Zemfira Əsədova: “Artıq keçən əsrin 90-cı illərindən rəsmi olaraq ölkəmizdən xaricə çıxarılan istənilən musiqi alətinə görə icazə sənədi tələb olunur” “Muzeydə alətləri ekspertizadan keçirmək, qiymətləndirmək üçün 7 nəfər mütəxəssisdən ibarət ekspert komissiyası fəaliyyət göstərir”
Musiqi alətləri ifaçıları xarici ölkələrə konsertə, tədbirə, toya gedərkən hava limanında özləri ilə apardıqları musiqi alətlərinə görə onlardan icazə sənədi tələb olunur. Məlumatlara görə, sənətkarlar alətlərini gömrükdən keçirmək üçün tələb olunan müvafiq sənədi hava limanında təqdim etmədikdə onların alətləri buraxılmır. Bundan narahatlıq keçirən bəzi musiqi alətləri ifaçıları redaksiyamızla əlaqə saxlayıb bunun səbəblərini araşdırmağımızı xahiş etdilər.
Onu da bildirdilər ki, icazə sənədi Mədəniyyət və Turizm Nazirliyi tərəfindən verilir. Məsələni araşdırmaq məqsədilə nazirliklə əlaqə saxladıq. Mədəniyyət və Turizm Nazirliyindən bildirdilər ki, həqiqətən də xaricə aparılan alətlərə görə sənəd istənilir. Qurumdan onu da dedilər ki, məsələ ilə bağlı daha geniş məlumatı Azərbaycan Musiqi Mədəniyyəti Dövlət Muzeyindən ala bilərik.
Azərbaycan Musiqi Mədəniyyəti Dövlət Muzeyinin direktor müavini Zemfira Əsədova “Bakı-Xəbər”ə açıqlamasında bildirdi ki, qanunla ölkədən xaricə çıxarılan istənilən musiqi aləti, eləcə də xalça, təsviri incəsənət nümunələri və s. xüsusi icazə sənədi ilə sərhəddi keçməlidir: “Bu həqiqətən də belədir. Bizim muzeydə alətləri ekspertizadan keçirmək, qiymətləndirmək üçün 7 nəfər mütəxəssisdən ibarət ekspert komissiyası fəaliyyət göstərir. Həmin komissiyanın üzvlərindən biri də mənəm. Artıq keçən əsrin 90-cı illərindən rəsmi olaraq ölkəmizdən xaricə çıxarılan istənilən musiqi alətinə görə icazə sənədi tələb olunur. Bilirsiniz ki, illər əvvəl Azərbaycandan qədim xalçalar, rəsm əsərləri, musiqi alətləri daşınaraq xaricə aparıldı. Bu da bizim o mədəni sərvətlərimizin geri qayıtmaması ilə nəticələndi. Həmin dövrdən də, bir qayda olaraq, hansı sənətkar xaricə konsertə, tədbirə gedirsə, gəlib muzeydə fəaliyyət göstərən ekspert komissiyasına müraciət edir. Komissiya aləti yoxlayır, onun fotolarını çəkir, barəsində məlumatlar hazırlayır və ona pasport verir. Bu pasportu həmin alətə görə birdəfəlik alır. Nə vaxtsa aləti dəyişilsə, onun üçün də başqa pasport lazım olur. Biz həmin alətin tam təsvirini yaradırıq və ona icazə pasportu veririk. Həmin aləti sənətkar özü ilə istədiyi yerə apara bilir”.
Z.Əsədovanın sözlərinə görə, hətta xarici vətəndaşlar Azərbaycandan hansısa bir musiqi aləti, xalça və başqa incəsənət məhsulları aldıqda onlar da komissiyaya müraciət edir və sənəd aldıqdan sonra maneəsiz gömrüyü keçib gedirlər: “Biz xaricə aparılan alətlərə görə xüsusi şəhadətnamə veririk. Sizin qəzetiniz vasitəsilə sənər adamlarına demək istəyirəm ki, xaricə apardığınız alətlərinizə görə gəlin komissiyadan keçin və müvafiq sənəd alın. Əks halda, sərhəddə, gömrükdə problemlə qarşılaşacaqsınız. Sənədsiz heç bir alət xaricə buraxılmır. Bununla biz o alətlərin itib-batmasının qarşısını alırıq”.
İradə SARIYEVA
