Dekabrın 10-da təkbətək görüş başa çatandan sonra Prezident İlham Əliyevin və Prezident Rəcəb Tayyib Ərdoğanın iştirakı ilə Azərbaycan-Türkiyə sənədlərinin imzalanması mərasimi olub.
Qeyd edək ki, Azərbaycan Respublikası ilə Türkiyə Respublikası arasında media sahəsində strateji əməkdaşlıq haqqında Anlaşma Memorandumunu Azərbaycan Respublikası Prezidentinin köməkçisi Hikmət Hacıyev və Türkiyə Respublikası Prezidenti Administrasiyasının ictimaiyyətlə əlaqələr idarəsinin rəhbəri Fəxrəddin Altun imzalayıb.
Azərbaycan və Türkiyə arasında media sahəsində imzalanan bu sənədin əhəmiyyəti nədir?
Əflatun Amaşov: “Biz dost dəstəyini heç vaxt unutmarıq”
Azərbaycan Mətbuat Şurasının sədri Əflatun Amaşov “Bakı-Xəbər”ə açıqlamasında bildirdi ki, Azərbaycan Respublikası ilə qardaş Türkiyə Cümhuriyyəti arasında media sahəsində Strateji əməkdaşlıq haqqında Anlaşma Memorandumunun imzalanmasını son dərəcə mühüm hadisə kimi dəyərləndirir. “44 günlük Vətən müharibəsi də sübut etdi ki, hər iki ölkənin mediası taleyüklü məsələlərlə bağlı birgə fəaliyyətdədir. Ancaq bu işin sistemləşdirilməsi, daha da gücləndirilməsi son dərəcə vacibdir.
Onu da bildirim ki, Azərbaycan müstəqilliyini qazandıqdan sonra hər iki ölkənin media qurumları arasında münasibətlər sürətlə inkişaf etməyə başladı. Birgə konfranslar, “dəyirmi masa”lar, tematik tədbirlər düzənləndi. Biz gördük ki, müəyyən platformalarda Türkiyə və Azərbaycanın kütləvi informasiya vasitələrinin təmsilçiləri vahid mövqedən çıxış edirlər və bu bizi sevindirdi. Azərbaycan Mətbuat Şurasının mötəbər beynəlxalq təşkilatlara üzvlüyündə türkiyəli həmkarlarımızın dəstəyini xüsusi vurğulamalıyam. Biz dost dəstəyini heç vaxt unutmarıq.
Ümumən Azərbaycan jurnalistikasının Türkiyə jurnalistikasından öyrənməli, əxz etməli olduğu peşəkarlıq vərdiş və xüsusiyyətləri çoxdur. Hesab edirəm ki, Strateji əməkdaşlıq haqqında Anlaşma Memorandumu bu kimi məsələlərin həllini də sistemləşdirəcək, təcrübə və informasiya mübadiləsini dərinləşdirəcək, ən əsası isə uzun illər əvvəl başlanmış qarşılıqlı əməkdaşlıq mərhələsinə, bir növ, ideoloji çalarlar gətirəcək.
Bəli, sistemli fəaliyyət Azərbaycanın və Türkiyənin ortaq mənafelər baxımından işbirliyi üçün imkanların genişlənməsi, konkret vəziyyətlərin müştərək müzakirəsi, görüləcək tədbirlərin koordinasiyası baxımından əhəmiyyətli rol oynayacaq. Bu isə özlüyündə ölkələrimizə qarşı yalan, iftira kampaniyalarına, dezinformasiyalara qarşı sipər olacaq”.
Müşfiq Ələsgərli: “Ortada bu iki böyük liderin iradəsi varsa və onlar bu işə xeyir-dua veriblərsə...”
Azərbaycan Mətbuat Şurasının sədr müavini, tanınmış media eksperti Müşfiq Ələsgərli də mövzunu qəzetimizə şərh etdi: “Azərbaycan və Türkiyə mediasının eyni platformada birləşdirilməsi, fəaliyyətlərinin uyğunlaşdırılması ilə bağlı çox uzun illərdir cəhd göstərilir. Bu hər kəsə bəllidir. Bir neçə il əvvəldən başlayaraq vahid Azərbaycan-Türkiyə media əməkdaşlıq platformasının yaradılması üçün təşəbbüslər irəli sürülüb, bir sıra addımlar da atılıb. Hətta bəzən bu platformanın Orta Asiyadan başlamış, Türkiyəyə qədər daha geniş arealı cəlb etməsi ilə bağlı təşəbbüslər göstərilir. Bunun əsasları çoxdur, buna zərurət həddən artıq böyükdür. Çünki bizim vahid problemlərimiz, oxşar dərdlərimiz var, dünyada eyni problemlərlə qarşılaşırıq, dünyanın bəzi ölkələri tərəfindən disskriminasiya ilə üzləşirik. Bütün bunların qarşısının alınması üçün ortaq media platformasının olmasına və bu platformanın açılmasına, bir-birinə dəstək verilməsinə zərurət var”.
M.Ələsgərli qeyd etdi ki, bu məsələ haqda çox danışılıb, bu platformanın nə üçün yaradıldığı barədə izahat verilib, sadəcə olaraq, həmişə bu təşəbbüs, bir növ, ictimai təşlilatlar, KİV vasitəsilə irəli sürülüb, bizim KİV, media təşkilatları bunu həyata keçirmək üçün təşəbbüslər göstəriblər. “İndi atılan addımla əvvəlkilərin fərqi ondan ibarətdir ki, burada artıq dövlət qurumları ən ali səviyyədə bu əməkdaşlıq platformasının yaradılmasını qeyd edirlər və bunun gerçəkləşdirilməsi istiqamətində konkret addımlar atırlar. Hələ bundan əvvəl yaz aylarında Prezidentin köməkçisi Hikmət Hacıyev Türkiyədə olub və orada media qurumları, eləcə də müvafiq dövlət strukturları ilə bir sıra sənədlər imzalayıb. Görünür ki, bu məsələ artıq hazırdır və ona görə də bu, prezidentlər səviyyəsinə qaldırılıb. Azərbaycan Respublikası ilə Türkiyə Respublikası arasında media sahəsində Strateji əməkdaşlıq haqqında Anlaşma Memorandumunun imzalanması çox müsbət bir hadisədir. Əgər media sahəsində əməkdaşlıq məsələsində prezidentlər ortaya iradə qoyublarsa, bu o deməkdir ki, bizim uzun illərdir etmək istədiyimiz, gözlədiyimiz o platforma artıq həyata keçiriləcək. Bu platformanın arxasında Türk-islam dünyasının ən böyük iki lideri dayanır. Ortada bu iki böyük liderin iradəsi varsa və onlar bu işə xeyir-dua veriblərsə, artıq bu məsələ həll olunmuş sayılır. Böyük uğurdur, böyük nailiyyətdir. Fikrimcə, bunun əhəmiyyəti həm də ona görə böyükdür ki, bu, Azərbaycan-Türkiyə platforması olmaqla yanaşı, gələcəkdə daha böyük coğrafiyanı əhatə edəcək və daha böyük nailiyyətlər əldə olunmasına səbəb olacaq”.
İradə SARIYEVA
