YAP-dan kənara qoyulanlar tarixdə hansı adla qalacaq? - Rəylər kəskin şəkildə qütbləşdi…

Elman Nəsirov: “Etimaddan kənarda qalan bəzi insanlar nə zamansa yanlışa yol verdiklərinin də fərqində olmalıdırlar”

img

Qabil Hüseynli: “Bu  məsələdə əsas meyar partiyanın sıravi üzvü olmaqdır”

Musa Musayev: “Bu barədə hələlik danışmaq istəmirəm”

Alqış Həsənoğlu: “Eyni şeyləri təkrarlamaq istəmirəm”

Xəbər verdiyimiz kimi, Yeni Azərbaycan Partiyası islahatlara gedərək özünə yeni səhifə açıb. Bunun nəticəsi kimi YAP-ın VII qurultayında partiyanın yeni İdarə Heyəti formalaşıb. Əvvəlkindən fərqli olaraq, yeni İdarə Heyəti üzvlərinin sayı artırılıb.

Belə ki, əvvəlki İdarə Heyətində 20 partiya üzvü yer alırdısa, keçirilən qurultaydan sonra onların sayı 40-a yüksəlib. Maraqlıdır ki, köhnə İdarə Heyətinin yarıdan çoxunun adı partiyanın yeni səhifəsinə yazılmayıb. Bunlar:

Hacıbala Abutalıbov, (Bakının sabiq meri),

Vaqif Əliyev - Mədəniyyət və Turizm nazirinin I müavini,

Nurlana Əliyeva – Bakı Slavyan Universitetinin rektoru,

Akif Əlizadə - AMEA-nın sabiq prezidenti,

Əli Həsənov - Azərbaycan Prezidenti yanında Dövlət İdarəçilik Akademiyasında kafedra müdiri,

Əli Həsənov - Sabiq "Qaçqınkom" sədri,

Yusif Hümbətov - "Azərsutikinti" Səhmdar Cəmiyyətinin sədri,

Nizami Xudiyev - Azərbaycan Dövlət Pedaqoji Universitetinin kafedra müdiri,

Kərim Kərimov - Yeni Azərbaycan Partiyası İcra Katibliyinin əməkdaşı,

Abel Məhərrəmov - BDU-nun sabiq rektoru,

Siyavuş Novruzov - Milli Məclisin Regional məsələlər komitəsinin sədri.

Onu da bildirək ki, YAP-ın VII qurultayında Veteranlar Şurası yaradılıb. Bu şuraya 80 yaşlı Arif Rəhimzadə sədr seçilib. Bundan əvvəlki İdarə Heyətində olan Prezident İlham Əliyev, Birinci Vitse-prezident Mehriban Əliyeva ilə yanaşı, Eldar İbrahimov, Əli Əhmədov, Arif Rəhimzadə,  Mübariz Qurbanlı, Bahar Muradova, Mixail Zabelin və Vasif Talıbov yeni İdarə Heyətində yer alıb.

İdarə Heyətinin yeni üzvlərinə gəlincə, bunlar aşağıdakılardır:

Amin İsmayılov,  Anar İsgəndərov, Rauf Əliyev, Eldar Əzizov, Musa Quliyev, Ədalət Muradov, Elnur Sadıqov, Tofiq Cahangirov, Tahir Budaqov, Hikmət Məmmədov, Azər Badamov, Aynur Sofiyeva, Ramiz Hüseynov, Fuad İbrahimov, Elmar Qasımov, Rəşad Mahmudov, Cavid Osmanov, Pərvin Kərimzadə, Samir Cəfərov, Asif Əsgərli, Tahir Mirkişili, Elşad Mirbəşiroğlu, Elnarə Akimova, Vazeh Əsgərov, Ramin Məmmədov, Əfsun Sucayev, Ülviyyə Həmzəyeva, Şahin İsmayılov, Rövşən Bayramov, Bayram Aslanov və Kamal Cəfərov.

Qeyd edək ki, YAP-ın yeni Nizamnaməsinə uyğun olaraq, Partiyanın sədri İlham Əliyev bir neçə təyinat həyata keçirib. Dövlət başçısının sərəncamı ilə Mehriban Əliyeva partiya sədrinin birinci müavini, Əli Əhmədov partiya sədrinin müavini, Tahir Budaqov partiya sədrinin müavini – Mərkəzi Aparatın rəhbəri təyin edilib. Yeni struktur islahatlarına əsasən, YAP-da İcra katibliyi Mərkəzi Aparatla əvəzlənib. YAP-ın icra katibi Əli Əhmədovun yerinə həmin səlahiyyətləri Tahir Budaqov həyata keçirəcək.

Göründüyü kimi, YAP-da bir çox klassik partiya üzvlərinə yenidən etimad göstərilməyib. Bunun səbəbi nə ilə bağlıdır və onların adları tarixdə necə qalacaq?

Son qurultayda partiyanın Nəzarət Təftiş Komissiyasının üzvü seçilən millət vəkili Elman Nəsirov  “Bakı-Xəbər”ə açıqlamasında bildirdi ki, dünyada əbədi olan bir şey var, o da dəyişikliklərdi: “Azərbaycan dövlətinin gücü də ondandır  ki, dəyişən reallıqlarla ayaqlaşa bilir. YAP-ın son qurultayı və orada qəbul edilən qərarlar bunu bir daha təsdiqlədi. Yəqin ki, qurultayda qəbul edilən qərarlarla yaxından tanışsınız. Qərarların operativ qəbulu ilə bağlı Siyasi Şuranın fəaliyyətinə xitam verildi. Çünki 80-dən artıq şəxsin bir yerə toplaşması çətin olurdu. O cür mexanizmlə bugünkü dünyanın dəyişən reallıqları ilə ayaqlaşmaq çətin idi. 40 nəfərdən ibarət İdarə Heyəti yaradıldı. Mehriban xanım Əliyeva partiya sədrinin birinci müavini təyin edildi. Partiyanın idarəetməsindən xeyli keçmiş funksioner uzaqlaşdırılıb. Ola bilər ki, həmin şəxslər partiya quruculuğuna öz töhfələrini vermiş insanlardı. Ancaq zaman dəyişir, yeni reallıqlar ortaya çıxır. Bu müddət ərzində bəzilərinin imici də partiyanın tələblərinə, məqsəd və məramlarına uyğun gəlməyə bilir. Gənc nəslə böyük etimad göstərildi. Yeni İdarə Heyətində xeyli yeni insanlar var”.

Etimad göstərilməyən şəxslərin adlarının tarixdə necə qalacağı ilə bağlı sualımıza isə millət vəklinin cavabı belə oldu: “Bu barədə konkret nəsə deyə bilmərəm. Etimad göstərilməyən insanlara da vaxtında diqqət  göstərilib. Prezidentimiz deyir ki,  hər kəs göstərdiyi xidmətə görə mükafatlandırılıb. Heç kim deməsin ki, diqqətdən kənar qalıb. Əsas bundan sonra sənin davranışın və etdiklərindi. İmkan vermək lazımdır ki,  yeni insanlar öz potensilaını ortaya qoysun. Vaxt  gələcək, bu gənclər də estafeti kiməsə verəcək. Bir də, etimaddan kənarda qalan bəzi insanlar nə zamansa yanlışa yol verdiklərinin də fərqində olmalıdırlar”.

Müstəqil politoloq Qabil Hüseynli qəzetimizə bildirdi ki, bu məsələdə əsas meyar partiyanın sıravi üzvü olmaqdır: “Elə adamlar var ki, partiyanın qurucu üzvləri olub. Böyük xidmətləri var. Partiyanın qurucuları kimi tarixə düşüblər. Onların tam etimaddan kənar qalması yaxşı deyil. Məsələn, iqtisadçı professor Əli Əlirzayev kimi adamın adını heç olmasa Veteranlar Şurasına salmalıydılar. Elə adamlar var ki, idarəetmədən kənarlaşdırılıb, ancaq partiyanın sıravi üzvü olaraq qalır. Bu normal haldır. Təbiidir ki, etimad göstərilməyənlərin sırasında hansısa yanlışlara yol verənlər də olub. Buna ən gözəl qiyməti partiyanın sədri verir. Kifayət qədər təcrübəli insandır. Onun siyasi  sistemə özünəməxsus baxışı var. Siyasi təmərküzləşmə deyilən bir anlayış var. Ölkədə bir neçə nüfuzlu siyasi partiyanın formalaşması yaxşı hal olardı. 6 partiyanın YAP-a birləşməsini müsbət hal sayıram. Çünki ölkədə siyasi təmərküzləşməyə böyük ehtiyac duyulur”.

Fəaliyyəti dayandırılan Siyasi Şuranın sabiq üzvü, son qurultayda Nəzarət Təftiş Komissiyasının üzvü seçilən Musa Musayev bu barədə hələlik danışmaq istəmədiyini bildirdi.

“Yeni Azərbaycan” qəzetinin sabiq baş redaktoru, eks millət vəkili Alqış Həsənoğlu isə qəzetimizə bildirdi ki, bu barədə ondan çox danışam olmayıb: “Bu mövzu ilə bağlı mən çox danışmışam. Ona görə də yenidən eyni şeyləri təkrarlamaq istəmirəm”.

Məhəmmədəli QƏRİBLİ

Son xəbərlər