Qarabağ Azadlıq Təşkilatının adında və platformasında islahat zərurəti - Akif Nağının planları...

img

Ölkədə Qarabağın azadlığı ilə bağlı bir çox qurumlar və Qeyri Hökumət Təşkilatları (QHT) fəaliyyət göstərir. Bu təşkilatların əksəriyyəti Qarabağ və ətraf 7 rayon işğal altında olduğu dönəmdə təsis olunub. Hətta adları belə Qarabağın azadlığı ilə uzlaşan bu təşkilatların bundan sonra hansı istiqamətlər üzrə fəliyyət göstərəcəkləri maraqlıdır. Çünki faktiki olaraq, Qarabağın və ətraf rayonların azad olunması problemi öz həllini tapıb.

Belə təşkilatlardan biri də Akif Nağının rəhbərlik etdiyi Qarabağ Azadlıq Təşkilatıdır (QAT). Azərbaycanda və ölkəmizin xaricində kifayət qədər fəallıq göstərən, Qarabağın azadlığı ilə bağlı ardıcıl mövqe ortaya qoyan bu qurumun gələcək fəaliyyəti, ad və proqramında dəyişikliyin olub-olmayacağı ilə bağlı məsələyə aydınlıq gətirmək üçün Akif Nağı ilə əlaqə saxladıq.

  •  “Zəngəzurun da azad edilməsi bizim hədəfimizdədir”

QAT sədri “Bakı-Xəbər”ə açıqlamasında bildirdi ki, təşkilat missiyasını hələ tam başa çatdırmayıb: “Biz ilk təsis toplantımızı keçirəndə dostlarımız deyirdi ki, QAT-ın ömrü qısa olsun. Çünki düşünürdülər ki, Qarabağ nə qədər tez azad olunarsa, biz də o qədər tez fəaliyyətimizi yekunlaşdıra bilərik. Bunlar, təbiidir ki, xoş arzular idi. Sonradan bu yöndə bir çox başqa təşkilatlar da yarandı. Adları müxtəlif olsa da, onlar da qarşılarına Qarabağın azad olunmasını hədəf qoydular. Hamı bizə deyirdi ki, qarşınıza çox çətin, reallaşması asan olmayan bir hədəf qoyubsunuz. Etiraf edək ki, Qarabağın işğaldan belə tez bir zamanda azad olunacağına çoxları inanmırdı. Amma şükürlər olsun, bu məqsədə nail olduq. Bizim fəaliyyətimiz də elə buna yönəlmişdi. Təşkilatımızın bütün proqram və konsepsiyalarında bildirilirdi ki, bu ağır missiyanı dövlət yerinə yetirməlidir, biz isə prosesə əlimizdən gələn dəstəyi verə bilərik. Dövlət bu missiyanı yerinə yetirdi. Hazırda torpaqlarımız işğaldan azad edilib. Bu mənada razıyam ki, QAT-ın qarşısına qoyduğu hədəfə artıq çatılıb. Ancaq mən hesab edirəm ki, biz son qələbəyə kimi fəaliyyətimizi davam etdirməliyik. Hesab edirik ki, Xankəndi və digər ərazilərimizdə Azərbaycan hakimiyyəti tam bərpa olunmalıdır və bunun olacağına əminik. Eyni zamanda, tarixi Qarabağ ərazisinin bir hissəsi Zəngəzurdu. Bilirsiniz ki, Ordubada kimi Qarabağın ərazisi olub. Zəngəzurun  da azad edilməsi bizim hədəfimizdədir. Biz bu məsələni də qarşımıza hədəf qoymuşuq. Biz həm də erməni yalanları və saxta təbliğatının ifşa olunması istiqamətində fəaliyyətimizi davam etdirəcəyik”.

QAT sədrinin sözlərinə görə, bəzi yeniliklərin edilməsi zərurəti də var: “Təşkilatın konfransını çağırıb bəzi məsələləri müzakirə edə bilərik. Ola  bilər ki, adımızı və ya Nizamnamə və Proqramımızda müəyyən detalları dəyişək.  Nəzərinizə bir məsələni çatdırım ki, QAT strukturlaşmış və tam oturuşmuş bir təşkilatdı. Ölkənin bir çox yerlərində və xaricdə  təmsilçiliklərimiz var. Təşkilata Akif Nağı və ya başqası da sədrlik edə bilər. Bunun fərqi yoxdur. Çalışmalıyıq ki, QAT-ın topladığı potensialdan dövlətimizin və  millətimizin naminə istifadə edək”.

Müsahibimizin sözlərinə görə, Zəngəzurun azad olunması ilə bağlı məsələ reallıqdan doğan tələb deyil, bu, 2000-ci ildə təşkilatın qəbul etdiyi Proqramda öz əksini tapıb.

Məhəmmədəli QƏRİBLİ

 

Son xəbərlər