Ermənistanın Xarici İşlər naziri Zohrab Mnasakanyan MDB Xarici İşlər Nazirləri Şurasının iclasında çıxışı zamanı qeyd edib ki, Böyük Vətən Müharibəsi bəşəriyyət tarixindəki ən qanlı müharibələrdən biri olub: “Ümumi Qələbənin 75 illiyi münasibətilə bir daha sizləri təbrik etmək istəyirəm. 9 May ən böyük itki verən və faşizmin məğlubiyyətinə həlledici töhfə verən xalqlarımız üçün müqəddəs bir tarixdir. Faşizm üzərində Qələbəyə Hitler əleyhinə olan koalisiya ciddi töhfə verdi”.
Mnasakanyanın belə pafoslu danışması təəccüb doğurur. O mənada ki, Mnasakanyan faşizmi əbədiləşdirən dövləti təmsil edir. Paşinyanın faşizm məsələsindəki mövqeyi bəllidir. Məsələ ondadır ki, o, Ermənistanda faşistlərə xidmət edən cəlladlara abidə qoyulmasına pis baxmır. Bu, əslində, faşizmi qəhrəmanlaşdırmaq məsələsidir. Maraqlıdır, Mnasakanyanın bu yanaşması Ermənistan hakimiyyətində faşizm məsələsinə fərqli yanaşmağın göstəricisidir, yoxsa ikili oyundur?
“Ermənistan rəhbərliyi özünü elə aparır ki, sanki onlar müstəqil siyasət yeridir”
Məsələyə münasibət bildirən politoloq Elşən Manafovun sözlərinə görə, Ermənistan hakimiyyəti faşizm məsələsinə yanaşmada ikili oyun oynayır: “Ermənistan hakimiyyətinin faşizm məsələsində sərgilədiyi mövqe diqqəti cəlb etməyə bilməz. Məsələ ondadır ki, Böyük Vətən Müharibəsi Rusiya üçün ən ağrılı məsələlərdən biridir. Belə bir ərəfədə Ermənistan hakimiyyətinin faşizm məsələsi ilə bağlı sərgilədiyi mövqe Rusiyaya bir mesaj kimi qəbul oluna bilər. O mənada ki, erməni tərəfi müəyyən məqamlarda Rusiyanın bölgə, MDB dövlətləri ilə bağlı irəli sürdüyü təkliflərə imza atmayacağı kimi mövqe də sərgiləyir. Məsələn, indinin özündə də Azərbaycanın Kollektiv Təhlükəsizlik Müqaviləsi Təşkilatına üzv olması məsələsi masa üzərindədir. Düzdür, Azərbaycan bəyan edib ki, Ermənistanla birlikdə eyni hərbi təşkilatda ola bilməz. Ancaq, bununla belə, Rusiya çox istərdi ki, Azərbaycan KTMT-də təmsil olunsun. Burada maraqlı məqam odur ki, sözügedən məsələdə Ermənistan özünü Rusiyanın forpostu kimi aparmır. Bəyan edir ki, belə bir şey olarsa, veto qoyacaq. Faşizm məsələsində də Ermənistanın mövqeyi buna bənzərdir. Paşinyan utanmadan deyir ki, babası İkinci Dünya Müharibəsində faşistlərə qarşı vuruşub. Ancaq məlum olur ki, babası faşistlərə qulluq edib. Mnasakanyanın məlum açıqlaması ikili oyundur. Ermənistan rəhbərliyi özünü elə aparır ki, sanki onlar müstəqil siyasət yeridir. Əslində isə Ermənistan Rusiyanın forpostudur. Bu ölkədə Rusiya hərbi bazaları var, Ermənistan enerji sarıdan asılıdır və s. Ermənistanın hazırki rəhbərliyi Rusiyaya sığınan sabiq müdafiə naziri Arutunyanın ekstradisiyasını istədi. Rusiya bundan imtina etdi və bildirdi ki, Ermənistan Kremllə demarş yolu ilə danışa bilməz”.
Vidadi ORDAHALLI
