Erməni KİV-i məlumat yayıb ki, güya Türkiyənin İstanbul şəhərinin Bakırköy məhəlləsində olan erməni kilsəsini yandırmağa cəhd ediblər. Türkiyədəki erməni patriarxlığının nümayəndəliyi faktı təsdiqləyib. Onların bildirdiyinə görə, cəhdi edən şəxs “koronavirusu ermənilər törədib” şuarını səsləndirib. Bildirilir ki, şikayət əsasında saxlanılan şəxs günahını etiraf edib və bunu koronavirusun ermənilər tərəfindən yayılması ilə izah edib.
Bəllidir ki, Türkiyədə dini ayrıseçkilik yoxdur. Başqa dinin daşıyıcılarına normal münasibət bəslənir. Belə olan halda, bu təxribatın ermənilərin özü tərəfindən hazırladığını nə dərəcədə inandırıcı saymaq olar?
İlahiyyatçı Tural İrfan “Bakı-Xəbər”ə açıqlamasında bildirdi ki, bu məlumatda da erməni hiyləsi, yalanı açıq hiss edilir:“Onlar millət olaraq hər zaman bütün proseslərdən yararlanmağa çalışıblar. Bu gün də dünyada koronavirus pandemiyası gündəmdədir. Görünür, bu vəziyyətdən də hansısa formada öz mənafeləri üçün yararlanmağa cəhd edirlər. Bu hadisənin, xüsusilə də güya Türkiyədə baş verməsi təxribatın olduğuna şübhə yeri qoymur. Nəyə görə bu kimi “problemlərlə” ermənilər dünyanın başqa ölkələrində deyil, məhz Türkiyədə məşğul olurlar? Türkiyədə dini dözümlülük yüksək səviyyədədir. Belə olmasaydı, ermənilərin onların başına gətirdiklərinin fonunda indi heç həmin ölkədə bir dənə də olsun erməni kilsəsi qalmamalıydı. Bilirsiniz ki, Qüds şəhərindəki müqəddəs məsciddə bütün dinlərə bir yer ayırıblar. Ermənilər üçün də yer var. Onlar daima orda mübahisələr yaradırlar, digər xristian təriqətlərini ordan sıxışdırmağa cəhd edirlər. Yəni ermənilər, xüsusilə də dini müstəvidə təxribatları törətməkdə mahirdirlər. Lazımdır ki, Türkiyədəki din xadimləri də aktiv olsunlar. Çox təəssüf ki, bizim müsəlman din xadimləri daha çox diqqəti İslamın daxilindəki tərqiət məsələlərinin aydınlaşmasına ayırırlar. Bir balaca qriqorian kilsəsi dini müstəvidə təxribat edirsə, onun cavabını ilk növbədə dini cameə verməlidir. Nüfuzlu din xadimləri öz sözlərinin kəsəri ilə belə mövzuları yeridəcə bağlamalıdırlar. Ermənilərdən ibarət olan din xadimlərinə başa salsınlar ki, dini siyasətə qatmaq olmaz. Belə manipulyasiyalarla Türkiyənin dözümsüz ölkə imicini formalaşdırmağa çalışırlar. Bu yaxınlarda bizim Şeyxulislam Trampa məktub yazdı ki, İrana qarşı sanksiyaları yumşaltsınlar. Təqdirəlayiq haldır. Amma biz istərdik ki, din xadimləri müraciətdə bütün aspektləri nəzərə alsınlar. Trampa həm də ermənilərin işğal etdikləri ərazilərimizdəki məscidlərdə hansı vandallıqları törətdikləri barədə məlumat verilsəydi yaxşı olardı. Ermənilər belə xırda məsələləri sonradan yavaş-yavaş böyüdürlər. Bu səbəbdən də, nüfuzlu din xadimləri bunun təxribat olduğunu çıxıb deməlidir. Görürlər ki, saxta soyqırım məsələsi effekt vermir, indi də belə təxribatlara əl atırlar”.
Məhəmmədəli QƏRİBLİ
