İlham Məmmədzadə: “Elvin nişanlısına məktubunda yazmışdı ki, mən şəhid olsam bir il gözlə, sonra ailə həyatı qur, oğlun olarsa adını Elvin qoy”
Məktublar ümiddir adama, anaya-bacıya, ataya-qardaşa, yar-yoldaşa təsəllidir...Son məktubunu şəhadətindən əvvəl nişanlısına yazmışdı. Yazmışdı ki, vəsiyyətini, arzusunu, ürəyinin içindəki duyğunu könül verib sevdiyi, barmağına nişan üzüyü taxdığı gözələ ayan etsin.
Göz yaşın atəş olub yaxar məni ağlama,
Yandırar, hey yandırar gülüm, səni ağlama.
Dodağındakı dua mənə səni andırır
Bircə il yoluma bax, gözlə məni, ağlama...
Şəhid leytenant Elvin Məmmədzadə canını Vətənə fəda edən oğullardan biridir. Arxasında sevduyi qızı, ata-anasını buraxıb, Vətən sevgisini bütün sevgilərdən üstün tutib. Vətəni hamıdan çox sevib.
Samuxlu şəhid leytenant Elvin Məmmədzadənin atası İlham Məmmədzadə ilə Gəncədə görüşdük. Nəzakət Məmmədovanın rəhbərlik etdiyi Mədəniyyət Nazirliyi Respublika Xatirə Kitabı Redaksiyasının ərsəyə gətirdiyi “44 Gün-Tarixi zəfər” dördcildliyinin II, III və IV cildlərinin Gəncədə keçirilən təqdimat mərasiminə İlham Məmmədzadə də gəlmişdi.
Azərbaycan Bayrağı Ordenli şəhid leytenant
Elvin İlham oğlu Məmmədzadə 1996-cı il noyabrın 22-də Samux rayonunda anadan olub. 2003-2012-ci illərdə M.Ə.Sabir adına Samux şəhər tam orta məktəbində, 2012-2015-ci illlərdə Cəmşid Naxçıvanski adına Hərbi Liseydə təhsil alıb. 2015-2019-cu illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb. Nişanlı idi.
Elvin Məmmədzadə 2019-cu ildən Azərbaycan Silahlı Qüvvələrinin “N” saylı hərbi hissəsində “leytenant” hərbi rütbəsində xidmət edirdi. Azərbaycan Silahlı Qüvvələrinin leytenantı olan Elvin Məmmədzadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzuli, Cəbrayıl, Zəngilan, Qubadlı və Şuşa rayonunun azadlığı uğrunda gedən döyüşlərdə iştirak edib.
Elvin Məmmədzadə noyabrın 9-da Şuşa döyüşləri zamanı şəhid olub. Samux rayonunda torpağa tapşırılıb.
Azərbaycanın ərazi bütövlüyünün bərpa edilməsi zamanı döyüş əməliyyatlarının rəhbəri olan, düşmənin canlı qüvvəsinin və döyüş texnikasının məhv edilməsində rəşadət göstərən, vəzifə borcunu ləqayətlə və vicdanla yerinə yetirdiyinə görə Azərbaycan Prezidenti İlham Əliyevin 15.12.2020-ci il tarixli Sərəncamına əsasən Elvin Məmmədzadə ölümündən sonra "Azərbaycan Bayrağı" ordeni ilə təltif edildi.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Elvin Məmmədzadə ölümündən sonra "Vətən uğrunda" medalı ilə təltif edildi.
Azərbaycanın Qubadlı rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Elvin Məmmədzadə ölümündən sonra "Qubadlının azad olunmasına görə" medalı ilə təltif edildi.
İlham Məmmədzadə oğlu haqda danışdıqca da daha da qürurlanır, gözlərindən kədər qarışıq bir qürur da boylanır. Ata deyir ki, Elvin axırıncı dəfə onlarla noyabrın 1-də danışıb və ondan sonra Elvinlə əlaqə saxlamaq mümkün olmayıb. “Vətən Müharibəsinin başa çatmasına bir neçə saat, 24 yaşının tamamına isə 13 gün qalmış, noyabr ayının 9-da Şuşa istiqamətində qəhrəmancasına şəhid olub. Elvinin nəşini 4 gün sonra ala bildik və Gəncə Şəhidlər Xiyabanında dəfn etdik.
Elvininlə qürur duyuram. Göstərdiyi şücaət görə, Prezident İlham Əliyevin Sərəncamı ilə " Azərbaycan Bayrağı" ordeni ilə təltif olundu. Özü şəhid olsa da, yaddaşlarda igid, cəsur, vətənpərvər bir Azərbaycan oğlu olaraq qaldı. O, çox ağıllı, vətənpərvər bir oğul idi. Tətillərdə evə gələndə çox söhbətlərimiz olurdu. Elə bilirdim ki, qarşımda gənc bir oğlan yox, müdrik, dünyagörmüş bir insan dayanıb. Yəni o qədər ağıllı, o qədər təmkinli idi ki... Deyirdi ki, torpaqlarımız mütləq azad olunacaq. Buna inamı böyük idi. Elə bir oğul idi ki, tərifini sözlə demək çətindir. Onunla qürur duyuram. Bir şeyə heyfslənirəm ki, oğlum Elvinə bəylik taxtında oturmaq qismət olmadı. Üç il nişanlı qaldı. Gəncədən gözəl, ağıllı bir qızla nişanlanlanmışdı. Toylarına əvvəlcə koronavirus pandemiyası mane oldu, sonra da müharibə...Elvin şəhid oldu, amma nişanlısı hələ də onun yolunu gözləyir. Çox istəyirik ki, o qız ailə həyatı qursun, oğlunun adını da Elvin qoysun. Amma o, ailə həyatı qurmaq istəmir... Elvin nişanlısına məktubunda yazmışdı ki, mən şəhid olsam bir il gözlə, sonra ailə həyatı qur, oğlun olarsa adını Elvin qoy... Nişanlarının ailə həyatı qurmasını özü vəsiyyət etmişdi".
İlham ata deyir ki, Elvin şəhid olsa da, o, oğlunu yaşayırmış bilir, çünki onun kimi igidlər ölmürlər.
Elvinin şəhidliyi atanı ağrıtsa da, amma o, oğlunu qürurla anır və bildirir ki, o, şərəfli bir Azərbaycan əsgəri olaraq öz vəzifəsini layiqincə yerinə yetirib, canı bahasına da olsa, Vətən torpağını yağı çaynağından qoparanlardan biri olub.
Elvin qələbə günündə, qəəbənin bir addımlığında şəhid olub. O Zəfər şəhididir, xatirəsi heç zaman solmayacaq.
İradə SARIYEVA
Gəncə-Bakı
