Rusiya Prezidenti Vladimir Putin Ermənistanın Baş naziri Nikol Paşinyana qarşı xəyanət ittihamlarının əsası olmadığını bildirib. O bu barədə "Rossiya 24" kanalının efirində bəyan edib.
Putin bununla bağlı fikirlərini belə ifadə edib: “Ona (Paşinyana) qarşı hansısa xəyanət haqqında ittihamların əsası yoxdur. Paşinyan satqın deyil, sonadək vuruşdu. Hələ bir ay əvvəl mən Əliyevi hərbi əməliyyatları dayandırmağa razı sala bilmişdim, ancaq bir şərtlə ki, dinc sakinlər Şuşaya buraxılsın. Ancaq Paşinyan bundan imtina etdi. 19-20 oktyabrda bir neçə telefon danışığı oldu. Artıq o zaman Azərbaycan Ordusu Qarabağın cənub hissəsində nəzarəti ələ almışdı. Bu zaman Əliyevi hərbi əməliyyatları dayandırmağa inandırmaq mümkün oldu. Ancaq köçkünlərin Şuşaya qayıtması şərti ilə. Ancaq Paşinyan birbaşa dedi ki, bu məsələdə Ermənistan və Qarabağ üçün təhlükə görür. Təhlükənin nədən ibarət olduğu mənə aydın deyildi. Axı dinc sakinlərin erməni tərəfinin nəzarəti və Rusiya sülhməramlılarının müşayiəti ilə köçurülməsi nəzərdə tutulurdu. Baş nazir isə mənə dedi ki, onlar buna gedə bilməzlər və mübarizə aparacaqlar. Buna görə də Paşinyanı satqınlıqda ittiham etməyin əsası yoxdur. Onun bunu düzgün edib-etməməsi isə başqa məsələdir”.
Bununla belə, Rusiya Prezidenti məlum bəyanatdan sonra İrəvanda baş verənlərlə bağlı bildirib ki, Ermənistandakı güc strukturları cəmiyyəti içəridən parçalamaq imkanında deyillər. Putinin sözlərinə görə, müharibə edən və ya yenidən başlaya biləcək döyüş əməliyyatları təhlükəsi ilə üzləşən ölkə özünü belə aparmamalıdır. O cümlədən, cəmiyyəti içəridən parçalamaq üçün hakimiyyətin təşkili sahəsində də. Onun fikrincə, bu, qəbuledilməz, əks təsirli və son dərəcə təhlükəlidir.
Göründüyü kimi, Putin bu açıqlaması ilə Paşinyanın Qarabağ döyüşlərində xəyanət etmədiyini bildirdi. Hansı ki, 10 noyabr razılaşmasından üzü bəri Ermənistanda bir sıra qüvvələr Paşinyanı xəyanətdə ittiham edirlər. Əslində, Paşinyan Şuşa azad ediləndən sonra dayanmasaydı, o zaman Xankəndi də əldən çıxacaqdı və ermənilər bütün Dağlıq Qarabağı itirəcəkdilər.
Maraqlıdır, Putinin bu açıqlaması Paşinyanın daxili siyasi vəziyyətinə hansı təsirləri göstərəcək? Söhbət onun bundan sonra hakimiyyətdə qalmaq perspektivlərindən gedir. Nəzərə almaq lazımdır ki, 10 noyabır razılaşmasından sonra Paşinyanın istefası ilə bağlı ölkə daxilində çağırışlar artır.
“Bu səbəbdən Rusiya Paşinyanın keçid dövrü üçün hakimiyyətdə qalmasında maraqlıdır”
Məsələyə münasibət bildirən politoloq Elşən Manafovun sözlərinə görə, Putinin məlum fikirləri Paşinyanın öz hakimiyyətini qorumasına kömək edə bilər: “Əvvəla Putinin Qarabağla bağlı açıqlamaları Azərbaycan ictimaiyyətində müəyyən mənada məmnunluq yaratdı. Bildirdi ki, hərbi əməliyyatlar Azərbaycan ərazisində gedirdi. Beynəlxalq hüquqa görə Qarabağ həmişə Azərbaycanın ayrılmaz hissəsi olub. KTMT qarışa bilməzdi, çünki Azərbaycan Ermənistana müdaxilə etməyib. Bununla yanaşı, Putin qeyd etdi ki, indiki şəraitdə Ermənistanda Paşinyanın istefasını tələb edən dairələr bununla vəziyyətin daha da gərginləşməsinə şərait yarada bilərlər. Bu o deməkdir ki, “Qarabağ klanı” kartblanş alıb hakimiyyətə gəlsə və revanşa hazırlaşsa, bu, Ermənistan dövlətinin sonunu yaxınlaşdıra bilər. Bütün hallarda, Putinin bu açıqlaması Paşinyanın hakimiyyətdə qalmasına müsbət perspektiv vəd edir. Düzdür, Putin Paşinyan iqtidarının həyata keçirdiyi siyasətdən məmnun deyildi. Çünki Paşinyan Sorosun adamı olaraq Ermənistanı Rusiyanın təsir dairəsindən çıxarmaq istəyirdi. Bu, Birləşmiş Ştatların hakim dairələrinin siyasi istibleşmenində Cənubi Qafqaz uğrunda gedən geosiyasi mübarizədə düşünülmüş bir layihədir. Gürcüstandan sonra Ermənistanı da Rusiyanın təsir dairəsindən çıxarmaq istəyirlər. Bu mənada, Putinin Qarabağ münaqişəsində loyal mövqe tutub beynəlxalq hüquq normalarına hörmətlə yanaşması, həm də dolayısı ilə Paşinyan iqtidarını Ermənistanda hakimiyyətdən uzaqlaşdırma kimi təsir bağışlayırdı. Ancaq indiki şəraitdə Ermənistanda siyasi qarşıdurmanın güclənməsi Kremlə sərf etmir. Çünki vətəndaş qarşıdurması ölkədə xaosa gətirib çıxara bilər. Bütün bunların Rusiyanın müttəfiqi olan bir ölkədə baş verməsi Moskvanın maraqlarına cavab vermir. Putin uzaqgörən dövlət xadimi olaraq bilir ki, “Qarabağ klanı” belə hakimiyyətə gəlsə, Ermənistan müharibə aparmaq gücündə deyil. Bu səbəbdən Rusiya Paşinyanın keçid dövrü üçün hakimiyyətdə qalmasında maraqlıdır”.
Politoloq onu da qeyd etdi ki, parlamentdə çoxluq Paşinyanın xeyrinə olduğu üçün müxalifətin hüquqi baxımdan onu istefaya göndərmək imkanı yoxdur.
Vidadi ORDAHALLI
