18/07/2019 05:21
728 x 90

Birinci kvartalda könüllü sığorta 17 faiz azaldı – sığorta bazarımızda nə baş verir...

“Qeydə alınan azalma o demək deyil ki, könüllü sığorta ödənişləri...”

img

Bu ilin yanvar-mart aylarında Azərbaycanda könüllü sığorta növlərinin hesabına 129 milyon 948 min manat sığorta haqqı toplanıb.

Maliyyə Bazarlarına Nəzarət Palatasının statistikasından belə məlum olub ki, könüllü sığorta yığımları ötən ilin eyni dövrü ilə müqayisədə 17,3 faiz azdır. Son 1 ildə icbari sığorta növləri hesabına daxilolmaların məbləği isə 97,5 faiz artaraq 71 milyon 227 min manat olub. Hesabat dövründə könüllü sığorta növlərində isə ödənişlərin məbləği 29 milyon 912 min manat təşkil edib ki, bu da illik müqayisədə 32,7 faiz azdır. İl ərzində icbari sığorta növləri üzrə ödənişlərin məbləği isə 2,9 faiz artaraq 16 milyon 322 min manata çatıb.

Beləliklə, 2019-ci ilin yanvar-mart aylarında könüllü sığorta bazarından toplanmış hər 100 manat sığorta haqqının 23 manatı qədər ödəniş edilib. Bu rəqəm 2018-ci ilin yanvar-mart aylarında 28,3 manat olub. Son 1 ildə icbari sığorta bazarında hər 100 manat sığorta haqqına düşən ödənişin məbləği isə 44 manatdan 22,9 manata düşüb.

Bundan əlavə, 2018-ci ilin 1-ci rübü ilə müqayisədə 2019-cu ilin 1-ci rübü ərzində Azərbaycanda fəaliyyət göstərən 22 sığorta şirkətindən 10-nun topladığı sığorta haqları artıb, 11-də isə azalıb. 1 sığorta şirkəti isə yeni lisenziya aldığından, ilk rübdə əməliyyat aparmayıb.

Onu da qeyd edək ki, bu ilin yanvar-mart aylarında Azərbaycandakı 21 sığorta şirkətinin xətti ilə 201,174 milyon manat məbləğində sığorta haqqı toplanıb. Bu isə ötən ilin eyni dövrü ilə müqayisədə 4,2 faiz çoxdur. Görünən odur ki, digər sığota növləri üzrə yığımlar artıb. Maraqlıdır, belə olan halda, niyə məhz ötən ilin eyni dövrü ilə müqayisədə bu ilin birinci rübündə könüllü sığorta yığımları 17 faizdən çox azalıb?

  • Xəyal Məmmədxanlı: “Sözügedən sığorta ilə bağlı müqavilələrin böyük əksəriyyəti birinci rübə yox, ikinci və sonrakı rüblərə düşür”

Sözügedən məsələyə aydınlıq gətirən sığorta sahəsi üzrə ekspert Xəyal Məmmədxanlının sözlərinə görə, adətən birinci rübdə könüllü sığorta yığımları az olur: “Bu səbəbdən birinci rübün göstəriciləri hər kəsi çaşdırır. Çünki birinci rübdə könüllü sığorta yığımlarının az olması, bir növ, ənənə halını alıb. Ümumi tendensiya isə onu göstərir ki, ilbəil könüllü sığorta yığımlarında artım var. Lap əvvəllər isə bu sahədə yığımların həcmi çox aşağı idi. Son bir neçə ildə bu sahədə müəyyən müsbət tendensiyalar müşahidə edilir. Məsələ ondadır ki, könüllü sığorta ilə bağlı müqavilələrin böyük əksəriyyəti birinci rübə yox, ikinci və sonrakı rüblərə düşür. Ona görə də birinci rübdə yığımla bağlı azalmalar diqqət çəkir. Ümumilikdə isə bu sahədə müsbət tendensiya var. Elə il olub ki, icbari sığorta yığımları az olub, amma könüllü sığorta yığımları çox olub. O baxımdan qeydə alınan azalma nisbidir. Hətta daha əvvəl istifadə olunmayan könüllü sığorta növlərində belə, müəyyən rəqəmlər ortaya çıxmağa başlayıb. Bir məqamı da qeyd edim ki, xüsusən böyük şirkətlərin könüllü sığorta müqavilələrinin əksəriyyəti düşür ikinci və sonrakı rüblərə. Söhbət böyük tibbi sığorta, böyük əmlak müqavilələrindən gedir. Ona görə də birinci rübdə qeydə alınan azalma o demək deyil ki, könüllü sığorta ödənişləri ilboyu az olacaq. Bunu ilin yekunlarına görə müqayisə etmək daha məqsədəuyğundur. Sevindirici hal ondan ibarətdir ki, əvvəlki illərə baxanda könüllü sığortaya maraq artıb. Bu o deməkdir ki, insanlar artıq sığortanın əhəmiyyətini başa düşürlər, könüllü şəkildə öz əmlak maraqlarını qorumağa çalışırlar. Məsələn, kənd təsərrüfatı risqlərinin sığortalanmasında rəqəmlər artır. Həyat sığortalarının bəzi könüllü növlərində artım var. Bu o deməkdir ki, insanlar öz sağlamlıqlarına daha çox diqqət göstərirlər. Dünyada ən mühüm sığorta növlərindən biri də məsuliyyət sığortasıdır. İnsanlar başqasına qarşı öz məsuliyyətini dərk edir və bunu sığortalayırlar. Sığortanın bu növünə də Azərbaycanda maraq var”.

Vidadi ORDAHALLI

Son xəbərlər