Prezident İlham Əliyevin Rusiyanın populyar TASS agentliyinə müsahibəsində İkinci Dünya Müharibəsində ermənilərin faşistlərlə yaxından əməkdaşlıq etdiyinə, Ermənistanın açıq-aşkar şəkildə faşizm təlimlərini yaydığına, faşizm cəlladlarını qəhrəmanlaşdırdığına dair diqqətçəkən fikirlər bildirib.
“...Mən təəssüflə qeyd etdim ki, Ermənistanda faşist canilərinin qəhrəmanlaşdırılması həyat normasına çevrilir. Konkret misallarla göstərdim ki, bir neçə il bundan əvvəl Ermənistanda faşist cəllad və cani, Njde ləqəbi ilə məşhur olan Qaregin Ter-Arutyunyana 6 metr hündürlüyündə heykəl qoyulub. Bu adamın cinayətləri sübut olunub. Yeri gəlmişkən, Qələbənin 75 illiyi ərəfəsində həm Rusiya Federasiyası Xarici İşlər Nazirliyi, həm də Rusiya Federasiyası Müdafiə Nazirliyi tərəfindən dərc edilmiş sənədlər də buna sübutdur. Bu adam müharibə dövründə deyirdi: “Almaniya uğrunda həlak olan Ermənistan uğrunda həlak olur”. Bu adamın təxribatçılıq fəaliyyəti çoxsaylı insanın ölümünə gətirib çıxarıb və təsadüfi deyil ki, müharibə qurtarandan sonra o, SMERŞ tərəfindən həbs edilib, 25 il azadlıqdan məhrum edilib və Vladimir həbsxanasında ölüb. Belə bir adama Ermənistanda 6 metr hündürlüyündə heykəl qoyulur. Heykəlin açılışında bu ölkənin keçmiş prezidenti iştirak edir” - deyə bildirən Prezident İlham Əliyev Ermənistanın həyata keçirdiyi nasist yönümlü siyasəti kəskin ifşa edib. Prezident İlham Əliyevin səsləndirdiyi haqlı fikirlər Ermənistanın ciddi şəkildə narahatlığına səbəb olub və bununla bağlı Ermənistanın Xarici İşlər Nazirliyi (XİN) bəyanat verib. Tamamilə yalan və uydurma fikirlər üzərində qurulan bəyanatda ermənilər öz aləmlərində Azərbaycanı tarixi irsi saxtalaşdırmaqda ittiham etməyə cəhd edirlər. Ömrü boyu ləyaqət hissinin nə olduğunu bilməyən bir dövlətin bu cür bəyanatlar səsləndirməsi faşizm üzərində Qələbəyə ləkə olmaqla yanaşı, həm də çox gülünc görünür. Erməni XİN-i əsassız olaraq iddia edir ki, guya Azərbaycan Qələbənin 75 illiyi münasibətilə antierməni siyasətini bu kontekstdə istifadə edir. Bəyanatda qeyd edilir ki, Ermənistan vətəndaşları müharibədə həm Sovet ordusunun, həm də milli diviziyaların tərkibində vuruşublar, guya ermənilər onların xatirəsini hörmətlə yad edirlər. “Həmin qəhrəmanlar bizim bu dövrə aid tariximizin ən böyük sübutlarıdır ki, biz faşizmə qarşı mübarizə aparmışıq. Bizim bu mövqeyimiz təkcə sözdə deyil, həm də əməlimizdədir” - deyə yayılan, tarixi saxtalaşdırmaq üzərində qurulan bəyanatda daha sonra deyilir ki, Ermənistanda “qəhrəmanlar”ın abidəsinin heç birinə toxunulmayıb və hamısı yerində durur. Saxtakarlıq üzərində köklənən bəyanatda Ermənistan XİN-in sözçüsü daha da həyasızlıq edərək, Sovet illərində Çardaxlı kəndində Böyük Vətən Müharibəsi “qəhrəmanları” - Avanes Baqramyana və Babacanyana qoyulmuş abidənin nə zaman bərpa olunacağından bəhs edir. Faşist əlaltılarına heykəl ucaldan Ermənistan dövlətindən bundan fərqli münasibət gözləmək olmaz. Baqramyan və Babacanyan da faşistlərlə əməkdaşlıq etmiş erməni cəlladlarıdır. Məlumdur ki, Azərbaycanda heç zaman faşizm əlaltılarına heykəl qoyulmayıb və qoyulmayacaq da. Yəqin bunu faşistpərəst siyasət aparan Ermənistan yaxşı bilir.
“Yaradılmasına ehtiyac olan komissiya Baqramyanın da faşistlərlə əlbir olması...”
Azərbaycan Milli Elmlər Akadmiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev Ermənistan XİN-in yaydığı bədnam bəyanatı baki-xeber.com-a şərh edərkən bildirdi ki, bəyanatda yer alan fikirlərin heç biri həqiqət deyil. Azərbaycan Prezidentinin hər zaman faktlara söykənərək haqlı fikirlər bildirməsinin Ermənistanı narahat etdiyini deyən Q.Hacıyevin sözlərinə görə, Prezident İlham Əliyev yalnız indi deyil, digər müsahibə və çıxışlarında, görüşlərində Ermənistanın həyata keçirdiyi faşizm siyasətini ifşa edib. Ermənistan XİN-in məlum bəyanatının heç bir həqiqətə, tarixi fakta söykənmədiyini deyən Q.Hacıyev hesab edir ki, ermənilər bir əlində iki qarpız tutmağa adət etmiş toplumdur: “Son dövrlər Ermənistan Azərbaycan Prezidentinin onların həyata keçirdiyi faşizm, nasizm siyasətini ifşa etməsindən bərk narahatdır. Onlar saxta, qeyri-tarixi, uydurma fikirlər səsləndirməklə dünya qarşısında özlərini təmizə çıxarmaq istəyirlər. Ermənistan həm Njdeyə və digər faşist əlaltılarına heykəl qoyur, onları “qəhrəmanlaşdırır”, həm də faşizm üzərində qazanılan Qələbədə “böyük payı” olduğunu iddia edir. Küçədən hakimiyyətə gələn və dövləti “küçə diplomatiyası” ilə idarə edən Paşinyan Ermənistanla bağlı beynəlxalq aləmdə bildirilən əsaslı, haqlı tənqidlərə də küçə təfəkkürü ilə reaksiya verir. Belə olmasaydı, Ermənistan XİN bu çürük bəyanatı yaymazdı. Qələbənin 75 illiyinin bayram edilməsi ilə bağlı keçmiş SSRİ-yə daxil olan respublikalar tədbirlər görürlər. Əlbəttə, Böyük Vətən Müharibəsində hər bir respublikanın insanları əziyyət çəkib, maddi, canlı itkilər verib. Bu müharibədə Ermənistan başqa respublikalar qədər böyük itki verməyib. Ermənistan istəyir həm faşizm üzərində Qələbənin 75 illiyi münasibətilə keçirilən tədbirlərdə “birinci sıra”da dayansın, amma faşizmi dəstəkləməkdən və onu dövlət siyasətinə çevirməkdən də əl çəkmir. Bu ziddiyyəti hər kəs açıq görür. Faşizmi təbliğ edən, faşist əlaltısına heykəl qoyan bir ölkə Qələbənin 75 illiyi ilə bağlı təntənəli mərasim keçirməyə iddia edir. Bu da Azərbaycan dövlətinin haqlı iradına, tənqidinə səbəb olur. Azərbaycanın dövlət başçısı açıq görür ki, Ermənistan ikiüzlü siyasət yeridir. Bu baxımdan, Azərbaycan Prezidenti də, Azərbaycan xalqı da, Azərbaycan KİV-i də, alimləri də Ermənistanı haqlı olaraq tənqid edir. Sizə bir fakt deyim, bu gün Ermənistanda Böyük Vətən Müharibəsində iştirak edən veteranlardan çox, faşist əlaltılarının xatirəsinə ehtiram göstərilir, onlara heykəllər ucaldılır. Ermənistanın bu davranışı heç kəsin gözündən yayınmır”.
Baqramyan və Babacanyanın heykəli ilə bağlı məsələyə gəlincə, Q.Hacıyev qeyd etdi ki, bu gün beynəlxalq tərkibdə bir komissiya yaradılmalı və Baqramyan və Babacanyanın həqiqətən də Sovet İttifaqı Qəhrəmanı adını daşımağa layiq olub-olmadığı araşdırılmalıdır. “Baqramyanın və Babacanyanın Çardaxlıdakı abidəsinə gəlincə, ermənilərin bu saxta iddiaları da ifşa olunmaqdadır. Bizim gözəl bir el məsəlimiz var: “utanmasan, oynamağa nə var ki...”. Ermənilər 200 ildir gəlib yerləşdikləri Azərbaycan torpaqlarında Azərbaycan xalqına aid abidələri, tarixi-mədəni irsi məhv edib, terror, deportasiya, işğallar törədiblər ki, bunlar heç tarixlərə sığmaz. Ermənistan Baqramyanın, Babacanyanın heykəli haqqında danışmaqdansa, Şuşada, Xocalıda və digər Azərbaycan torpaqlarında törətdikləri cinayətlərdən utanmalıdırlar və buna görə cavab verməlidirlər. Şuşa kimi əzəmətli qədim şəhərimizdə, eləcə də işğal etdikləri digər ərazilərimizdə maddi-mədəni irsimizə divan tutublar. Şuşada mütəfəkkirlərimizin - Bülbülün, Üzeyir bəyin, Natəvanın heykəllərini güllələyiblər, Vaqifin məqbərəsini, Xan qızının çəkdirdiyi kəhrizi, məscidləri darmadağın ediblər. Bu faktlara göz yumub utanmadan Baqramyanın, Babacanyanın abidəsindən danışırlar. Baqramyan kimdir ki? Njde kimi faşist əlaltılarından biri də odur. Son dövrün araşırmaları Baqramyan haqqında və digər ermənilər barədə çox ciddi faktlar ortaya qoyub. Ermənilər Böyük Vətən Müharibəsində can qoymaq əvəzinə, canlar alıblar. Müharibədə qeyri-erməniləri siyasi baxımdan dolaşdıraraq məhv ediblər. Njdenin də, Baqramyanın da əməllərində bu faktlar var. Biz onlara böhtan atmırıq, həqiqəti deyirik. Gedib hələ araşdırsınlar görək qarşılarına hansı faktlar çıxır və bu faktlardan utanacaqlarmı. Baqramyan bir qatildir. İki dəfə Sovet İttifaqı Qəhrəmanı, xalqımızın böyük qəhrəman oğlu Həzi Aslanovun müharibədə müəmmalı şəkildə həlak olmasının baiskarı Baqramyandır. Hətta Həzi Aslanovun Baqramyanın sifarişi ilə qətlə yetirildiyinə dair faktlar var. Bu danılmaz faktdır. Bu tarixi həqiqətə ermənilər cavab versinlər.
Bütün bu faktların dünyaya sübut olunması üçün beynəlxaq komissiyanın yaradılmasına da ehtiyac var. Yaradılmasına ehtiyac olan komissiya Baqramyanın da faşistlərlə əlbir olması, Həzi Aslanovu qətlə yetirtməsi ilə bağlı həqiqəti üzə çıxardıqdan sonra Baqramyanın adını tarixdən də silmək tam mümkündür, nəinki onun heykəlini ucaltmaq. Eyni zamanda, bizim alimlər də bu yöndə yeni tədqiqatlar aparmalıdırlar. Ermənistan XİN-in bu bəyanatı tamamilə cəfəngiyyatdır. Mən və digər tarixçilər erməni saxtakarlığının ifşa edilməsi məsələsində Azərbaycan dövlətinin və cənab Prezidentin tutduğu mövqeyi müdafiə edirik, qoruyuruq. Hesab edirik ki, Ermənistanın bu cəfəngiyyatları davam etdikcə, bizdən haqlı cavablarını alacaqlar” - deyə Q.Hacıyev vurğuladı.
İradə SARIYEVA
