Milli Şuranın üzvü Eldəniz Quliyev qurumdan istefa verdiyini açıqlayıb. O bu barədə özünün "Facebook" səhifəsində yazıb. E.Quliyev qeyd edib:"Təəssüf hissi ilə qeyd edirəm ki, bu andan etibarən Milli Şurayla yollarımız ayrılır və bu səbəbdən MŞ-dən istefa verirəm".
Qeyd edək ki, bir müddət əvvəl Eldəniz Quliyev cinsi azlıqlara qarşı təhqiredici və alçaldıcı ifadələr işlətmişdi. Milli Şuranın onlayn konfransında qurumun digər üzvləri Gültəkin Hacıbəyli və Rafiq Manaflı da onu dəstəkləyən çıxış ediblər və cinsi azlıqlara dözümsüz münasibət göstərilməsi ilə bağlı çağırışlar səsləndiriblər. Həmin konfransda açıq söyüşlərin səslənməsi isə cəmiyyətdə birmənalı qarşılanmayıb. Baş verənlərə görə üzr istəmək yerinə, Milli Şuranın sədri Cəmil Həsənli böyük bir yazı ilə çıxış edərək, həmin videokonfransın necə ictimailəşdiyindən narahatlığını ifadə edib. Bu xüsusda yazıb ki, güya həmin videokonfrans xüsusi xidmət orqanları tərəfindən dinlənilib və məqsədli şəkildə ictimailəşdirilib. Haqlı sual oluna bilər: bəs orda səslənən söyüşlər necə, montaj deyil ki? Təbii ki, yox. Həmin konfransda eyni zamanda Müsavat və REAL–ın da ünvanına təhqirlər, aşağılayıcı ifadələr işlədilib.
Eldəniz Quliyev istefasının səbəbini qısa olaraq belə açıqlayıb:“Ola bilsin ki, mətbuat konfransı keçirim. Amma onu deyə bilərəm ki, istefamdan itirən mən yox, Milli Şura oldu. Mən öz yerimdə, öz əqidəmdə və düşüncəmdəyəm”.
Milli Şuranın gələcək perspektivi ilə bağlı məsələyə toxunan E.Quliyev bildirib ki, bu artıq Milli Şuranın tamamilə iflasına aparan yolun başlanğıcıdır:“Daha belə də olmaz. Milli-mənəvi dəyərlər var. Bu hərəkətlərdən və mənim istefamdan itirən Milli Şura olacaq”.
Qeyd edək ki, Eldəniz Quliyev Facebookda məhz bu statusuna görə təqiblərə məruz qalıb və videokonfransada linç edilib:“İsmayıl Cəlilov AXCP və Milli Şura haqda ağlına, ağzına gələni deyə bilər... İstəsə lap bədəninin başından dəfələrlə böyük olan digər girdə hissəsiylə, yəni kürəyindən aşağı endikcə adını, formasını və daşıdığı funksiyasını dəyişdiyi yeriylə fəxr də edə bilər, hətta həmin o əzası ilə ləçərlik edər, özünə karyera qura bilər və.s və i.a. Öz işi, öz seçimi, öz həyatıdı - özü, bir də onu müdafiə edən üzdəniraqlar bilər. Qarışmıram...
Mənim, üzr istəyirəm, İsmayıl xanıma hər hansı bir sözüm-cavabım olsa, birbaşa onun ərinə deyərəm; çünki belə eksentrik məsələlər barədə adətən evin kişisi ilə danışarlar!”
Müsavat Partiyasının sədr müavini Fərəc Kərimli Milli Şuranın iclasında səslənən fikirlərə öz səhifəsində belə münasibət bildirib:“Milli Şuranın məlum iclasının davamında daha iyrənc fikirlər səsləndirilib. Videosunu şərhdə paylaşacam. Müsavat Partiyası Milli Şuranın sədri tərəfindən, Koordinasiya Mərkəzinin üzəri tərəfindən təhqir edilib. Cəmil Həsənli və digərləri Müsavat Partiyasından, cəmiyyətdən dərhal üzr istəməlidir. Bu biabırçılıqdan fikir yayındırmaq üçün hələ bir status da yazıb ki, guya iclas qapalı olub və hakerlər tərəfindən yazılıb. Halbuki, iclasda xəbərdarlıq edilir ki, iclas canlı efirə gedir”.
REAL-ın icra katibi Natiq Cəfərli də Milli Şuranın üzvü Gültəkin Hacıbəylinin və rəhbəri Cəmil Həsənlinin ötən gün təmsil etdiyi partiya ilə bağlı videoda səsləndirdikləri çıxışlara münasibət bildirib. O, Facebook profilində yazıb:"Milli Şura ilə bağlı hələ 2013-cü ildə şəxsən mənə hər şey aydın olub. Həmin zaman 7 dəfə danışıq apardıqdan sonra o mənasız, ipi yüz əldə olan quruma qoşulmaqdan imtina etdik. Hətta həbsdə olan sədrin təkidinə baxmayaraq, imtina etdik. Çünki dəyərləri, prinsipləri, aydın planı-proqramı olmayan, şəxs-şəxslər ətrafında bütpərəst təfəkkürlə qurulan təşkilata qoşulmaq axmaqlıq olardı. Sonradan da, indi də nə qədər haqlı olduğumuz öz təsdiqini tapdı. Bir çox dostlar MŞ-nın buraxılmasını tələb edir, olmayan qurum necə buraxılacaq ki?! MŞ yoxdur, AXCP var, o partiya özünə oyuncaq yan qurum kimi MŞ-nı saxlayırdı ki, məsələn, xaricilərlə görüşəndə iki təmsilçi ilə getsinlər və ya daxildə hər hansı bir siyasi birlik ideyası olsa, ora hər iki qurumdan təmsilçi salaraq səsvermədə üstünlük qazansınlar, vəssalam. Bu qədər primitiv və köhnədirlər.
Bunların nə demokratiya dərdi var, nə də haqq-hüquq gündəliyi, çünki o dəyərlər haqqında təsəvvürləri belə yoxdur. Videoları da, çox güman, öz içlərində olanlar sızdırıb - zatən içlərində hökumətə işləməyən çətin tapıla. Hər birinin illərdir bu hökumətlə əlaqələri olub-var, onlara çəkilən xətdən, biçilən roldan heç vaxt kənara çıxmayıblar. Onların siyasət anlayışı o qədər primitiv, keçmişləri o qədər qaranlıqdır ki, istənilən başqa cür düşünən-davranan siyasi təşkilatı həmən düşmən görüb sıradan çıxartmağa çalışırlar".
Görünən budur ki, yarandığı gündən yalnız AXCP-nin yedəyində gedən Milli Şura adlı qurum tam bitdiyini sübut etdi. Onu son məzara isə öz üzvləri yola salır. Eldəniz Quliyevin istefasının qurumun tam çökməsində bir katalizator rolunu oynayacağına şübhə qalmır.
Məhəmmədəli QƏRİBLİ
