Erməni mediası yazır ki, Avropa Şurası insan hüquqları orqanlarının həll olunmamış münaqişə ərazilərinə daxil olmasını zəruri hesab edir.
AŞ sözçüsü Tatyana Baeva erməni mediasına açıqlamasında bildirib ki, Avropa Şurasının bu məsələ ilə bağlı mövqeyi dəyişməyib: “Avropa Şurasının qondarma "boz zonalarda "insan hüquqlarının müdafiəsi ilə bağlı mövqeyi dəyişməyib".
Daha əvvəl AŞ-nin Baş katibi Mariya Peyçinoviç insan hüquqları orqanlarının həll olunmamış münaqişə ərazilərindəki "boz zonalar"a daxil olmağın təmin edilməsinin vacibliyini bildirib: “Üzv dövlətlərimizin bütün vətəndaşları bu ərazilərdə faktiki nəzarətdən və statuslarından asılı olmayaraq, Konvensiya ilə tam qorunmalıdır. Baş katib bütün maraqlı tərəflərlə, o cümlədən, üzv dövlətin hüquqi orqanları və de-fakto hakimiyyəti orqanları ilə, habelə monitorinqi asanlaşdıra bilən hər hansı üzv dövlətlə sıx əlaqə quraraq, bu sahələrdə Avropa Şurasının müvafiq qurumlarına müraciət etməyə borcludur”.
AŞ-nin əvvəlki baş katibi Torbyorn Yaqland da bənzər mövqe sərgiləyib: “Mülki bir komissara icazə verilməməsi yolverilməzdir. “Boz zonalar” komissarlığa açıq olmalıdır. Bu “boz sahələr”dən biri Qarabağdır. Avropa İttifaqı hökuməti bu sahədə humanitar monitorinq məqsədilə komissara ziyarət etmək səlahiyyətini vermək üçün bəyanat verməlidir”.
Görünən odur ki, AŞ-dəki ermənipərəst dairələr bu istiqamətdə səylərini davam etdirirlər. Hansı ki, AŞ-nin bu mövqeyi təhlükəlidir. Çünki Dağlıq Qarabağda insan hüquqlarının vəziyyəti ilə bağlı qurumun hər hansı monitorinqi dövlətlərin ərazi bütövlüyü prinsipi ilə bir araya sığmır. Bir sözlə, bu çox xoşagəlməz təşəbbüsdür.
“AŞ separatçı qurumlarda insan hüquqlarının vəziyyətindən belə narahatdırsa…”
Məsələyə münasibət bildirən siyasi ekspert Ramil Hüseynovun sözlərinə görə, qətiyyən AŞ-nin bu təşəbbüsünə yol vermək olmaz: “Tanınmamış ərazilərdə bu kimi monitorinqlərin keçirilməsi təşəbbüsü dövlətlərin ərazi bütövlüyünü birbaşa təhdid edir. Belə bir hal baş verərsə, o zaman ermənilər böyük həvəslə qondarma “DQR”in təbliğində istifadə edəcəklər. Bu, Ermənistan və erməni lobbisi üçün separatçı qurumu təbliğ etmək baxımından göydəndüşmə fürsət olacaq. AŞ separatçı qurumlarda insan hüquqlarının vəziyyətindən belə narahatdırsa, o zaman Dağlıq Qarabağ və ətraf 7 rayondan didərgin salınan 1 milyonadək məcburi köçkünün hüquqlarını gündəmə gətirsin. Bunun səbəbkarı olan Ermənistana qarşı sanksiyalar tətbiq olunsun. Belə olarsa, o zaman qurumun ədalətli mövqedən çıxış etdiyinə inanmaq olar. Bir məqamı da xüsusi qeyd etmək istəyirəm ki, AŞ rəsmiləri “boz zonalarda” insan hüquqlarının vəziyyətini gündəmə gətirərkən, nədənsə, bu işlərin ancaq qondarma “DQR”də həyata keçirilməsinə daha çox maraq göstərirlər. Postsovet məkanında olan digər separatçı qurumlarda bununla bağlı monitorinqlərin aparılmasına maraq göstərmirlər. Bunun özü ikili yanaşmanın bariz göstəricisidir”.
Vidadi ORDAHALLI
