Bunun adı videokonfrans deyil.
Bunun adı özünü ciddi siyasi qurum adlandırıb ölkədə və dünyada gedən siyasi prosesləri müzakirə etmək deyil.
Bunun adı heç adi söhbət də deyil.
Bunun adı kompüter arxasına keçib qarğabazarı salmaqdır.
Vəssalam.
Hə, Milli Şura Koordinasiya Mərkəzi üzvlərinin yeni videokonfransının görüntüləri ortaya çıxıb. Rəzalətmi deyək, biabırçılıqmı deyək? Bəlkə özünüifşa?
Hə, özünüifşa. “Zaryadka”sı qurtaran Əli Kərimlinin dediklərinə fikir verdinizmi?
“Qısa müddətdə səfərbər olmalıyıq. Ən azından feysbukda fırtınanı əsdirmək imkanımız daha da artmalıdı. 1 sutkadan sonra oturub hadisələrə reaksiya verməklə nəyəsə nail ola bilmərik. Nəsə varsa, anındaca...”.
Fikir verdinizmi? Bunlar real siyasətdə yoxdular axı. Artıq özləri etiraf edirlər, Facebook “qəhrəmanları”. Bunların, bu dırnaqarası siyasətçilərin təfəkkürüdür bu. Onların siyasətlə bağlı düşüncələri kiminsə statusuna, videosuna, sosial şəbəkələrdə paylaşımlarına nə qədər “like” qoyulmasından ibarətdir. Sosial şəbəkələrdə siyasi ab-hava yaratmaq üçün isə böyük trol ordusu saxlayırlar. Heç kimə sirr deyil ki, 100 üzvü olmayan Şura üzvlərinin hərəsinin 10-15 profili var. Telefonlarını normal “zaryadka”ya qoya bilmirlər, fırtına əsdirəcəklərmiş. Adam neçə aydı bar-bar bağırır ki, tam blokadaya alınıb, internetə, sosial şəbəkələrə çıxışı məhdudlaşdırılıb. Amma videokonfransa qoşulub hamını sosial şəbəkələrdə fəallığa çağırır.
Ümumiyyətlə, Milli Şura üzvlərinin keçirdikləri son videokonfranslar bu adamların nə qədər qeyri-ciddi olduqlarından da xəbər verir. Amma bu qeyri-ciddilik fonunda yenə də maraqlı bir məqamı etiraf edib ifşa olunurlar. Şuranın əsas ruporlarından olan Osmanqızı TV-nin verilişləri gedən vaxtın düzgün seçilmədiyini deyən Vidadi Mirkamal bidirir:“Eyni saatda Türkiyənin “Eşkiya dünyaya hökmdar olmaz” teleserialı nümayiş olunur. Camaat da bu seriala baxır. Həmin vaxt efir toqquşur və bu, baxışı kəskin aşağı salır!
Burdan nə nəticə çıxarmaq olar? Əvvəla bir serial və onun xəyal “ürünü” olan qəhrəmanlarının başına gələnlər bu adamların qarğabazarından, verilişlərindən daha maraqlıdır. Və bu serial yayımlananda minlərlə azərbaycanlı onu seyr edir. Şura üzvü Gültəkin Hacıbəyli isə seriala baxanları aşağılayan ifadə işlədir. Ümumiyyətlə, on beşə qədər saxta profilə malik, Kərimli demişkən Facebookda fırtına əsdirən bu xanımın dili təhqir və söyüşə öyrəncəlidir. Ötən videokonfransda cinsi azlıqları təhqiq edən Hacıbəyli, bu dəfə Nemət Pənahlının hədəfə aldı. Digərləri də ona qoşulub gülüşdülər.
Gültəkin Hacıbəylinin isterikası son videkonfransda lap “gül vurur”. Onun iclas iştirakçılarına: “Ay millət, siz niyə belə şeysiz, bə pessimistsiz? Nə 2025? Mən hazırlaşıram uzaqbaşı sentyabrda hakimiyyətə gəlməyə, aaaa...". Sizcə bunun şərhə ehtiyacı varmı?
Şərhə ehtiyacı olmayan çox məqamlar var əslində bu videokonfransda. Gülünc və təəssüf doğuran. Hə, məhz təəssüf doğuran. Özünü müxalifət adlandıran bir qurumun rəhbər heyətinin açdığı müzakirəyə, elədikləri söhbətlərə bax. Birinin “zaryadka”sı bitir, biri serialdan danışır, biri digərini efirə buraxmamağı məsləhət görür...
Əslində Kərimli və ətrafındakı komandanın “zaryadka”sı çoxdan bitib. Bunlarınkı siyasət yox, bax beləcə dedi-qodudur. Bunların illərdir zatən işləri budur. Necə deyir liderləri Cəmil Həsənli? “Hamı iş başına, klaviatura arxasına”.
Hə, bir şeyi də deyim Şura üzvləri bilsinlər. O “Eşkiya dünyaya hökmdar olmaz”ı lağa qoyurduz ha? Təcili üzr istəyin. Hızır Çakırbəyli bilsə, batdız…
Səbuhi MƏMMƏDLİ
P.S. əvəzi:
Artıq Azərbaycan siyasətində Cəmil Həsənli amili də yoxdur. O, “hamı (hamı, yəni trollar) iş başına, klaviatura bizi gözləyir” çağırışı ilə özünü bitirdi.
