İqtisadiyyat və Sənaye Nazirliyi tərəfindən Mənzil Məcəlləsindən irəli gələn məsələlərin və mənzil-kommunal sahəsində formalaşmaqda olan yeni münasibətlərin təbliği, çoxmənzilli binalarda yeni idarəetmə üsullarının tətbiqinin sürətləndirilməsi, eləcə də mənzil mülkiyyətçilərinin müştərək cəmiyyətlərinin (MMMC) yaradılmasının dəstəklənməsi nəticəsində daha 3 MMMC - "Yasamal-1", "Yasamal-3" və "Səbail-2" mənzil mülkiyyətçilərinin müştərək cəmiyyətləri Ədliyyə Nazirliyi tərəfindən dövlət qeydiyyatına alınıb.
Bununla da Bakı şəhərində Binəqədi və Yasamal rayonlarının hər birində 4, Səbail rayonunda 2, Nəsimi və Xətai rayonlarında isə hər birində 1 MMMC olmaqla, dövlət qeydiyyatından keçən MMMC-lərin sayı 12-yə çatıb.
Hazırda ayrı-ayrı ünvanlarda yerləşən çoxmənzilli binalarda yeni idarəetmə üsullarının tətbiqi, eləcə də mənzil mülkiyyətçilərinin müştərək cəmiyyətlərinin yaradılması ilə bağlı müvafiq işlər davam etdirilir.
Artıq binaların saxlanmasını bina sakinləri özləri həyata keçirəcək. Yəni bina üçün xidmətləri mülkiyyətçi özü seçəcək. Hazırda əksər binalarda mənzil-istismar sahələri (JEK) xidmət göstərir. Ancaq MİS-lərin xidmət keyfiyyətindən razı olan sakinlər kimi, narazılar da var. Binalarını "JEK"lərə əmanət etmək istəməyən sakinlər bunun üçün MMMC-yə qoşula bilər. Beləliklə də binalarının saxlanmasını bina sakinləri özləri həyata keçirə bilər.
Bütün hallarda, MMMC-lərin MİS-lərdən hansı üstünlükləri var? Məsələ ilə əlaqədar Səbail rayonunda fəaliyyət göstərən MMMC-lərdən biri ilə əlaqə saxladıq. MMMC üzvü Nizami Ələsgərovun sözlərinə görə, yeni qurumların "JEK"lərdən bir sıra üstünlüyü var: "Əvvəla MMMC-lər çoxmənzilli binanın sahə mülkiyyətçilərinin könüllü birliyidir. Bu qurum çoxmənzilli binada daşınmaz əmlak kompleksini birgə idarə etmək, binanın ümumi əmlakının istismarını, ona sahibliyi, ondan istifadəni və qanunvericiliklə müəyyənləşdirilmiş hədlərdə barəsində sərəncam verilməsini təmin edir. MMMC-lər qeyri-kommersiya təşkilatı olan hüquqi şəxsdir və onun əsas məqsədi mənfəət götürmək deyil. Digər tərəfdən, MİS-lərdən fərqli olaraq, MMMC-lərin rəhbəri bina sakinləri tərəfindən seçilir. MMMC-lərin gəlirləri əsasən 3 mənbədən formalaşır: sakinlərin verdiyi aylıq haqlar, dövlət büdcəsindən ayrılan maliyyə yardımları və MMMC-nin fəaliyyəti nəticəsində (satış və icarə) əldə olunan gəlirlər. Qanunvericilikdə olduğu kimi, binanın ümumi əmlakı mülkiyyətçiyə məxsusdur. MMMC-lərin balansında olan binalarda ümumi əmlaklar mülkiyyətçilərə təhvil verilir. Yəni binalarda olan liftlər, çardaqlar, obyektlər və s. mülk sahiblərinin balansına keçirilir. MMMC-lərdə hətta mülkiyyətçilər özləri xidmətlərin növü və həmin xidmətlərin nədən ibarət olmasını müəyyən edə bilir. İdarəetmə üsulları arasında binaların MMMC-lər vasitəsilə idarə edilməsi təcrübəsi dünyada daha geniş yayılıb. Bu qurumlar beynəlxalq təcrübədə kondominium adlanır. Ən nəhayət, MMMC-lər daha çevik və səmərəli fəaliyyət göstərir".
