Prezident İlham Əliyevin "Fiziki şəxslərin problemli kreditlərinin həlli ilə bağlı əlavə tədbirlər haqqında" 28 fevral 2019-cu il tarixli Fərmanının icrası olaraq, fiziki şəxslərin xarici valyutada olan kreditləri üzrə kompensasiyaların verilməsi ilə əlaqədar hazırlıq işləri başa çatdırılıb və kompensasiyaların ödənişinə başlanıb.
Artıq vətəndaşların bir qismi kompensasiyanı alıb, ya da alacaq. Ancaq bəzi banklar vətəndaşa kompensasiyanı ödəmək üçün ondan əlavə ödəniş tələb edirlər. Bu hal “Muğanbank”ın Şəmkir filialında qeydə alınıb. Şikayətçi Rövşən Qəhrəmanov bildirib ki, 2015-ci ildə “Muğanbank”ın Şəmkir filialından Hüseynova Validə Əli qızının adına dollar krediti götürüb: “Kredit bağlanıb. Bizə 913 manat kompensasiya düşür. Bank bizdən 240 manat pul istəyir. Deyir ki, bu pulu gətirməsəniz, kartınızı ala bilməyəcəksiniz. İşçilər deyirlər ki, bizə guya güzəşt edilib. Hansı sənədlə güzəşt edilib? Bunu sübutla ortaya qoyan yoxdur. Halbuki, biz artıqlamasıyla kreditimizi bağlamışıq. Bu cür problemi tək bizə yox, müştərilərin çoxuna yaşadırlar”.
Digər şikayətçi Hacıyeva Yavər Seymur qızı isə qeyd edir ki, o da 2015-ci ildə 2000 dollar kredit götürüb: “Krediti ödəyib bitirmişik. Hazırda bizə 1600 manat kompensasiya düşür. Bizdən də 516 manat pul tələb edirlər”.
“Muğanbank” - Sahib Daşdəmirov: “Kompensasiya üçün rüşvət tələb edildiyini deyən Rövşən Qəhrəmanov “Muğanbank”ın müştərisi deyil"
Şikayətçilərin məlum iradını nəzərə alıb, “Muğanbank”la əlaqə saxladıq. “Muğanbank” ASC-nin İdarə Heyəti sədrinin hüquqi məsələlər üzrə müşaviri Sahib Daşdəmirov bildirdi ki, kompensasiya üçün ondan rüşvət tələb edildiyini deyən Rövşən Qəhrəmanov “Muğanbank” ASC-nin müştərisi deyil və ona heç bir kompensasiya məbləğinin verilməsi nəzərdə tutulmayıb: “Bildirmək istəyirik ki, həqiqətən də R.Qəhrəmanov “Muğanbank” ASC-nin Şəmkir filialına müraciət edərək, yuxarıda adı çəkilən müştərilərə çatacaq kompensasiya məbləği ilə maraqlanmağa çalışıb, lakin bank tərəfindən R.Qəhrəmanova “Banklar haqqında” Azərbaycan Respublikası Qanunun müddəaları izah edilmiş və digər müştəri barədə məlumat verilməsindən imtina edilib. Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Azərbaycan Respublikasının Prezidentinin 28.02.2019-cu il tarixli Fərmanına əsasən, vətəndaşlara kompensasiyalar tam şəffaf şəraitdə verilməklə yanaşı, kompensasiyaların verilməsi Azərbaycan Respublikası Maliyyə Bazarlarına Nəzarət Palatasının nəzarəti altında həyata keçirilir və hər hansı hüquq pozuntusuna yol verilmir.
Vətəndaş Hacıyeva Yavər Teymur qızı isə banka müraciət edərək heç bir sayta narazılıq etmədiyini və ümumiyyətlə, bu barədə xəbərinin olmadığını bildirib”.
Günel CƏLİLOVA
