44 günlük Vətən müharibəsində Azərbaycan qələbə qazanaraq öz ərazi bütovlüyünü təmin etdi. Bununla da Dağlıq Qarabağ münaqişəsi başa çatdı. Azərbaycan Respublikasının Prezidenti səviyyəsində dəfələrlə bəyan edilib ki, Qarabağda yaşayan ermənilər Azərbaycan vətəndaşlarıdır və onlar bizim vətəndaşlarımız olaraq daha yüksək rifah içində yaşayacaqlar.
10 dekabr Zəfər paradından sonra ermənilərin sosial şəbəkələrdəki profillərində, akkauntlarında, səhifələrində, habelə “Telegram”dakı kanallarında “Qarabağda partizan savaşı”na başlamaqla bağlı çağırışların sayının sürətlə artdığı müşahidə olunur.
Hətta həmin seqmentlərdə “partizan savaşı ilə bağlı fərdi fəaliyyət təlimatları” da yayılır.
Elçin Alıoğlu: “Qarabağda partizan savaşı” bəyanatları, faktiki olaraq, açıq-aşkar terrorçuluq fəaliyyətinə çağırışlardır”
Siyasi icmalçı Elçin Alıoğlu qeyd edir ki, Azərbaycan, Rusiya və Ermənistan arasında imzalanmış üçtərəfli anlaşmadan narazı qalan erməni millətçilərlə şovinistlər bununla iki məqsəd güdürlər. “Onlar həm Ermənistan daxilində baş nazir Nikol Paşinyana qarşı etiraz aksiyalarının intensivliyini və miqyasını artırmaq, daxili siyasi situasiyanı mümkün qədər gərginləşdirmək, həm də Qarabağda vəziyyəti ağırlaşdırmaq istəyirlər. "Qarabağda partizan savaşı" bəyanatları, faktiki olaraq, açıq-aşkar terrorçuluq fəaliyyətinə çağırışlardır. Bütün terror tərəfdarlarında olduğu kimi, belə çağırış müəlliflərinin də məqsədləri arasında əks-tərəfdə, yəni Azərbaycanda mümkün qədər sərt reaksiya yaratmaqdır.
Bəyanat müəllifləri Qarabağdakı azərbaycanlı hərbçiləri antiterror aksiyalarına sövq etmək, sonra da baş verənləri "dinc qarabağlı ermənilərə qarşı repressiyalar" kimi qələmə vermək niyyətindədirlər. Qarabağlı ermənilərin yaşamı, taleyi və gələcəyi belə bəyanatları yayanları maraqlandırmır. Onlar əsla düşünmürlər ki, Qarabağda silahlı toqquşmalar olarsa, qarabağlı erməniləri nələr gözləyə bilər”.
Akif Nağı: “Azərbaycan dövləti tərəfindən ermənilərin alışdırmağa hazırlaşdıqları o terror ocaqları tezliklə söndürülməli, məhv edilməlidir”
Qarabağ Azadlıq Təşkilatının sədri Akif Nağı da hesab edir ki, ermənilər öz ziyanlı, separatçı mövqelərindən geri çəkilmək istəmirlər, bu səbəbdən də haqsız mübarizlərini davam etdirmək niyyətlərini ortaya qoymağa cəhdlər edirlər: “Bunlar uzun illərdir bütün dünyanı, eləcə də xaricdəki erməniləri “bu ərazilər ermənilərindir” yalançı tezisinə inandırıblar, özləri də uydurduqları bu yalana inanıblar. Amma hərb meydanında gücsüzlüklərini tam məğlubiyyətə uğramaqla təsdiq etdilər. Amma məkrli əməllərindən əl çəkmirlər. Tarix boyu ermənilər bu ağır zərbələrdən məğlub olublar, ardınca isə məğlubiyyətin üzərində müəyyən oyunlar qurmağa başlayıblar. İndi də həmin xətti davam etdirirlər. Müəyyən güc mərkəzləri, müəyyən dövlətlər var ki, onlar həmişə ermənilərdən alət kimi isifadə ediblər. Həmin dövlətlər çalışırlar ki, ermənilər separatçılıqlarını davam etdirsinlər və onlar ermənilərdən Azərbaycana və Türkiyəyə qarşı istifadə etsinlər. Biz bunu bilirik ki, ermənilər separatçılıq hərəkətlərini davam etdirəcəklər, Dağlıq Qarabağın ərazisində terror aktları törədəcəklər. Onlar buna “partizan savaşı” deyirlər, amma orada partizanlıqla bağlı heç nə yoxdur, ola da bilməz. Yəni orada erməni əhali qalxsın, hansısa dəstələr yaradıb müqavimət göstərsin, belə hallar yoxdur. Sadəcə olaraq, müəyyən terrorçu təşkilatların yaratdığı erməni terrorçu qrupları var və “partizan müharibəsi” dedikdə diversiya, təxribat hərəkətləri, terror aktları nəzərdə tutulur. Ona onlar əl atacaqlar. Azərbaycan da buna hazır olmalıdır. Bu işi Azərbaycan dövləti və xalqı başlayıb və sonra qədər gedib erməni separatçılarının müqavimətini tam sındırmalıyıq. Bunun üçün səmərəli, effektiv yol seçilməlidir. Necə ki, müharibədə səmərəli, effektiv yol seçildi və müharibədən nisbətən az itki ilə çıxdıq. Müharibədə həlak olan hər bir insanımız bizim üçün əzizdir, amma müharibə itkisiz olmur, Azərbaycan da müharibədə az itkilərlə böyük nəticələrə nail oldu”.
Ermənilərin təbliğ etdikləri “partizan savaşı”nın qarşısının alınması üçün Azərbaycan dövləti tərəfindən hazırlıq işlərinin aparıldığına ümid etdiyini deyən A.Nağı hesab edir ki, erməni terrorlarının, təxribatlarının zamanında önlənməsi üçün Azərbaycan dövləti səmərəli addımlar atacaq. “Azərbaycan dövləti tərəfindən ermənilərin alışdırmağa hazırlaşdıqları o terror ocaqları tezliklə söndürülməli, məhv edilməlidir. Bu istiqamətdə addımlar atılmalıdır. Ermənilər yenə də bütün dünya boyu öz yalan təbliğatlarını davam etdirəcəklər və Azərbaycanda həm dövlət, həm də ictimaiyyət səviyyəsində bütün cəbhələrdə onların bu terrorçuluq hərəkətlərinin qarşısının alınması üçün tədbirlər həyata keçirilməlidir. Hər bir vətəndaşımız, hər bir soydaşımız bu işdə fəal olmalıdır. Sonda yenə qələbə bizim olacaq, çünki erməni separatçıları öz məqsədlərinə nail ola bilməyəcəklər. Kimlərinsə əlində alətdirlər, istifadəsiz qalacaqlar. Çünki Azərbaycan İkinci Qarabağ müharibəsində göstərdi ki, istənilən hədəfə, istənilən məqsədə az itkilərlə və səmərəli şəkildə nail ola bilir” - deyə A.Nağı vurğuladı.
İradə SARIYEVA
