Prezident İlham Əliyev Köçəryanla Sarkisyanın şərəfini "yerlə bir elədi" - sabiq erməni prezidentlərdən səs çıxmır ki, çıxmır…
Prezident İlham Əliyev Füzuli şəhərində çıxışı zamanı əlləri Azərbaycan xalqının qanına batmış Ermənistanın sabiq dovlət başçıları Sarkisyan və Köçəryanın ünvanına sərt ifadələr işlədib: “Biz Ermənistan Ordusunu çökdürdük. Eyni zamanda, Ermənistana uzun illər rəhbərlik etmiş cinayətkarlara da dərs verdik”.
Dövlət başçısı deyib ki, Paşinyan son 2 il ərzində öz ölkəsini məhv edib: “İndi sadəcə olaraq fikirləşir ki, necə öz canını erməni xalqının qəzəbindən qurtarsın. Biz Köçəryan, Sarkisyan ordusunu məhv etdik. Onlar bizim torpaqlarımızı dağıdıblar. Onlar bu dəfə qorxaqcasına heç burunlarını soxa bilmədilər Dağlıq Qarabağ ərazisinə. Hanı sizin qəhrəmanlığınız? Döşünüzə vurmusunuz saxta qəhrəman ordenlərini. Çıxarın atın eşiyə o dəmir-dümürləri. Sizi biz məğlub etmişik. Paşinyan heç kimdir. Sizi - Köçəryan və Sarkisyan - Azərbaycan xalqının cəlladları, Xocalı cəlladları - sizi biz məğlub etmişik. Sizin ordunuzu məhv etmişik”.
Çox maraqlıdır ki, ölkə başçısının bir neçə gün əvvəl səsləndirdiyi bu fikirlərə Ermənistanın sabiq dövlət rəhbərlərindən heç bir reaksiya verilməyib. Onların bu susqunluğunun səbəbi nə ilə bağlıdır?
Əslində, Prezidentin sərt tənqid ünvanı kimi məhz Köçəryan və Sarkisyan kimi cəlladları seçməsi təsadüfi deyil. Çünki Qarabağ və ətraf rayonların işğalında onlar birbaşa iştirak ediblər. Azərbaycan xalqının başına gətirilən faciələrdə onların şəxsən əlləri olub. Bu iki şəxsin siyasi karyerası da məhz Qarabağdan başlayıb. Onlar müvəqqəti hərbi “uğurlarının” fonunda özlərini qəhrəman elan etdilər. Hətta bu təqdimat onları hakimiyyətin ən yuxarı eşelonuna gətirib çıxardı. Onlar bütün uğurlarını Qarabağ və müharibə kartı üzərində qurublar. O cümlədən, Qarabağdakı müdafiə sədlərinin keçilməzliyi ilə bağlı illüziyalar qururdular. Həmin nağıllara inanan hazırkı Ermənistan rəhbərliyi 44 günlük müharibə başlayana qədər, demək olar ki, hər gün rəsmi səviyyədə müharibə bəyanatları verir və Azərbaycanı hərbi əməliyyatlara başlamağa təhrik edirdi. Ermənistan rəhbərliyi öz ordusu haqqında ağlasığmaz miflər uydurur, onun “gücü” barədə danışırdı. Lakin 44 günlük Vətən müharibəsi Ermənistan ordusunun mifdən ibarət olduğunu çılpaqlığı ilə ortaya qoydu, erməni yalanlarını ifşa etdi. Ordumuz qarşısında duruş gətirə bilməyən işğalçı hərbi birləşmələr döyüş meydanından açıq şəkildə qaçmağa başladılar. Xarici muzdlu qüvvələrdən birtəhər özünə silahlı birləşmələr yaradan Ermənistan sonda muzdluların pulunu ödəyə bilmədiyi üçün biabırçı vəziyyətə düşdü.
Ermənistan ordusunun yalnız mifdən ibarət olduğunu artıq Ermənistanın baş naziri Paşinyan da etiraf etmək məcburiyyətində qalıb. O, “Facebook” səhifəsində canlı yayım zamanı deyib ki, Qarabağla bağlı razılaşma ordunun tövsiyəsi ilə imzalanıb. O bildirib ki, döyüş zamanı hərbi resurslar səmərəli olmayıb: “Ordu deyirdi ki, dayanmaq lazımdır. Elə məsələlər var ki, onların ya həlli perspektivi yoxdur, ya da resurslar tamamilə bitib. Ön cəbhədə döyüşənləri əvəz edən yox idi. Elə döyüşçülər var idi ki, bir ay əvəz olunmadan döyüşüb. Nəticədə rəhbərlik müharibəni dayandırmaq qərarına gəldi”.
Əslində, Ermənistan ordusu ilə bağlı uydurulan mif hələ 2016-cı ildə ordumuz tərəfindən darmadağın edilmişdi. Sadəcə, Ermənistanın hərbi-siyasi rəhbərliyi öz ölkəsinin yalançı ordu mifi ilə bağlı təbliğatını özünə təsəlli vermək üçün davam etdirirdi, amma bu gün reallıqla barışmalı oldular. Fərarilik edənlərin sırasında Köçəryan və Sarkisyan da olub. Köçəryan bir dəfə Qarabağa gəldi. Ancaq Azərbaycan Ordusunun 90-cı illərdəki Ordu olmadığını gördükdən sonra qaçıb İrəvandakı evində gizləməyə üstünlük verdi. Bu baxımdan da, sabiq Ermənistan prezidentlərinin İlham Əliyevin dəqiq hədəfə ünvanlanan ittihamlarına cavab verməyə nə üzləri var, nə də arqumentləri.
Məhəmmədəli QƏRİBLİ
