Ermənistanın yeni iqtisadiyyat nazirindən misilsiz ağıllı mövqe - nicatımız Azərbaycan və Türkiyənin əlindədir...

Fikrət Yusifov: “Bunun üçün qarşı tərəf, birinci növbədə, təcavüzkarlıq siyasətindən imtina etməlidir”

img

Ermənistanın yeni təyin olunmuş İqtisadiyyat naziri, “Menu Group” qida çatdırılması xidmətinin qurucusu Vaan Kerobyan bildirib ki, 10 noyabr anlaşması yerli iqtisadiyyatın blokadadan çıxarılmasıyla nəticələnəcək.

İqtisadiyyat naziri Ermənistan İctimai Televiziyasına verdiyi müsahibədə Azərbaycana yönəlik müsbət mesajlar verib və 10 noyabr sazişini bir fürsət kimi dəyərləndirib: “Perspektivdə Türkiyə limanlarından və ehtimal ki, Azərbaycan bazarından istifadə etmək imkanları qazanacağıq. Əlbəttə ki, açıq sərhədlər iqtisadiyyat üçün çox faydalıdır. Çünki rəqabət nəticəsində daha yaxşı məhsullar istehsal olunur və nəticədə iqtisadiyyatımız dünya bazarına keyfiyyətli məhsullar çıxarmaq imkanı qazanır. Üstəlik, ölkəyə ucuz və keyfiyyətli məhsullar gətirilsə, o zaman yerli istehsalımız daha da yaxşılaşacaq”.

Nazir daha sonra deyib ki, erməni ixracatçıları məhsullarını Rusiyaya və digər ölkələrə indikindən daha əlverişli yollarla çatdıra biləcəklər. Türk limanları açılacaq, daha çox imkanlar ortaya çıxacaq: “Türkiyə ilə sərhədlər bağlıdır, Rusiya bazarlarına da çıxışımız yoxdur. Ağır günlərdən keçirik. İmzalanan bəyanat bizim üçün fürsətdir. Bəlkə də Türkiyə dəniz limanlarını, Azərbaycan isə öz bazarlarını bizə açar. Əgər bu baş verərsə, bizim üçün əla fürsət olar”.

Kerobyan, həmçinin, “Bölgədəki kommunikasiyaların blokadadan çıxarılması ilə bütün imkanlardan istifadə etməyimiz üçün yeni bir proqram hazırlayacağıq”, - deyib.

Görünən odur ki, Ermənistan hakimiyyətində praqmatk mövqedən çıxış edən şəxslər də var. Onlar anlayırlar ki, təcavüzkarlıq siyasətini davam etdirməklə Ermənistan iqtisadiyyatını inkişaf etdirmək real deyil. Region ölkələri ilə normal münasibət qurmadan ölkənin inkişafını təmin etmək mümkün olmayacaq.

  • “Məsələni düzgün dəyərləndirsələr, o zaman bu, Ermənistan iqtisadiyyatının xeyrinə olacaq”

Sözügedən məsələ ilə bağlı fikirlərini “Bakı-Xəbər”lə bölüşən sabiq maliyyə naziri, iqtisad elmləri doktoru, professor Fikrət Yusifovun sözlərinə görə, Ermənistan qonşu dövlətlərlə sağlam iqtisadi əlaqələr qurmaq istəyirsə, birinci növbədə, təcavüzkarlıq siyasətindən imtina etməlidir: “Yalnız o halda Türkiyə və Azərbaycan öz qapılarını onların üzünə açacaqlar. O zaman ermənilər normal iqtisadiyyata sahib olacaqlar. Eyni zamanda, ölkənin iqtisadi və sosial problemlərini həll edə bilərlər. Ötən illər ərzində ermənilər bunu nəzərə almayaraq, ortaya işğalçılıq planlarını qoydular. Nəticədə bundan iqtisadi baxımdan ən çox itirən tərəf  Ermənistan oldu. Yeni iqtisadiyyat nazirinin səsləndirdiyi müsbət yönümlü mesajlar səmimidirsə, arxasında çirkli oyunlar dayanmırsa, o zaman buna müsbət yanaşmaq olar. Bu kimi sağlam və praqmatik mövqe dəstəklənməlidir. Yox, bir tərəfdən kommunikasiya xətlərini açıb, o biri tərəfdən öz işğalçılıq siyasətlərini aparacaqlarsa, o zaman iqtisadi münasibətlər alınmayacaq. Açılan yol həmən bağlana bilər. Ancaq məsələni düzgün dəyərləndirsələr, o zaman bu onların da xeyrinə olacaq. Çünki Türkiyə bazarı büyükdür və Ermənistana yaxındır. Azərbaycan bazarı da Ermənistanla müqayisəedilməz dərəcədə böyükdür. Bu o deməkdir ki, qarşı tərəf bundan faydalanacaq və Ermənistan iqtisadiyyatı inkişaf edəcək. İndi görək ermənilər özlərini necə aparacaqlar. Dedikləri ilə əməlləri uyğun gələcəkmi? Belə olarsa, o zaman bütün bunlar reallaşa bilər”.

Professor onu da qeyd etdi ki, nəticə etibarilə, bu, bütün tərəflərin xeyrinə olacaq.

Vidadi ORDAHALLI

Son xəbərlər