“Mən Avropa Komissiyasının və Qoşulmama Hərəkatının hansısa vahid formatda iştirak etdiyi ikinci belə hadisəni xatırlamıram”. Bunu Prezident İlham Əliyev TASS agentliyi direktorunun birinci müavini Mixail Qusmanın Qoşulmama Hərəkatının Zirvə görüşünün əhəmiyyəti barədə sualını cavablandırarkən deyib.
Ölkə başçısının fikrincə, Avropa İttifaqı Qoşulmama zirvəsinə ona görə qoşuldu ki, Azərbaycanla bu qurum arasında münasibətlər normaldır: “Bu məqamı xüsusi vurğulamalıyam. Mən Avropa Komissiyasının və Qoşulmama Hərəkatının hansısa vahid formatda iştirak etdiyi ikinci belə hadisəni xatırlamıram. İndiki halda bu cür birgə tədbir ona görə mümkün oldu ki, Azərbaycan Avropa İttifaqı ilə çox fəal əlaqə saxlayır, Azərbaycan beynəlxalq arenada çox böyük nüfuz qazanıb”.
Görünən odur ki, Azərbaycanın beynəlxalq arenada çox böyük nüfuzu var. Beynəlxalq qurumlar ölkəmizlə münasibətlərə xüsusi önəm verirlər. Maraqlıdır, Azərbaycan - Aİ münasibətləri normal olmasaydı, Avroittifaq sözügedən zirvəyə qoşulardımı?
“Azərbaycan faktoru olmasaydı, belə görüş baş tutmazdı”
Məsələyə münasibət bildirən politoloq Məhəmməd Əsədullazadə bunu istisna etdi: “Qoşulmama Hərəkatının Təmas qrupunun Bakı Zirvəsinin keçirilməsi qlobal pandemiyaya qarşı üzv dövlətlərin birgə mübarizəsinə həsr edilsə də, burada beynəlxalq geosiyasətdə Azərbaycanın apardığı rol çox mühümdür. Qeyd edim ki, ayr-ayrı qütblərə malik olan Avropa İttifaqı və Qoşulmama Hərəkatının sözügedən konfransda bir araya gəlməsində Azərbaycan amili mühümdür. Artıq Azərbaycan ayrı-ayrı qütblərdə olan təşkilatları bir araya gətirən əsas platforma rolunda çıxış edir. Azərbaycan faktoru olmasaydı, belə görüş baş tutmazdı. Demək, Azərbaycanın sözü hər iki təşkilat çərçivəsində nəzərə alınır. Hesab edirəm ki, Avropa İttifaqının bu Zirvədə təmsil olunması Azərbaycanın nüfuzu ilə bağlıdır. Bu, siyasi proseslərdə Azərbaycanla Avroittifaq arasında əlaqələrin müsbət dinamika ilə inkişaf etdiyinin bariz nümunəsidir. Aİ ölkəmizin əsas iqtisadi tərəfdaşıdır və ölkəmizlə əlaqələrin inkişaf prioritetləri daim strateji xətt daşıyıb. Məhz belə bir tədbirdə Aİ-nin iştirakı göstərdi ki, rəsmi Bakı hər iki təşkilatla əməkdaşlığı yüksək səviyyədə qurmağa və bu qurumları bir araya gətirməyə qadirdir”.
Vidadi ORDAHALLI
