Xəbər verildiyi kimi, Amerika Birləşmiş Ştatlarının Prezidenti Donald Tramp Azərbaycan Respublikasının Prezidenti İlham Əliyevə 28 May - Respublika Günü münasibətilə təbrik məktubu ünvanlayıb.
Prezident Donald Tramp məktubunda 28 May - Respublika Günü münasibətilə Azərbaycan Prezidentinə və xalqına Amerika xalqı adından səmimi salamlarını və təbriklərini çatdırıb.
Məktubda deyilir ki, Birləşmiş Ştatlar Azərbaycanın suverenliyini və müstəqilliyini güclü şəkildə dəstəkləyir: “Birləşmiş Ştatlar və Azərbaycan beynəlxalq təhlükəsizliyi gücləndirmək, Avropanın enerji marşrutlarını və mənbələrini şaxələndirmək və iki böyük xalqın insanlarına parlaq gələcək qurmaq naminə təxminən 30 il əməkdaşlıq ediblər. Bu sahələrdə Azərbaycanın mühüm töhfələrini dəyərləndirir, dəstəklənməsinə söz verdiyimiz demokratik idarəetməni təşviq edən, habelə hüquq və azadlıqları qoruyan bütün addımların atılmasına həvəsləndiririk. Koronavirus pandemiyası ilə üzləşdiyimiz bir vaxtda Birləşmiş Ştatlar Azərbaycan xalqının yanındadır. Biz Minsk Qrupunun həmsədrlərindən biri kimi Dağlıq Qarabağ münaqişəsinin dayanıqlı və sülh yolu ilə həlli üçün danışıqların dəstəklənməsində iştirakımızı davam etdirəcəyik”.
Prezident Trampın adıçəkilən məktubunda diqqətçəkən məqamlardan biri də ABŞ və Azərbaycan nəzərdə tutularaq, “iki böyük xalq və dövlət” ifadəsindən istifadə olunmasıdır. Bu, iki ölkə arasında yaxın tərəfdaşlıq münasibətlərinin təsdiqi kimi səciyyələndirilməlidir.
Maraqlıdır, bəs ekspertlər Trampın “iki böyük xalq və dövlət” ifadəsinin məzmununu necə dəyərləndirirlər? Tramp sözügedən ifadəni işlətməklə nə demək istəyir?
“Sözügedən ifadə yaxın tərəfdaşlıq münasibətlərinə verilən yüksək qiymətdir”
Məsələyə münasibət bildirən siyasi ekspert Ramil Hüseynovun sözlərinə görə, bu, ABŞ-ın Azərbaycana xüsusi önəm verməsinin göstəricisidir: “Prezident Trampın məktubunda “iki böyük xalq və dövlət” ifadəsindən istifadə etməsi olduqca diqqətçəkən məqamdır. Bu, Azərbaycanın nüfuzuna, regionda oynadığı vacib rola verilən qiymətin göstəricisidir. ABŞ-ın dövlət başçısı səviyyəsində Azərbaycanı nüfuzlu və güclü dövlət olaraq qəbul etməsi ölkəmizin diplomatik uğurudur. Bu, yaxın tərəfdaşlıq münasibətlərinə verilən yüksək qiymətdir. Çünki ABŞ regionda Azərbaycanı özünün yaxın tərəfdaşı sayır. Fikrimcə, bu səbəbdən sözügedən ifadəni işlədib. Azərbaycan xalqına münasibətdə “böyük xalq” ifadəsinin işlədilməsi çox böyük məna daşıyır. Bu, xalqımızın regionda həyata keçirdiyi və bundan sonra da keçirəcəyi böyük hərəkətverici, tənzimləyici missiyaya verilən yüksək dəyərdir. Ona görə də hesab edirəm ki, Trampın sözügedən ifadəsi xüsusi önəm daşıyır”.
Vidadi ORDAHALLI
