Məlum olduğu kimi, Fransa Senatı hökuməti qondarma “Dağlıq Qarabağı” tanımağa çağıran məsləhət xarakterli qətnaməni müzakirəyə çıxarıb. Müzakirədən sonra Senat 305 səs lehinə, 1 səs əleyhinə olmaqla həmin qətnaməni qəbul edib.
Qətnamənin qəbulundan dərhal sonra Fransa Xarici İşlər Nazirliyinin Dövlət Katibi Jean-Baptiste Lemoine məsələyə münasibət bildirib. O deyib ki, Fransanın separatçı "Dağlıq Qarabağın müstəqilliyini" birtərəfli qaydada tanıması heç kim üçün faydalı olmayacaq. Diplomat onu da deyib ki, bu addım Fransa hökumətinin siyasətini əks etdirmir: “Dağlıq Qarabağ münaqişəsinin həlli təktərəfli deyil, iki tərəf arasındakı dialoqdan asılıdır. Bu gün tərəflər həmsədrlərin (ATƏT-in Minsk Qrupunun - Fransa, Rusiya, ABŞ) dialoqu davam etdirmək üçün dəstəyinə ehtiyac duyur”. Lemoine əlavə edib ki, Ermənistan da daxil olmaqla, dünya birliyi Dağlıq Qarabağın "müstəqilliyini" tanımayıb.
Azərbaycan Xarici İşlər Nazirliyi də Fransa Senatında qəbul edilmiş “Dağlıq Qarabağ Respublikasının tanınması zərurəti” adlı qətnamənin qəbuluna sərt etiraz edib: “Öncə qeyd etmək istərdik ki, Fransa Senatında qəbul edilmiş “Dağlıq Qarabağ Respublikasının tanınması zərurəti” adlı qətnamə təklifi bir qrup qatı ermənipərəst senator tərəfindən irəli sürülüb. Azərbaycan Respublikasının Fransadakı Səfiri qətnamənin səsverməsindən bir gün öncə Senatın dinləmə prosedurlarına uyğun olaraq Senat üzvləri qarşısında çıxış edib və qətnamə təklifi ilə bağlı, burada əks olunan birtərəfli və həqiqətə uyğun olmayan məqamlarla bağlı ətraflı məlumat təqdim edib. Buna rəğmən, Senat tərəfindən tamamilə qərəzli qətnamənin qəbul edilməsi yalnız təxribat kimi qiymətləndirilə bilər. Görünür, Fransa erməniləri münaqişə mövzusundan seçki məqsədləri üçün geniş şəkildə istifadə edirlər”.
Qeyd edilib ki, Senatın qəbul etdiyi qətnamənin hüquqi qüvvəsi yoxdur: “Lakin qətnamənin siyasi məna kəsb etdiyini nəzərə alaraq, vasitəçi mandatı daşıyan bir ölkənin belə bir qətnamə ilə çıxış etməsi ölkənin bitərəfliyini ciddi şübhə altına alır. Bu, həmçinin, Azərbaycan ictimaiyyətində Fransanın ədalətli vasitəçi nüfuzuna xələl gətirir. Əlbəttə, onu da qeyd etməliyik ki, Fransa Respublikasının münaqişənin həlli ilə bağlı rəsmi mövqeyi dövlətin yüksək səviyyəli rəsmiləri, o cümlədən ölkə Prezidenti və xarici işlər naziri tərəfindən səsləndirilib. Fransa Azərbaycanın ərazi bütövlüyünü dəstəkləyir və bu mövqe istər ikitərəfli çərçivədə, istərsə də Avropa İttifaqı ilə imzalanan sənədlərdə öz əksini tapıb. Fransanın Avropa və Xarici İşlər üzrə Nazirliyinin Senatda keçirilən müzakirələrdə çıxış edən dövlət katibi də rəsmi mövqeyi çıxışında ifadə etdi. Fransa Senatının qərəzli qətnamələr qəbul etmək əvəzinə bölgədə sülh, sabitlik və tərəqqiyə xidmət edən fəaliyyətlə məşğul olması həm Fransanın maraqlarına cavab verər, həm də bölgənin dayanıqlı inkişafına yardımçı olardı”.
Məlum olduğu kimi, Fransa eyni zamanda Qarabağ münaqişəsini nizamlayan ATƏT Minsk Qrupunun həmsədr ölkələrindən biridir. Məsələyə münasibətdə qəti neytral olmadığını təsdiqləyən ölkənin bu formatda təmsil olunması nə dərəcədə doğrudur və Fransanı həmsədrlikdən uzaqlaşdırmağın vaxtı çatıbmı?
“Azərbaycan dövləti təcili şəkildə Fransanın Minsk Qrupunun həmsədrliyindən uzaqlaşdırılması ilə bağlı tələb irəli sürməlidir”
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Fransa Senatının qəbul etdiyi bu saxta qətnaməni Azərbaycan cəmiyyəti çox böyük narahatlıqla qarşılayıb: “Senatın qəbul etdiyi bu qətnamə tövsiyə xarakteri daşısa da, həmin ölkənin problemə olan münasibətini açıq-aşkar ortaya qoyur. Bizim üçün bu, kağız parçasından başqa bir şey deyil. Hesab edirəm ki, bu qərarın verilməsinin təzyiq xarakterli əhəmiyyəti var. Biz buna qarşı adekvat addımlar atmalıyıq. Azərbaycanla Fransanın ciddi əlaqələri var. Bu münasibətlər bütün sahələri əhatə edir. Xüsusilə də iqtisadi sahədə ciddi münasibətlər qurulub. Hazırda Azərbaycanda Fransanın 59 şirkəti fəaliyyət göstərir. Bununla yanaşı, Fransa Qarabağ problemilə bağlı neytral qalmaq öhdəliyini daşıyır. Çünki bu ölkə Minsk Qrupunun həmsədridir. Azərbaycan dövləti təcili şəkildə Fransanın Minsk Qrupunun həmsədrliyindən uzaqlaşdırılması ilə bağlı tələb irəli sürməlidir. Bunu da Fransanın açıq şəkildə tərəf olması ilə izah etməlidir. Fransanın həmin formatda olub-olmaması heç nəyi dəyişmir. Çünki Azərbaycan öz problemini Ordusunun gücü ilə həll etdi və həmin təşkilatın fəaliyyəti bununla da sıfıra endi. Buna baxmayaraq, təpkilərimizi göstərməliyik. Fransa görməlidir ki, Azərbaycan belə məsələyə biganə qalmır. Bununla bağlı Rusiya da ciddi narahatlıq keçirir. Çünki bununla Fransa Rusiyanın vasitəçiliyi ilə əldə olunan razılaşmanı pozmağa çalışır. Belə addımı ilə Fransa həm də Türkiyəni hədəf almış olur. Artıq Fransanın öz XİN-i də bunun hökumətin mövqeyi olmadığını bildirib. İstənilən halda, biz etirazlarımızı bildirməliyik. Ən əsası da, Fransanın Minsk Qrupunun həmsədrliyindən uzaqlaşdırılmasını tələb etməliyik”.
Partiya sədrinin sözlərinə görə, Fransa prezidenti Makronun tutduğu açıq ermənipərəst mövqe də sübut edir ki, həmin ölkənin hökuməti bizə qarşı qərəzlidir.
Məhəmmədəli QƏRİBLİ
