İŞİD və PKK-nın raketləri Ermənistana necə gəlib çıxıb...

İbrahim Rüstəmli: “ANAMA həmin qurğuların məhv edilməsi üçün fəaliyyətə başlayıb”

img

Erməni işğalçı qüvvələri Azərbaycanın dinc əhalisini atəşə tutmaq üçün kustar üsulla hazırlanmış silahlardan istifadə edirlər. Bu barədə ANAMA-nın əməkdaşı Musa Məmmədov deyib.

M.Məmmədov bildirib ki, bu cür atıcılardan Yaxın Şərqdəki münaqişələrdə İŞİD, PKK terror təşkilatları tərəfindən istifadə olunub: “Eyni zamanda, mərmilər də kustar üsulla hazırlanıb. Hazırda Rusiya tərəfindən istehsal olunan bu tip “M-24F” raketləri var ki, bunlar əsasən iki cür modifikasiyada olub - maksimum 7 və 11 km məsafəyə qədər atılanlar və buna uyğun olaraq da partlayıcı çəkiləri 18 və 27 kq olanlar. Lakin kustar üsulla hazırlanan raketlərin uçuş məsafəsi 18 km-ə qədər, partlayıcı maddəsi isə 40 kq-a qədər artırılıb ki, daha böyük dağıntılar törətsin. Düşmən bu raketlərlə Azərbaycanın yaşayış məntəqələrinə çoxsaylı atəş açıb və infrastruktura böyük ziyan verib, mülki insanların ölümünə səbəb olub”.

Maraqlıdır, bu raketləri Ermənistan ordusu necə əldə edib?

  • “Ermənistan terroru dəstəkləyən ölkə olduğu üçün İŞİD və PKK vasitəsilə kustar üsulla hazırlanmış raketləri əldə edib”

Tanınmış hərbi ekspert İbrahim Rüstəmli “Bakı-Xəbər”ə bildirdi ki, Ermənistan beynəlxalq terrorun ən fəal üzvlərindən biridir: “Terror törədən və dəstəkləyən ölkələr arasında ilk pillələrdə məhz Ermənistan dayanır. Ermənistan terroru dəstəkləyən ölkə olduğu üçün İŞİD və PKK ilə əlaqəsi var. Silahları da onlardan əldə edirlər. Onu da deyim ki, Ermənistanın silahlanmasında mövcud olan bütün silah sistemlərinin 10-15 faizi kənar ölkələrdən təmin olunur. Bu silahlar yardımla, kreditlə və s. yollarla verilib. Təcavüzkar ölkə müxtəlif növ raket və silahlardan istifadə etdi. Təəssüf  ki, onlar bu silahlarla yaşayış məntəqələrinə atəş açdılar, çoxlu sayda vətəndaşımız kustar üsulla hazırlanmış raketin qurbanı oldu”.

Həmsöhbətimiz onu da əlavə etdi ki, Qorqan kəndi yaxınlığında düşmənin örtülü mövqelərinin birində kustar üsulla hazırlanmış raket qurğusu var idi. Biz bu tip qurğuları Suriyada, İraqda gedən döyüşlərdə görmüşük: “Bunlar da sübut edir ki, həmin qurğuları ermənilərin xaricdən cəlb etdiyi terrorçular hazırlayıb. ANAMA həmin qurğuların məhv edilməsi üçün fəaliyyətə başlayıb”.

Günel CƏLİLOVA

Son xəbərlər