Yalan üzərində qurulan erməni siyasəti əvvəlki kimi davam edir. Erməni mediasının yaydığı məlumata görə, Azərbaycandan gələn “qaçqınlara” 800 milyon dollar dəyərində mənzil sertifikatı verilib. Sözügedən sertifikatlar 30 ildir evi olmayan ailələrə verilib.
Ermənistan Miqrasiya xidmətinin verdiyi məlumata görə, koronavirus səbəbindən və sözügedən şəxslər yaşlı insanlar olduğuna görə qurum şəxsiyyət vəsiqələrini yaşayış yerlərinə təhvil verib. 21 noyabr 2019-cu ildə hökumət "Ermənistan Respublikasının 2019-cu il dövlət büdcəsinə dəyişikliklər və əlavələr edilməsi haqqında" qərar qəbul edib. Sözügedən qərara uyğun olaraq, “qaçqınların” mənzillə təmin edilməsi dövlət büdcəsi hesabına maliyyələşdiriləcək. 112 ailəyə mənzil alması barədə şəhadətnamələr verilir. Proqramın icrası üçün təxminən 1,5 milyard dram ayrılıb. Sertifikat çərçivəsində mənzilə sahib olmaq müddəti 1 ildir.
Guya sözügedən proqram çərçivəsində 30 ildir evi olmayan “qaçqınlar” mənzillə təmin ediləcək. Bütün bunlar gülüncdür. Əvvəla Ermənistan humanist dövlət deyil deyəsən ki, sözügedən niyyətin kökündə humanizm dayanır. Ən başlıcası, Ermənistan yoxsul dövlətdir. Dövlət büdcəsi xarici yardımlar hesabına formalaşır. Hər il müxtəlif xeyriyyə marafonları adı altında ordan-burdan pul dilənirlər. Mənzil tikintisi ilə bağlı layihələr böyük vəsait tələb edir. Ermənilərin isə mövcud imkanları bu kimi layihələri həyata keçirmək gücündə deyil. Necə deyərlər, acından ölən ölkədə pulsuz mənzil paylanılması mümkün deyil. O zaman bütün bunlar nə deməkdir? Bu kimi kampaniya aparmaqda məqsədləri nədir?
“Beləcə, ölkəmiz barədə mənfi rəy yaratmaq istəyirlər”
Məsələyə münasibət bildirən şərqşünas Seyid Camal Əzimbəylinin sözlərinə görə, bütün bunların arxasında xəbis niyyətlər dayanır: “Sözügedən ermənilərə mənzillərin veriləcəyi barədə deyilənlər hamsı boş söhbətdir. Ermənistanın bu kimi sosial xarakterli layihələri həyata keçirmək üçün maliyyə-iqtisadi imkanları yoxdur. Bu, zatən, bəlli olan məsələdir. Belə olan halda, bəs bu şounun məqsədi nədir? Bununla elə görüntü yaradırlar ki, guya onlar hələ də Azərbaycandan gələn “qaçqınların” mənzil problemini həll edə bilməyiblər. Yəni bununla dünyaya göstərmək istəyirlər ki, onların belə bir problemi var. Məqsəd Dağlıq Qarabağ və ətraf rayonların işğalını pərdələməkdir. Bu minvalla, dünya ictimaiyyətini çaşdırmaq istəyirlər. Əsl erməni hiyləgərliyi bax budur. Belə bir saxta rəy yaratmaq istəyirlər ki, guya Azərbaycanın günahı üzündən Ermənistan qaçqın problemindən əziyyət çəkir və s. Beləcə, ölkəmiz barədə mənfi rəy yaratmaq istəyirlər. Ən başlıca məqsəd isə, qeyd etdiyim kimi, Qarabağın işğalını arxa plana keçirməkdir. Ona görə də bu, sırf təbliğat xarakterli siyasi kampaniyadır. Ermənistan dövlətini əhalinin mənzil problemi belə çox narahat edirsə, o zaman 30 il əvvəl baş verən zəlzələ nəticəsində evsiz qalanları mənzillə təmin etsinlər”.
Vidadi ORDAHALLI
