24/11/2020 13:19
728 x 90

Almaniya parlamenti şərəfli “Boz qurd”lara qarşı kampaniyada - Türkiyə ülküçülərinin reaksiyası yetərlidirmi... Azərbaycandan baxış...

Faiq Ələkbərli: “Türkiyədə Almaniyanın bu ədalətsiz, haqsız qərarına qarşı müəyyən etirazlar dalğası yaranıb”

img

Almaniya parlamentinin bir qrup deputatı təmsil olunduqları parlamentə bu ölkədə fəaliyyət göstərən Türkiyə millətçilərinin təmsil olunduğu “Boz qurd”lar təşkilatının rəsmən qadağan olunmasını tələb edən layihə təqdim etməyə hazırlaşırlar. Onlar “Boz qurd”ları “ekstremist”, “millətçi” təşkilat sayırlar. Maraqlıdır ki, onlar bu qərara Fransada “Boz qurd”lar təşkilatının fəaliyyətinin qadağan edilməsindən sonra gəliblər.

Qanunvericilik orqanının aşağı palatası belə qərara gəlib ki, onların ölkəsində fəaliyyət göstərən “Boz qurd”lar təşkilatı Türkiyə Prezidenti Rəcəb Tayib Ərdoğanın millətçi ideologiyasını dəstəkləyirlər. Buna görə də onlar həmin petisiyanı dəstəkləyirlər və bunun qanunvericilik orqanına təqdim edəcəklər ki, Almaniyada bu “qruplaşma”nın fəaliyyətinə “ciddi nəzarət” olunmalıdır. Həmçinin, bildirilir ki, Almaniyada 11 min türk “sağ ekstremist qüvvə” var.

Qeyd edək ki, bu ilin noyabr ayının əvvəlində Fransada “Boz qurd”lar təşkilatının fəaliyyəti rəsmən qadağan edilib. Fransa iddia edir ki, bu həmin təşkilatın bu ölkədə qondarma “erməni soyqırımı” abidəsinə “hücum etdiyindən” sonra baş verib.

Bildirək ki, bu təşkilatın fəaliyyətinin Fransada qadağan edilməsi, əslində, həmin ölkədə türklərə qarşı təhqir, təhdid kampaniyasının davamıdır, ermənilər türklərə hücum edərək onları təxribatlara çəkiblər, onlar da ləyaqətli türk övladı kimi düşmənə lazımi cavab veriblər.

Bir məsələni də xüsusi vurğulayaq ki, Almaniya deputatlarının “millətçi”, “ekstremist” adlandırdıqları “Boz qurd”ların R.T.Ərdoğanın nəzarəti altında olması iddiası da əsassızdır. Bilirik ki, “Boz qurd”çuluq ideologiyası Milliyyətçi Hərəkat  Partiyasının (MHP)nəzarəti altındadır, məhz MHP milliyyətçi platformadan çıxış edir.

Almaniya deputatlarının ortaya atdığı bu məsələyə, baş verən bu hadisəyə Türkiyədəki millətçilərin, “Boz qurd”ların reaksiyası yetərli oldumu?

  • “...türklərə qarşı atdıqları bu xoşagəlməz addımlara Türkiyə və Azərbaycan, eləcə də digər türk dövlətləri birləşərək birlikdə cavab verməlidirlər”

AMEA-nın Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli məsələyə bu cür yanaşır: “Fransa, Almaniya və Hollandiyanın parlamentləri bir-birinin ardınca Trükiyəyə bağlı olan ülkü ocaqlarının bağlanması ilə bağlı qərarlar qəbul etməyə başlayıblar. Qeyd edim ki, ilk olaraq, Fransa, onun ardınca Hollandiya, Almaniya belə bir qərar qəbul etdi. Maraqlıdır ki, bu hadisə Azərbaycan və Ermənistan arasındakı 44 günlük müharibə dövrünə təsadüf etdi. Ancaq Hollandiya və Almaniyada isə müharibə Azərbaycanın qələbəsi ilə başa çatdıqdan, noyabrın 10-dan sonra bu qərarlar qəbul edilib. Fransa, ümumiyyətlə, həm ülkü ocaqlarının bağlanmasına qərar verdi, eyni zamanda, qondarma “DQR”in “müstəqilliyini” tanımaqla bağlı bəyanat səsləndirib. Hollandiya da həm müharibədən əvvəl, həm müharibə dövründə, həm də müharibə sonrası Azərbaycana və Türkiyəyə qarşı çıxışları davam edir.

Almaniyada xüsusən də son illər Azərbaycan və Türkiyəyə qarşı mənfi münasibətlər artmağa başlayıb. Orada “Yaşıllar” partiyasında təmsil olunan kürd kökənli Cemil Demir və kürd kökənli Sevim Dağdələn son zamanlar ülgü ocaqlarının bağlanması ilə bağlı daha çox “fəallıq” nümayiş etdiriblər və Federal Məclis tərəfindən qəbul olunmasına nail olublar. Türkiyədə Almaniyanın bu ədalətsiz, haqsız qərarına qarşı müəyyən etirazlar dalğası yaranıb, xüsusən də Milliyyətçi Hərəkat Partiyasının da bəzi açıqlamaları var. Düzdür, hələ ki, Türkiyə hökumətinin bu qərarı pisləməsi ilə bağlı bir qərara rast gəlməmişəm. Ümumiyyətlə, bilirik ki, indiyə qədər həmişə Türkiyə hökuməti bu kimi ədalətsiz qərarlarına görə Avropa ölkələrini tənqid edib. Prezident Rəcəb Tayib Ərdoğan da Avropanın, xüsusən də Fransanın, Hollandiyanın, Almaniyanın istər türklük, istər islamla bağlı qəbuledilməz fikirlərini həmişə tənqid edib. İndi Almaniya “Boz qurd”ları daha çox ona görə Ərdoğanla bağlayır ki, Milliyyətçi Hərəkat Partiyası ilə Ədalət və İnkişaf Partiyası birgə “Cumhur” ittifaqı qurublar. Ona görə də onlar ülgüçüləri (onlar “Boz qurd” adlandırır) Ərdoğanla bağlamağa cəhd edirlər. Təbii ki, ülkü ocaqları da həmişə Milliyyətçi Hərəkat Partiyasına bağlı olub, bilirik ki, son dövrlər də MHP Rəcəb Tayib Ərdoğanın qurduğu hökuməti dəstəkləyir. Ona görə belə iddia edirlər. Fransa, Hollandiya və Almaniya parlamentlərinin bu cür qərar qəbul etməsi heç də ürəkaçan deyil, ülküçülüyə, türkçülüyə, islamçılığa qarşı belə yanlış mövqe ortaya qoyublar. Onların bu cür mövqe göstərməsi, sözün açığı, Avropanın gələcəyinin qaranlıq olacağına işarə edir. Çünki bu artıq dinlər və mədəniyyətlərarası bir savaşa çevrilir. Bilirsiniz ki, islam dininə qarşı Fransada, Hollandiyada, Danimarkada bir çox halda hətta dövlət tərəfindən çox dözülməz bir vəziyyət yaranıb. Bu ölkələrin “Boz qurd”lar təşkilatını qapatması, türklüyə qarşı hücuma keçməsi təkcə Türkiyə deyil, həm də Azərbaycana olan münasibətdir. Çünki bütün anlamlarda dünyada da, regionda da Azərbaycanın və Türkiyənin mövqeyinin güclənməsi Fransanı, Almaniyanı, Hollandiyanı və digər ölkələri çox ciddi şəkildə narahat edir. Xüsusən də Azərbaycanın 44 günlük müharibədən qələbə ilə çıxmasından və Türkiyənin də Azərbaycana çox ciddi dəstək verməsindən, hər an yanımızda olmasından ciddi narahatlıq keçirirlər. Hesab edirəm ki, bütün bunlar Türkiyəyə və Azərbaycana eyni dərəcədə basqıdır, təzyiqdir. Azərbaycanla Türkiyə də bu məsələdə birgə hərəkət etməlidirlər. Çünki başqa yolumuz yoxdur”.

44 günlük müharibə dövründə də, 10 noyabrdan sonra da Avropada Türkiyə və Azərbaycan türklərinə qarşı ciddi təhlükələr meydana çıxdığını deyən F.Ələkbərli qeyd etdi ki, Polşadakı kimi, ABŞ-da və Avropa ölkələrində də bəzi insanlarımızın həyatı ilə bağlı təhlükələr var. “Hətta məlumatıma görə, İsveçdəki Azərbaycan təşkilatlarına qarşı da İsveç hökuməti tərəfindən də müəyyən təzyiqlər var. Yəni İsveç hökuməti də ermənilərin və digərlərinin təzyiqi altında məhz Azərbaycan təşkilatlarına qarşı bu cür xoşagəlməz hallara yol verir, onların bağlanmasını tələb edir. Bu gün dünyanın ən demokratik ölkəsi sayılan İsveçdən də bu cür təhdidlər alırıqsa, sözün açığı, xoşagələn hal deyil. Fransa, Hollandiya, Almaniyanın, eləcə də başqa Avropa ölkələrinin ülgü ocaqlarına, türklərə qarşı atdıqları bu xoşagəlməz addımlara Türkiyə və Azərbaycan, eləcə də digər türk dövlətləri birləşərək birlikdə cavab verməlidirlər” - deyə F.Ələkbərli vurğuladı.

İradə SARIYEVA

Son xəbərlər