyi var. Bütövlükdə, idarəetmə sistemi yenilənməlidir ki, korrupsioner ünsürlərə dövlət idarəçiliyində yer olmasın. Külli miqdarda dövlət əmlakını talayıb vəzifə başında cinayət edən, korrupsiyalaşanlar təkcə Əhmədov qardaşları deyil, Əhmədovlar kimi korrupsiyalaşmış ailələr çoxdur, onlar da bir-birinə dəstək olurlar. Əlbəttə, belələrinə vəzifə etibar etmək böyük yanlışlıqdır. Bu faktın özü də onu göstərir ki, korrupsionerlərin vəzifəyə təyin edilməsi, irəli çəkilməsi böyük pozuntulara gətirib çıxarır” - deyə İ.Hüseynli qeyd etdi.

İradə SARIYEVA

Son xəbərlər