“Human Rights Watch” təşkilatı Ermənistan silahlı qüvvələrinin Azərbaycanın dinc sakinlərinə və mülki obyektlərinə qarşı raket hücumları ilə bağlı apardığı araşdırmalara dair hesabat yayıb.
Təşkilat noyabr ayında Azərbaycanda yerlərdə aparılan araşdırmalar zamanı erməni qüvvələrinin ballistik raketlər, idarəolunmayan top raketləri və iriçaplı artilleriya mərmilərindən istifadə etməklə yaşayış məntəqələrinin vurulmasına dair 11 fakt qeydə aldığı bildirilir. Qeyd olunur ki, ən azı dörd halda hərbi hədəflərin olmadığı ərazilərdə mülki şəxslərə və ya mülki obyektlərə zərbələr endirilib.
“Human Rights Watch”un Avropa və Orta Asiya üzrə direktoru Hugh Villiamson bildirib ki, erməni qüvvələri dəfələrlə raketlər, idarəolunmayan raketlər və ağır artilleriyadan mülki əhalinin yaşadığı şəhər və kəndlərə müharibə qanunlarına zidd olaraq zərbələr endirib. Altı həftəlik müharibə zamanı bu hücumlar mülki insanların həyatına son qoyub, onların evlərini qanunsuz olaraq dağıdıb. Bu hadisələr qərəzsiz şəkildə araşdırılmalıdır.
Qeyd edilir ki, təşkilat Ermənistan qüvvələri tərəfindən Ağdam, Bərdə, Füzuli, Gəncə, Goranboy, Naftalan və Tərtərin şəhər, qəsəbə və kəndlərinə endirilən raket və artilleriya zərbələrini araşdırıb. Bu hesabatda endirilmiş zərbələrdən 40 mülki vətəndaşın ölümü və onlarla insanın yaralanması ilə nəticələnmiş 18 hal araşdırılıb ki, bunlar da hücumların 53 şahidi ilə fərdi danışıqlara və 12 telefon danışığına, xəbər reportajlarına və hökumətin məlumatlarına əsaslanır. “Human Rights Watch”, eyni zamanda, hücumların vaxtını və tarixini təsdiqləyən 10 hadisənin peyk görüntülərini və 9-nun sosial mediada yerləşdirilən foto və videolarını araşdırıb. Digər hücumlar gələcək hesabatlarda yer alacaq.
Əksər hallarda Azərbaycanla bağlı qərəzli hesabatlar yayan bu təşkilatın ermənilərin müharibə cinayətləri ilə bağlı hesabatını təkamül nümunəsi kimi qəbul etmək olarmı?
“Bunu müsbət qiymətləndirirəm və qurumun fəaliyyətində ciddi təkamül sayıram”
Milli Qeyri Hökumət Təşkilatları Forumunun prezidenti Rauf Zeyni qəzetimizə açıqlamasında bildirdi ki, illərdir biz Ermənistanın bu neqativ əməlləri ilə bağlı açıqlamalar verirdik: “Təəssüflər olsun ki, bəzi beynəlxalq təşkilatlar bizim haqq səsimizə dəstək vermirdi. Hətta əksəriyyəti ədalətsiz mövqe də ortaya qoyurdu. Bu da bizim cəmiyyətimizdə haqlı olaraq həmin təşkilatların fəaliyyəti ilə bağlı etirazlara səbəb olurdu. İkinci Qarabağ savaşından sonra ordumuzun qalibiyyəti öz məntiqi nəticəsini verdi. Biz həmin müddət ərzində Ermənistan tərəfindən törədilən bütün cinayətləri dünya ictimaiyyətinin diqqətinə çatdıra bildik. Xüsusilə də Ermənistanın bizim mülki əhalimizə qarşı törətdiyi hərbi cinayətlərdən boyun qaçırmaq mümkün deyil. Bütün bunların da məntiqi nəticəsi o oldu ki, hətta Azərbaycana qarşı bir çox hallarda qərəzli mövqeyilə seçilən "Human Rights Watch" kimi təşkilat da öz hesabatında Ermənistanın müharibə vəhşiliklərindən bəhs edib. Bunu müsbət qiymətləndirirəm və qurumun fəaliyyətində ciddi təkamül sayıram. İstənilən beynəlxalq təşkilat gəlib Qarabağda və ətraf rayonlarda Ermənistanın floraya, faunaya, mədəni irsə necə zərbə vurduğunu görə bilər. İstərdik ki, yalnız bəyanatla iş bitməsin. Həmin tanınmış təşkilatlar bu əməllərin törədicisi olanların beynəlxalq hərbi tribunal qarşısında cavab verməsini tələb etsin. Biz öz partnyor beynəlxalq təşkilatlarımıza lazımi məlumatlar veririk. Pandemiya bir qədər ölkəyə səfərlərin təşkilinə mane olur, ancaq əlimzdən gələni edirik ki, dünya ictimaiyyəti tam məlumatlansın”.
Ekspertin sözlərinə görə, bütün bu cinayətlərdə Ermənistan rəhbərliyinin birbaşa əli var və onlar layiqli cəzalarını almalıdır.
Məhəmmədəli QƏRİBLİ
