Son illər Azərbaycanda bir sıra sahələrdə sistemli islahatlar aparılır. Belə ki, idarəetmə, sosial, iqtisadi və digər sahələrdə köklü islahatları müşahidə edirik. Sözügedən islahatlar daha da dərinləşib və mahiyyətcə yeni xarakter kəsb edir.
Aparılan iqtisadi islahatlar nəticəsində ölkədə maliyyə sabitliyi və iqtisadi artım bərpa olunub, bir çox sahələrdə, xüsusilə kənd təsərrüfatı, qeyri-neft sənayesi və digər sektorlarda əhəmiyyətli irəliləyiş əldə edilib. Biznes mühitinin bütün sahələri, xüsusilə biznesə başlama, tikinti üçün icazələrin alınması, elektrik təchizatı şəbəkələrinə qoşulma, maliyyə mənbələrinə çıxış imkanlarının artırılması, vergilərin ödənilməsi, əmlakın qeydiyyatı, xarici ticarətin aparılması üzrə əhəmiyyətli irəliləyiş qeydə alınıb.
Bütün bunların nəticəsidir ki, aparılan islahatlar, öz növbəsində, “Doing Business 2019” hesabatında Azərbaycanın ümumi reytinqdə yeni rekorda imza atmasına, eləcə də əksər indikatorlar üzrə mövqeyinin daha üst səviyyəyə qalxmasına imkan verib. Belə ki, sözügedən hesabatda Azərbaycan dünyanın 10 ən islahatçı dövləti siyahısına daxil edilərək, dünyanın ən çox islahat aparan ölkəsi elan olunub. Yeni hesabatda Azərbaycanın mövqeyi 2017-ci illə müqayisədə 32 pillə irəliləyərək 190 ölkə arasında 25-ci yerdə qərarlaşıb, ölkəmiz dünyanın bir çox ölkələrini geridə qoymaqla Müstəqil Dövlətlər Birliyi ölkələri arasında lider mövqeyə yüksəlib.
Bu gün Cənubi Qafqaz regionunun iqtisadi potensialının 70 faizi məhz Azərbaycanda formalaşıb. Ölkəmiz iqtisadiyyatın rəqabətqabiliyyətliliyinə görə dünya ölkələri arasında öncül yerlərdən birini tutur. Bir sıra reytinq agentlikləri Azərbaycanın potensial imkanlarını yüksək qiymətləndirirlər.
Bütün bunların fonunda, Azərbaycanda aparılan islahatların digər MDB ölkələrindəki islahatlardan forma və prinsip fərqləri nədən ibarətdir?
Fikrət Yusifov: “Ölkədə aparılan islahatlarda dövlət dəstəyi böyükdür”
Sözügedən məsələ ilə bağlı fikirlərini “Bakı-Xəbər”lə bölüşən iqtisad elmləri doktoru Fikrət Yusifov buna bir neçə aspektdən yanaşdı: “Bu islahatların fərqli cəhəti ondan ibarətdir ki, Azərbaycan neft ölkəsidir. Ən azından, enerji ehtiyatları olmayan ölkələrdən fərqli bir islahat aparırıq. Yəni iqtisadiyyatın qeyri-neft sektorunun daha sürətli inkişafında qərarlıyıq və bu istiqamətdə ciddi addımlar atırıq. Bir fərqli cəhət bundan ibarətdir. Digər fərqli cəhət odur ki, Azərbaycanda islahatların sürəti MDB ölkələri ilə müqayisədə daha yüksəkdir. Dünya Bankının son hesabatında iqtisadi islahatların aparılma sürətinə görə 10 ölkədən biri Azərbaycandır. MDB məkanında biz birinci yerdəyik. Başqa bir tərəfdən, Azərbaycanda aparılan islahatlarda dövlət dəstəyi böyükdür. İslahatlar bilavasitə ölkə başçısının diqqətindədir. Hesab edirəm ki, bu çox önəmli məqamdır. Azərbaycanda aparılan islahatların dinamikliyi daha cəlbedicidir. Bu da sözügedən istiqamətdə işlərin uğurlu getməsini və yaxşı nəticələrin əldə edilməsini şərtləndirir. Bundan başqa, Azərbaycanda islahatlar bir neçə istiqamət üzrə aparılır. Hesab edirəm ki, bizim son bir-iki ildə büdcə gəlirlərimizin, xərclərimizin artımının nəinki MDB məkanında, heç dünyada belə analoqu yoxdur. Nadir rast gəlinən haldır ki, hansısa ölkənin büdcəsinin xərcləri bir ildə 50 faiz artsın. Məhz Azərbaycan bir il ərzində buna nail oldu”.
Vidadi ORDAHALLI
