Məlum olduğu kimi, bir neçə gün əvvəl Mədəniyyət Nazirliyinin vəzifəli şəxslərinin öz səlahiyyətlərindən qəsdən qulluq mənafeyinə zidd olaraq istifadə edib cəmiyyətin və dövlətin qanunla qorunan mənafelərinə mühüm zərər vuran coxsaylı qanunazidd əmələ yol vermələri ilə bağlı Dövlət Təhlükəsizliyi Xidməti (DTX) tərəfindən əməliyyat-istintaq tədbirləri həyata keçirilib. Nəticdə Mədəniyyət nazirinin müavini Rafiq Bayramov və Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov həbs ediliblər.
Bildiyimiz kimi, Mədəniyyət Nazirliyi, ümumiyyətlə, ən çox tənqid edilən nazirliklərdən biri kimi diqqəti cəlb edirdi. Nazirliyin ünvanına ən çox tənqid mədəniyyət xadimləri, işdən çıxarılmış mədəniyyət qurumlarının rəhbərləri tərəfindən səsləndirilirdi. Məsələ burasındadır ki, daha çox fəxri adların verilməsində, eləcə də musiqi məktəblərinə rəhbər təyinatında, mədəni irsin qorunması sahəsində ciddi nöqsanlar olduğu vurğulanırdı. Bölgələrdə fəaliyyət göstərən kitabxanaların da vəziyyəti elə də ürəkaçan deyil. Bunun hamısı nazirliyin həmin istiqaməti kurasiya edən məmurlarının günahı olduğu gizlin deyil.
Bir neçə ay əvvəl İsmayıllı rayonunun Gəraybəyli kəndinə səfər etmişdik, səfər çərçivəsində kənd kitabxanasında da olmuşduq. Gəraybəyli kənd kitabxanasının acınacaqlı durumu haqqında qəzetimizdə geniş məqalə də çap etmişdik. Gəraybəyli kənd kitabxanası yeganə deyil, respublikamızda onun kimi saysız kitabxana var ki, təmir olunacağı günü gözləyir. Dövlət büdcəsindən mədəniyyət sahəsinə kifayət qədər vəsait ayrılsa da, o vəsaitin cüzi bir hissəsinin mədəniyyətin inkişafına xərcləndiyi məlumdur. Bütün bu problemlər var və onların həlli vacibdir.
Diqqətinizi başqa bir məsələyə yönəltmək istəyirik. Mədəniyyət nazirinin müavini Rafiq Bayramov və Xidmət rəisi Zakir Sultanov həbs edildikdən sonra onların öz işlərində yol verdikləri ciddi nöqsanlar barədə bir çox insan, xüsusən də bəzi millət vəkilləri bu gün danışır.
Qeyd edək ki, Mədəniyyət Nazirliyinin ayrı-ayrı vəzifəli şəxslərindən narazı qalan insanlar kömək üçün birbaşa millət vəkillərinə müraciət edirdilər. Onların isə bu insanlara heç bir köməyi dəymirdi.
Bildiyimiz kimi, bu sahədə ciddi problemlər həmişə olub, amma bəzi deputatlar buna indi reaksiya verirlər. Onlar məsələyə nə üçün vaxtında deyil, indi reaksiya verirlər?
“...gözləyirlər ki, dövlətin müvafiq qurumları bu cür neqativ halları aşkarlasın və bundan sonra...”
Siyasi şərhçi Azər Həsrət “Bakı-Xəbər”ə bildirdi ki, bəzi millət vəkillərinin məqamında susub indi danışması “arxadan atılan daşa” bənzəyir. “Bəzi millət vəkilləri bu məsələyə niyə gec reaksiya verdilər, yaxud “qatar gedəndən” sonra onun arxasınca baxmağa başladılar? Əlbəttə, bu sualın cavabı bizə aydındır. Təəssüflər olsun ki, uzun illər Azərbaycan parlamentində kürsü zəbt etmiş deputatların böyük əksəriyyəti tənqidçi mövqedən çıxış etməyə çəkinib. Bunun da səbəbi var. Çünki bu vaxta qədər olanların bir qismi bu və ya digər şəkildə biznes maraqlarına xidmət edirdi və təbii ki, indi korrupsiyada adı hallandırılanların, bir növ, ortağı idilər. Bu və ya digər şəkildə yolları, eləcə də biznesləri kəsişirdi, ona görə də tənqid etməkdən çəkinirdilər. İndi aşkarlananları vaxtında tənqid etmək bəzi deputatların maraqlarına uyğun olmadığı üçün onlar susurdular. Bu baxımdan, cəmiyyətimiz çox şeyi itirirdi. Cənab Prezident də dəfələrlə çıxışlarında qeyd edib ki, hər kəs cəmiyyətdəki neqativ halları tənqid etməlidir. Biz hamımız müşahidə etdiyimiz mənfi halları diqqətə çatdırmalıyıq, ictimailəşdirməliyik ki, neqativ hallar aradan qaldırılsın. Bu həm də Prezidentə kömək deməkdir. Amma təəssüflər olsun ki, parlament bu məsələdə bütün fəaliyyəti dövründə “sinifdə qalıb”. İndi yeni tərkib seçilib. Gözləyirdik ki, bu yeni tərkibdə, xüsusən də yeni deputatlar öz tənqidçi mövqeləri ilə seçiləcəklər. Amma aradan xeyli müddət keçməsinə baxmayaraq, hələ də biz o yenilərin tənqidçi mövqeyini görə bilmirik. Onların hansısa ciddi problemləri ictimailəşdirdiklərini müşahidə etmirik”.
A.Həsrət hətta bəzi deputatların problemlərə zamanında reaksiya vermədiyini və fakt ictimailəşdikdən sonra ona münasibət bildirdiyini qeyd edir. “Bəzi deputatlar, bir növ, gözləyirlər ki, dövlətin müvafiq qurumları bu cür neqativ halları aşkarlasın və bundan sonra onlar “orada korrupsiya, orada yeyinti olub” desinlər. Halbuki, deputatlar fakt aşkarlanandan sonra yox, fakt aşkarlanmayana qədər bu problemi dilə gətirməli idilər. Siz deputatlar onun üzərində nəzarətçi olmalısınız. Siz deputatlar hamıdan əvvəl belə hallar barədə məlumatlı olmalısınız. Niyə xəbəriniz olmayıb? Yaxud, xəbəriniz olduğu halda, bunu nə üçün dilə gətirməyibsiniz? Niyə tənqidlərinizi səsləndirməmisiniz? İndi nə baş verir? İndi onsuz da müvafiq dövlət qurumları görməli olduqları işi görürlər. Bu da birbaşa Prezidentin iradəsinə bağlı məsələdir. Göstərmək istəyirlər ki, Prezident İlham Əliyev bu məsələdə belə mövqe tutursa, biz də ona dəstəkləyək. Belə olmur. Deputat dediyin sərbəst, müstəqil, tənqidçi olacaq, eyni zamanda da cəmiyyətin içində olacaq. Mən fürsətdən istifadə edərək, indi tərkibdə olan deputatlara çağırış etmək istəyirəm ki, bu vaxta qədər kimlərsə parlamentə kürsü zəbt etdilər, bilmirəm yatdılar, vaxtlarını havaya sovurdular, keçdi getdi, heç olmasa indən sonra Prezidentin çağırışlarına uyğun olaraq tənqidçi mövqelərini sərgiləsinlər, cəmiyyətin əyər-əskiyini dilə gətirib, həllinə təkliflərini versinlər” - deyə A.Həsrət vurğuladı.
İradə SARIYEVA
